Старошайговскяй райононь Лемдяй велеса шачф-касф мокшавать, Мордовия Республикань культурань Заслуженнай работникть, сюреса сёрмадыть Мария Бикеевать лемоц содаф пяк ламотненди. Мария Ивановнань колга оцю мяльса пачфнетяма «Мокшень правдаса». Тяддень апрельста мокшавать ульсь юбилеец. Теенза лемтьф васедематне, творческяй пуромксне молихть тянемс.
Ётай недялять Саранскяйса, Мокшэрзянь народнай культурань музейса, панжевсь Мария Бикеевать «Нити времени: традиции мордовского костюма» лем ала персональнай юбилейнай выставкац, кона лемтьф сюреса сёрмадыть 80 кизонь топодеманцты.
Мария Ивановна—национальнай искусствань произведениянь тиемаса афкуксонь мастер. Лемдезе эсь эряфонц народнай мокшень костюпнень сюреса сёрмадомаснонды. Кда нинге кивок аф содасы, азсаськ: работанзон эса аф мутада фкакс ащи кафта узорхт, сяс мес сонь эрь панароц—тя башка история, кона азонтф тюсть и орнаментть вельде. Выставкаса фкя вастс васенцеда пуроптфт сонь работанзон оцю пялькссна.
Няфтьфт сюреса, ёмла ожнаса сёрмадыть костюмонза, платьянза, пряруцянза. Эздост пяк и пяк лама. Информационнай стенттнень и фотографиятнень вельде пачфневи Мария Бикеевать эряфонц и творчестванц колга. Ваномок работанзон лангс, ули кода содамс мокшэрзянь сюреса сёрмадомать ламоц ширензон, эсь лацонь шинц колга.
Выставкань панжемань шиня, 22 августста, Мокшэрзянь народнай культурань музейсь пяшксель ломаньда. Тяза сашендсть Мария Бикеевать раднянза, содафонза, сят, кит ёрасть няемс сонь творчестванц. Сембе якасть мокшавать сюреса сёрматф панаронзон, пряруцянзон вакска и ламос ванондозь синь.
«Нят афкуксонь шедеврат», «тя мазышись аноклави аньцек сянди, кинь тя тевонди бславазе Шкайсь», «салмоксонц эрь «аськолксоц» зрняда питни»—тяфтама и шнамань лия валхт кулевсть пуромфнень эзда.
Персональнай выставкать панжемста Мокшэрзянь народнай культурань музейса ульсь и сонць Мария Ивановна.
«Нити времени: традиции мордовского костюма» выставкать панжемстонза корхтасть и Мария Бикеевать поздравляндазь Лемдяй велень библиотекарсь Марина Босина, Мордовия Республикань Государственнай Собраниянь общественнай объединениятнень и фракционнай работать коряс отделть заведующаенц заместителец Ольга Тараскова, кона казезе Мария Ивановнань Госсобраниянь Почётнай Грамотаса, Мордовия Республикань культурань, национальнай политикань и архивнай тевонь министрть заместителец Александр Губанищев, С.Д.Эрьзянь лемса изобразительнай искусствань музейть директороц Людмила Нарбекова, Мордовскяй (мокшень и эрзянь) народть Межрегиональнай общественнай организациянц председателец Юрий Мишанин и лиятне. Лямбе валхт зрнянь кядь мастерицати азсть земляконза, конат сашендсть тя шиня Сире Шайгавста и Лемдяйста. Ётксост и Культурань районнай центрать директороц Татьяна Горшкова.
Меле корхтасть Мария Бикеевать мала ломаненза—колма поколениянь представительхне: стирец Ирина, унокоц Элина, уноконь идец Даниил.
Аф оцю концерт няфтсь «Вармава» фольклорнай ансамбльсь.
Сонць Мария Ивановна азсь сембонди оцю спасиба.
Выставкать панжемац ётась лямбе васедема лаца и мяляфтови куватьс. Ваномс сонь ули кода 22 сентябрть самс.
Татьяна Альшина.
Фототне Николай КАРАНОВОНЬ.