Наталья Чекашкина—лама тевса асу мокшава. Вов ни лама киза работай дополнительнай образованиянь педагогокс Рузаевкаса «Тяштеня» идень эстетическяй воспитаниянь (национальнай культурань) центраса. И тевонц тиендьсы ваймонь путозь, оцю ответственностень марязь. Наталья Васильевнань кельгсазь иттне, конат сашендыхть теенза занятияс.
Шачсь Саранскяйса, коза Рузаевскяй райононь Цифтамаз мокшень велеста эряма ётнесть тядянза-алянза, Анна Зиновьевна и Василий Яковлевич. Вете иттнень ёткста Наташа лувксс коре омбоцесь.
Школаса васенце классть шумордамдонза меле Наташа Родионова ушедсь тонафнема Саранскяень Идень республиканскяй музыкальнай школаса-интернатса. Мес? Валонзон коряс, эста тоса содамошиснон касфнезь велень ламоц стирнятне и цёранятне. Ётксост аф кржаль и Цифтамазса шачфта. И сонцьке пяк кельгозе мораманц. Мазы вайгяленц лангс шарфнесть мяль ламотне. Семьясост васенцесь, кинь эса шарьхкодевсь тя асусь, кона ульсь эсонза белай свету эвондамстонза и конань мархта стирнять казезе Шкайсь. Но эрь асуть эрявсь виияфнемс, маштозь работамс мархтонза. Самай эста эрь «цятконясь» аф мады кой-мзярс коцамда меле, а пингонь ётазь юрназеви оцю «толмаркс».
Мокшень стирнясь тонафнезе карзить, хуш инголи музыкальнай тя инструментть колга содась пяк кржа. Но кочкаф тевсь мялезонзоль. Школьнай предметтнень тонафнезень 19№ школаса, а карзить мархта сотфнень—музыкальнай школаса.
Школать шумордамдонза меле Наталья Родионова поступась Л.П.Кирюковонь лемса Саранскяень музыкальнай училищав, коса получась преподавателень, оркестрань артистонь квалификация.
1990-це кизотне аф тёждятольхть. Специальностьс коре работань вешемась ламотненди арсесь стака тевкс, а покодемс эрявсь. Вов и мокшавась кой-мзярс заняфоль мишендемань тевса. И лавкав эрь сувайть васьфнезе пеедезь, пара мяльса, лезнесь эрявикс товарть кочкамста. Ашельхть лангозонза пеняцяйхть.
2011 кизоста сявомок Наталья Васильевна работай «Тяштеня» дополнительнай образованиянь центраса педагогокс. 2019 кизоня шумордазе М.Е.Евсевьевонь лемса Мордовскяй государственнай педагогическяй институтть, получамок бакалаврань диплом. Сон—высшай квалификационнай категориянь специалист.
Лама киза ётась ся пингста, мзярда мазы вайгяль мокшавась аськолдазе «Тяштеня» центрать порогонц.
Дополнительнай образованиянь педагогсь аф аньцек тонафты морамань тевти итть, подросткат, но и сонць оцю мяльса морси центрать «Тяштеня» коллективсонза.
Мокшавась—руководитель центрать видеса «Валдоня» идень и подросткань коллективса, коза стирнятне и цёранятне оцю мяльса сашендыхть морама. Тняра кизоста Наталья Васильевна морама, моронь кельгома тонафтсь идень аф фкя поколения. Финцне касыхть, вастозост сайхть лият.
«Музыкальная шкатулка» творческяй объединенияти, конань вятьсы Наталья Чекашкина, сувси аф аньцек «Валдоня» творческяй коллективсь. Тя «арзянясь»—вокальнай и ансамблевай морамать коряс дополнительнай образовательнай программа.
«Тевс нолясайне тяниень пингонь образовательнай технологиятнень. Удалась кочкамс дидактическяй козя материал, мокшэрзянь, рузонь и омба масторонь музыкань фонохрестоматия, народнай, идень моронь фонограма»,—мярьгсь Наталья Чекашкина.
Педагогсь тонафтсыне иттнень музыкать кулхцондома и шарьхкодема, содафнесыне мокшэрзянь музыкальнай фольклорть, рузонь и омба масторонь классикнень творчестваснон мархта. Занятиянзон пингста стирнятне и цёранятне тонафнесазь вокалть, ансамбльса и хорса морамать.
Асу мокшавась фалу примси участия ётафневи пуромкснень—методическяй объединениятнень, методическяй советтнень эса, аноклакшни и ётафни мастер-класст. Сонь фалу ули кода няемс ламоц илатнень эса.
Творческяй коллективоц—«Валдоня» вокальнай ансамбльсь—фалу лисенди сяськикс и призёркс олимпиадатнень и конкурснень эса. Аф весть сатнесь и сатни I, II, III степенень Диплопт. И ламода тянь удалси тиемс асу педагогть Наталья Чекашкинать шабатнень мархта работамаса маштомошинц вельде. Сон кирди кеме соткст ся иттнень тядяснон-аляснон мархта, конат сашендыхть теенза занятияс.
Мокшавась вяти общественнай эряф. Россиянь Президентть, парламентскяй, Мордовия Республикань Оцюнять кочкаманзон пингста сувсесь избирательнай комиссиятненди, населениянь Всероссийскяй переписть ётафтомстонза переписчиколь.
2017 кизоня сатозе Рузаевскяй муниципальнай райононь оцюнять Грантонц. Меля теенза азфоль Мордовия Республикань Оцюнять Благодарностец. Казьф Мордовия Республикань Образованиянь министерствать Почётнай грамотанц мархта.
Педагогсь фалу муй марстонь кяль сембонь мархта. Кда киндивок эрявксты лезксоц—вестевок аф атказай. Работас коре ялганза, «Тяштеня» центрать директороц Анна Тишкина, сембе сят, кит содасазь, шарфнихть тянь лангс башка мяль.
Семьянц мархта эряй Рузаевкаса, но Цифтамазса уленди сидеста. Мокшень тя велеста мирдец, Виктор Иванович, тяса эряйхть Наталья Васильевнань тядяц и аляц.
Чекашкиттне, кода и сембе, путнихть Цифтамазса пере, коса касфнихть перень сёрот, кельгсазь модать мархта работамаснон. Сон, кле, максси вийхть, эрьгат, ваймафты ошень эряфть эзда.
Наталья Васильевнань и Виктор Ивановичень кафта идьсна. Цёрасна, Максим Викторович, эряй и работай Москуса. Стирьсна, Алина Викторовна, туф рьвакс, эряй Рузаевкаса. Сон, кода и тядяц, работай «Тяштеня» центраса.
Кельгома шачфтысна сафтсы и пидемань-панемань тевса. Кие хуш весть варчсезень кургонянзон, модамарень цёмаранзон, лия ярхцамбялензон—тянь лац сода сы.
Мзярда корхнеме Наталья Чекашкинать мархта, сон азсь оцю спасиба судьбати, кона пачфтезе «Тяштеняв» работама. Тяса, кле, эрявкстсь сембось ся, мезти тонафнень лама киза и тя коллективса, коса тефне молихть и ладяфт бта оцю семьяса, азорондайхть фкя-фкянь шарьхкодемась, лездомась, муйне вастозень.
Татьяна Альшина.