Од ломаттнень каванязь мокшень пачаса

Странаньконь разнай региононзон эзда 200-та лама цёрась и стирсь арасть «Диалог культур» V Всероссийскяй од ломанень межнациональнай лагерень, кона ётафтовсь Нижний Новгород ошса, участникокс. Тяфтама васедематне сявсть ушеткс Мордовияса, коса ульсь разнай нароттнень од поколениять активнай представителензон васенце васедемасна.
Форумть образовательнай программац максси возможность кирдемс кеме соткст участниконзонды и содафнемс национальнай фольклорть, музыкальнай, декоративно-прикладной и изобразительнай искусствать этническяй эсь лацонь ширеснон мархта.
Национальносттнень тевснон коряс Федеральнай агентствать руководителенц заместителенц Станислав Бедкинонь и эксперттнень мархта од ломаттне корхнесть родной кяльхнень и национальнай культурать ванфтомаса цифровой технологиятнень тевс нолямаснон колга.
Мордовиять эзда лагерьса примасть участия Н.П.Огарёвонь МГУ-нь Аграрнай институтонь преподавательсь Иван Рябов и васенце курсонь студенттне Станислав Алуев и Ангелина Карсакова.
«Тейнек васенцеда удалась няфтемс республиканьконь тяфтама форумса. А сяс мес кафедрасонк минь аф аньцек виияфнесаськ и тевс нолясаськ растениеводствань и животноводствань продукциятнень переработкаснон и производствань технологияснон, но и тонафнесаськ традиционнай мокшэрзянь ярхцамбяльхнень и симомбяльхнень рецептснон, оцю мяльса примаськ предложениять тиемс выступления «Культурань диалогса». Лагерть программанцты сувсесь тематическяй башка направления—«Национальнай кухнять блюдац»,—корхтай Иван Рябов.
Педагогсь и васенце курсса тонафнихне аф аньцек азондсть национальнай гастрономиять эсь лацонь ширензон и мокшетнень и эрзятнень ярхцамбяльснон колга, но и няфтезь мокшень пачатнень и траксонь сивольста рагуть анокламань технологияснон.
«Тевсь сянь эса, што мастер-классонди тейнек максовсь аф лама пинге. Сяс минь Станиславонь мархта кочкаськ блюдатнень, штоба кенеремс регламентти—пидеме-панеме пачат и пуштоме вайвелезса траксонь сиволь. Максовсь случай, штоба дивандафтомс россияттнень мокшэрзянь кухнять мархта»,—мярьгсь Иван Рябов.
Ангелина выступандась мастер-класса, коса фкя пингть разнай региоттнень эзда ниле участникне анокласть люкшянь ямста национальнай блюдат.
Ангелина и Станислав виденцясть, што васенда таколдсть, но ответственностень марямась тиезень сяда кемокс. «Минь вдь няфнеськ эсь народоньконь культуранц. Кенярдезь содаськ, што разнай нароттнень улихть фкя-фкянь лангс шарфты блюдасна»,—корхтайхть синь.
«Тяфтама васедематне тейнек пяк эрявихть, эрек корхнематне лезнихть ломаттненди сяда лац шарьхкодемс фкя-фкянь, макссемс оцю оценка национальнай козяшити и кельгомс лия нароттнень культурнай наследияснон»,—азозе Иван Рябов.