Панчфт и казнет—культурань работникненди

28 мартста Культурань республиканскяй Дворецса ётафтовсь торжественнай мероприятия, кона лемдевсь Культурань работниконь шити. МР-нь Оцюнясь Артём Здунов поздравляндазень профессиональнай иласнон мархта ся ломаттнень, конат эсь творчестваснон мархта тиендьсазь эряфоньконь сяда мялень салайкс, виияфнесазь Мордовиянь культурать и ванфнесазь национальнай койхнень-обуцятнень—артисттнень, музыканттнень, художникнень, музеень, библиотекань, театрань работникнень…
Мероприятиять панжемста Мордовиянь Оцюнясь спасибась культурань работникненди эсь прянь аф ужяльдезь покодеманкса. А меле шарфтсь мяль сянди, што республикасонк культурань сферась касонды-вииякшни. Кота кизоста «Культура» нацпроектть коряс удалась водендамс отрасляти 1,3 миллиард цалковай. Строяф и капитальнайста петьф 35 объект, нинге 38 учреждениясь одкстоптозь материально-техническяй базаснон, петневихть-тиендевихть культурань районнай и велень куттне.
Тядде ушедовсь од этап—«Культура» нацпроектть вастс тевс сувафтовсь «Семья» национальнай проектсь.
Мордовиясь маряй гордость 7 профессиональнай, 11 народнай, идень кафта образцовай театранзон, эсь лацонь фестивалензон инкса.
—Кеняртьфти, мес театратненди ушедсть сашендома семьянек—тя корхтай сянь колга, што культурнай наследияньке пачфневи од поколениятненди,—китькстазе республикань Оцюнясь.—Пяшксе залхне няфнесазь, што культурась кармай эряма!
Артём Здунов лятфтась и сянь колга, што тядде Россиянь Президентть решениянц коряс тевс нолдавсь кунара учентф «Земский работник культуры» программась.
Сай кизоня топоди 150 киза Степан Дмитриевич Эрьзянь шачема шистонза. Юбилейнай мероприятиятне ётафтовихть инь сери уровеньца, тиемок тя событиять няевиксокс Россиять культурнай эряфсонза.
Республикань руководительсь мялень салай культурнай проекттнень ёткста башка мяль шарфтсь «#КультураZаПобеду!» проектть лангс, конань эса активнай участия примсихть культурань государственнай и муниципальнай учреждениятне. Ламоцне ульсть передовойса, штоба кирдемс боецнень боевой духснон, пуропнесть патриотическяй концертт и выставкат, участвовандасть гуманитарнай грузонь кочкамаса.
«Сюкпря теенть, боецненди лезнеманкса. Цёратне-алятне фалу кармайхть мяляфтома, што минь синь колгаст ашеме юксне—теест тя пяк важна!»—мярьгсь Артём Здунов.
Мордовиянь Оцюнясь спасибась эрти, кие лемдезе эряфонц республикать культурнай наследиянц виияфнеманцты, патриотизмать кемокснеманцты, сире пингонь духовно-нравственнай питнишитнень и национальнай койхнень-обуцятнень ванфтомаснонды и вельмофтомаснонды.
Мероприятиять пингста культурань работникненди максфтольхть оцю казнет, ветераттненди—панчфт.