9 августста Атерь велеса ётафтовсь «Пачань ши» республиканскяй гастрономическяй фестивальсь, коса примасть участия Атюрьевскяй, Ельниковскяй, Торбеевскяй, Сире Шайгавонь райононь артисттне. Панжезе илать Атюрьевскяй райононь культурань отделть вятиец Е.П.Надина. Сон отмечазе, што районца тячи афкукс оцю ила, кона пуроптсь лама ломань аф аньцек районть эрь-кодама уженянзон эзда, но и марнек республикаста. Шабатненди аноклафтольхть ваймама уженят, эрь-кодама выставкат, мастер-класст. Инь няевикс вастсотольхть пачатне. Эздост пидефоль-паньфоль пяк лама. Тяда инголе райононь библиотекань, культурань покодихне ётафтсть пачань пидемать коряс пялькстома. Эсонза примасть участия райононь эряйхне, велень поселенияса покодихне. Танцти мокшень пачат пидесть-панцть Н.Я.Николаева, А.И.Каштайкина, Л.А.Нестерова, Т.М.Пронина, А.П.Ерёмкина и лиятне. Васенце вастть максозь Атерь велень мокшаляти С.С.Рапинонди. Сон пидесь суронь, манкань пачат. Тись поза. Омбоце вастть занязе С.Г.Полькина, колмоцеть—Т.П.Полькина. Азфоль пачань пидемать коряс пялькстома и од семьятнень ёткса. Сяськикс лиссь Ю.И.Волгапкинать семьяц. Казнефтома кивок ашезь ляда. Фестивалень аноклайхне азсть лемозост шнамань валхт и макссть питни казнет.
Гастрономическяй фестивальти лац анокласть Атерень центральнай библиотекань покодихне. Библиотекань директорсь Н.И.Марфина отмечазе, што синь покодисна эрь кизоня примсихть участия тя фестивальса. Тяддевок тисть фотозона. Эсь работанзон лихтезень няфтемс райононь содаф шуфтста керсись, художниксь Н.Н.Шумкин. Николай Николаевич няфтсь мастер-класс. Библиотекаса покодихне Л.К.Вешкина и И.Н.Горина пуроптозь иттнень эсь перьфкаст, ётафтсть мархтост пялькстомат, налхкомат.
Цебярь выставка анокласть Идень творчествань кудонь дополнительнай образованиянь педагокне Л.П.Сунгаева, А.П.Ерёмкина, Л.И.Юдина, Т.В.Макарова, З.И.Ковышкина. Рисункань выставкаснон лемдезь Великай Сяськомать 80 кизонь топодеманцты и СВО-ти. Цебярь работат анокласть Самира Чудина, Ксенья Сурайкина, Рамиль Сюняев, Катя Мельникова, Дарья Сурайкина, Олеся Семёнова. Фестивальса преподавательхне рисовандамаса няфтсть мастер-класс.
Кодама аньцек ярхцамбяльхть, симомбяльхть ашесть анокла Атюрьевскяй райононь поселениятне. Кяшалонь, Каргоньжяень, Перевесьянь, Крхтажень поселениятне тисть мини-музей, коса няфтезь сире и тяниень пингонь мокшень щапнень-каряпнень, национальнай кухнять. Кода отмечазе Перевесье велень поселениянь оцюнясь Н.В.Степанов, фестивальти анокласть велень келеса. Аф кржа вий путсть С.В.Кабаева, Т.А.Тремасова, Т.И.Паркина, В.Н.Кабаев.
Оцяду велень поселениясь фалу лезни СВО-ти. Кодай маскировочнай сетьть, боецоньконди носокт, тии окопонь штатолхт и лама лия. Тя тевса заняф марнек велесь. Финцне лездыхть материалонь рамамаса, омбонцне кодайхть. Тя илативок анокласть выставка, коса няфтезь кода и мезьса лездыхть СВО-ти.
А площадьса кайгсть рузонь, мокшень морот, кштимат.
Лия районцта саф артистта башка морасть-кштисть Мария Алямкина, Василий Кабаев, Марина Калинкина, Ксенья Журавлёва и лиятне.
«Пачань ши» республиканскяй гастрономическяй фестивальсь удалась. И тянкса шнамань валхт азомат сонь аноклаензонды-ётафтыензонды—районнай администрацияти, культурань отделти, библиотекати.
Илья Вешкин.
Фототне авторть.