«Пачань ши» фестивальсь—Атерьса

19 августста Атерень центральнай площадьса ётафтовсь «Пачань ши» фестивальсь. Илати анокламась мольфтевсь кунара. Тянь фалу мяльса кирдезе Атюрьевскяй райононь администрациясь. Райононь оцюнясь С.Е.Ермолаев азонкшнесь мяль ётафтомс тяфтама ила. И арьсефсь ётафтовсь эряфс.
Шнамань валхт азомат культурань работникненди. Районнай библиотекаса покодихне анокласть «Пачань пидема мастерской» лем ала оцю пялькстома, конань эса примасть участия райононь велень поселениянь сембе библиотекарьхне. А тя кеветиешка ломань. Маштыхть пачань пидема Оцяду велень поселенияса. Тястонь библиотекарсь А.И.Каштайкина занязе васенце вастть. Кие варжазень пачанзон фестивальса, сембонь тусть мялезост. Маштыхть пачань пидема и Кяшалса. Тястонь библиотекарсь занязе омбоце вастть. В.В.Поршина примси участия велень, райононь и нльне республикань сембе илатнень эса. Сонь пидефоц-паньфоц лац содаф ломаттненди. Эрь кизоня Валентина Васильевна примси участия Малькинскяй лувоматнень эса, конат лемневихть мокшень содаф поэтти, Великай Отечественнай войнань ветеранти, Кяшалонь цёфксти А.С.Малькинонди. Илань участникне фалу варчсесазь сонь пачанзон, пяряканзон, позанц.
—Кодама азорават, кда аф маштат пачань пидема, позань тиема,—корхтай Валентина Васильевна.—Кяшалса лац ванфтсаськ мокшень койхнень-обуцятнень. Кда кодамовок мокшень праздник, эрь кудса пачат. Тиендихть и поза. Тя тевсь тейнек содаф пяк лац. Сяс, мзярда ётафтовихть пачань и лия фестивальхть, кенярди седице.
Лама шнамань вал азфоль и Р.С.Макаровать пачанзон колга. Фестивалень участникне сивозь синь пара мяльса. Идень библиотекась тя пингть ётафтсь «Пачась—шить символоц» познавательно-налхксемань программа. Библиотекарьхне содафтозь шабатнень пачань пицемань койхнень и синь пидемань-панемань рецептснон мархта. Сяльде иттне примасть участия пачань темас пялькстомаса, викторинаса, содама ёфксонь сотцема, лятфтазь и валмуворкснень. Мекпяли шабатнень каванязь мокшень пачаса. Мероприятиясь тусь сембонь мяльс, сяс мес сон ётась весяласта, танцтиста и мяляфтовиста. А райононь культурань работникне анокласть оцю концерт. Программасост ульсть и рузонь, и мокшень морот. Пачань фестивальсь удалась. Райононь эряйхне и инжихне тусть куду кепотьф мяльхть. И надияфтсть самс тяка пингть кизода меле.
И.Вешкин.
Снимкаса: «Пачань ши»
фестивальть пингста.