Панжевсь выставка

14 майста Саранскяйса, С.Д.Эрьзянь лемса изобразительнай искусствань республиканскяй музейса, панжевсь марнек мирса содаф Россиянь скульпторть и художникть Зураб Церетелинь картинань выставкац.
Справканьке: Зураб Константинович Церетели шачсь Грузиянь Тифлис ошса 1934 кизонь 4 январьста. Живописень, графикань, скульптурань, монументально-декоративнай искусствань сфераса тись 5000-да лама произведения.
Зураб Церетели—Художествань Российскяй академиянь президент, СССР-нь и Россиянь Народнай художник, Социалистическяй Трудонь Герой, Ленинскяй, СССР-нь и Россиянь Государственнай премиянь лауреат, Ленинонь орденонь и «Отечествать инголе заслуганкса» орденонь полнай кавалер.
Картинанза, скульптуранза и лия произведениянза няфневихть Россиянь и омба масторонь музейхнень эса.
«Кельгомаса виденцяма» лем ала картинань выставканц, кона лемтьф художникть 90 кизонь юбилеенцты, панжезе С.Д.Эрьзянь лемса музейть директороц, Мордовиянь Народнай художниксь Людмила Нарбекова. Эсь выступлениясонза сон макссь оцюдонга оцю оценка Зураб Церетелинь творчестванцты.
Зураб Церетелинь картинань выставканц шназь Мордовиянь Народнай художниксь, скульпторсь Николай Филатов, республикань Правительствать видеса Гуманитарнай наукань НИИ-ть директороц, историческяй наукань докторсь Галина Куршева, Мордовиянь культурань, национальнай политикань и архивнай тевонь министрть заместителец Юлия Елисеева и лия содаф ломаттне.
Выставкась кармай работама 30 июнти молемс.
Владимир иосифОВ.