Оцю мяль шарфни минценнети, мокшэрзяннети

Торбеевскяй райононь Салазгорь мокшень велесь лац содаф эсь ломанензон мархта. Фкясь синь эздост поэтсь, фольклористсь, этнографсь Захар Фёдорович Дорофеев. Велеса лама лия содаф ломаньда, конатнень ёткса Социалистическяй Трудонь Геройсь Ф.Н.Жерёнов, республикань содаф хозяйственниксь И.И.Никишов. Тяса шачсть-кассть филолокт, журналистт, конат тяфта жа сатнихть эсь тевсост оцю сатфкст, кепсесазь мокшэрзянь культурать, эсь кяленьконь, литературать. А сембонди тянди ушетксокс ащи школась, коса минценнети шарфневи сатомшка оцю мяль.
Кемголмува киза мокшень кялень и литературань учителькс покоди школаса Галина Фёдоровна Никишова. Тя афкукс эсь кялень кельги, смузю тонафты. Галина Фёдоровна аделазе Н.П.Огарёвонь лемса Мордовскяй госуниверситетонь филологическяй факультетть и лама киза ни эсь содамошинзон няфнесыне тевса, тонафтсыне шабатнень кельгомс эсь кяленьконь, литературать.
—Мон аф каендан, мес кочкайне учителень тевть,—мярьгсь Галина Фёдоровна.—Тейне-арам, тя инь почётнай профессиясь. Минь школасонк тонафнихне оцю мяль шарфнихть минценнети, мокшэрзяннети. Синь лама лувондыхть, содафнихть писательхнень, поэттнень биографияснон и творчестваснон мархта «Мокшень правда» газетаста, «Мокша» и «Якстерь тяштеня» журналхнень эзда.
Мокшень кялень и мокшэрзянь литературань учительсь Г.Ф.Никишова ащи цебярь примеркс тонафнихненди. Сон аф весть лисендсь сяськикс «Лучший кабинет мордовского (мокшанского, эрзянского) языка» республиканскяй конкурсса. Тяда башка, Галина Фёдоровна вяти оцю патриотическяй работа иттнень ёткса. Кепотьксонди, ётай кизоть Салазгорь велень школань А.Эрькинонь лемса «Память» поисково-патриотическяй отрядти, конанди вятикс Г.Ф.Никишова, максф III степенень диплом «Неизвестный солдат» Всероссийскяй следопытскяй работань конкурсса. Шачема ширеть мархта сотф лия мероприятиятнень эса примсихть участия кода сонць Галина Никишова, стане и сонь учениконза. Галина Фёдоровнань лацотнень колга корхнихть—ломанць эсь вастсонза.
Н.Лобанов.