Оттне шарфнихть мяль мокшэрзянь культурати

Ётай недялять Саранск ошень округонь Культурань дворецса панжевсь «Встреча с прекрасным» лем ала мялень салай выставка. Тяса няфтьфт П.Ф.Рябовонь лемса 1№ идень художественнай школань 2023-2024 кизонь выпускникнень творческяй работасна.
Экспозицияти пуроптф 112 работа, конат тифт декоративно-прикладной искусствань эрь-кодама техникаса. Няфтьфт картинат, щапт, шуфтста керсеф налхкшт, сёрматф салфеткат, скатертть, нардамат и стак тов. Дивандат, мзярда содасак, што сембе тя мазышить тиисна ёфси од ломатть—теест аньцек 14-15 киза. И мезсь кеняртьфти, экспозицияса оцю васта занци национальнай тематикась. Тя корхтай сянь колга, што оттне шарфнихть мяль мокшэрзянь культурати, тонафнесазь сонь и старандайхть ванфтомс.
Кепотьксонди, Ева Кулаковась тись тяниень пингонь кафта сумкат—шоперхт. Тячиень од ломаттне синь пяк кельгсазь, пцтай эрть кядьста няят тяфтама каннембяль. А мазоптозень синь стирнясь мокшэрзянь орнаментса. Пяк удалафста лиссть. Кода азозе сонць од мастерицась, мялецоль анокламс выпускной работанди стама парши, конань улель кода аф аньцек няфтемс выставкаса, но и нолдамс тевс. Котф лангс сёрмадомань техникась сявф Зубово-Полянскяй районцта. Сумкатнень эса Ева стась-сёрмадсь пцтай 1,5 киза.
Выставкать ваномста ашель кода аф шарфтомс мяль якстерь сюреса сёрматф оцю скатертть лангс. Сонь тиезе 15 кизоса Софья Кокотина. Стирнясь якась художественнай школав 5 кизоста сявомок. Тоса и тонадсь сюретнень-салмокснень мархта работама. Педагогонц Ольга Викторовна Кузнецовать мархта ламос тонафнезь мокшень сюреса сёрмадомать уликс литературать коряс, улендсть Мокшэрзянь народнай культурань и Краеведческяй музейхнень эса, а меле стирнясь кярьмодсь тевс. Скатертть эса савсь сёрмадомс пцтай киза. Софьять мялец тиемс нинге фкя тяфтама скатерть и каземс сонь бабанцты.
Сире пинкнень мокшень пцтай эрь кудса ульсть эсь кядьса сёрматф нардамат. Синь нолявсть тевс кудъёткса, кшиса-салса инжиень васьфтемс, радня ломаненди каземс и стак тов. Тячивок нардамань сёрмадомась аф юксневи. Выставкаса лама няфтьфоль эздост. Авторснон ёткста фкясь Нонна Лукаевась. Стирнясь азозе, што сидеста уленди велеса щаванц ширеса, коса фалу няендьсыне мокшень щапнень-меснень, кулендьсыне мокшень моротнень и сембось тя пяк тушенды мялезонза. Сяс итоговай творческяй работань анокламстовок кочказе национальнай тематикать. Нардамань сёрмадомста тевс нолдазе Зубова аймаконь мокшетнень техникаснон.
Экспозициять панжемста художественнай школань выпускникненди лямбе валхт азсть школать директороц Ольга Акимова, Саранск ошень Администрациянь Социальнай политикать коряс Департаментонь Культурань управлениять директоронц заместителец Ирина Шмойлова и лиятне. Выпускникнень педагогснонды максфтольхть Благодарностть.
Выставкась кармай работама 18 октябрть самс.
Ольга КОЛЕДИНОВА.