«Пек вадря!» проектсь сяськсь Культурнай инициативань президентскяй фондть конкурссонза. Тя аф аньцек киножурнал. Эзонза сувсихть иттненди кастингонь и мастер-классонь ётафтомась, репетициятне, съёмкатне, журналть панжада киноняфтеманза, киношколась. Кастингса шабатне лувихть стихотвореният, проза, баснят, морайхть морот.
Эрь киношколати, а эздост колма, кочкави 25 шаба, конатнень мархта сяда тов работайхть режиссёрхт, сценаристт, видеооператорхт.
Киножурналть арьсиец и вятиец—«Мастерская социально-культурных проектов «Даридаль» автономнай аф коммерческяй организациять учредителец, режиссёрсь Мария Федотова-Орлова. Минь васедеме Мария Геннадьевнать мархта и кизефнеськ, кодама сон—идень пеетькшнемань васенце киножурналсь Мордовияса.
—Мария Геннадьевна, мезть лангс тон шарфтоть мяль киножурналть тиемста?
—Конешна, кепотьксокс киножурналоньконди арась советскяй «Ералашсь». Но минь ёраме тиемс тяфтама проект, кона улель сяда мала Мордовиянь эрь эряйти. Сяс лемовок кочкаме—«Пек вадря!» Тейне-арам, ня валхнень шарьхкодьсазь русневок.
2010 кизоти молемс «Ералашсь» нолясь кизоти 6 выпускт, 18 серия. 2010 кизоста сявомок синь тиендихть кизоти аньцек 10 серият. А тейнек проектть аделавомс, тяддень июнти самс, эряви нолдамс 54 серия. Сяс работатама апак лотксек. Тяниень пингс снимандафт и нолдафт 9 выпускт. Сериятне лисендихть Мордовиянь Народнай телевиденияса, а стане жа интернетса—«АНО «Даридаль» страницасонк ВКонтакте соцсетьса.
—Лама сериянди эряви сатомшка актёр. Кода синь кочксесасть?
—Киножурналсь идень, сяс актёрхнень оцюшкасна, конешна, шабат. Минь ётафнетяма кастинкт, коса ванцаськ, кие ладяй киножурналти. Актёрхнень кочксесаськ возрастс коре колма категориява. Васендакиге ётафтоськ сёксень киношколать, конань эса примасть участия 7-10 кизоса шабат. Тяниень пингть моли тялонь киношколась 11-14 кизоса шабатнень мархта, а тундань школаса кармайхть примама участия оцю класса тонафнихне—15-17 кизоса од ломатть.
Съёмкас стане жа тернетяма профессиональнай артистт рузонь и национальнай драматическяй театратнень эзда.
Улихть кафта преподавателеньке-режиссёроньке. Нят: Рузонь драматическяй театрань артистсь Владимир Буралкин и Гелена Юсупова, конань мархта минь марса тонафнеме МХАТ-ик театраса-студияса. Синь, васендакиге, ётафнихть вводнай мастер-класс, штоба шабатне марялезь пряснон сяда тёждяста и шарьхкоделезь, мезе эздост вештяма. Сяльде тяштеви сценарийсь. Сонь лангсонза работайхть колма сценаристт: Владимир Липилин, Владимир Буралкин и филфаконь студенткась Анастасия Киреева. Режиссурать, выпускнень путомаснон лангса работан монць.
—Коса ётафневихть съёмкатне?
—выпускнень анокламста съёмкань ётафнема вастть лангс минь шарфнетяма оцю мяль. Ёратама няфтемс киножурналсонк Саранскяйть, ломаттненди кельговикс и содавикс вастонзон. Ваныхне пяк кенярдихть, мзярда няйсазь аф аньцек васттнень, но и ломаттнень, конатнень мархта, кепотьксонди, тонафнихть фкя школаса.
Фкя серияньке лемтьф А.С.Пушкинонди. Тевсь мольфтеви паркть видеса ащи памятниконц маласа. Стирнятне арьсихть, кле, кда улихть поэтти лемтьф памятник, библиотека и парк, эста, улема, Саранскяйса эрясь великай классиксь. И тя пингть вакскаст ётай В.И.Ленин. Стирнятне абондыхть. Тяса няфтеськ и памятникть, и кельгома ульцяньконь. Улема, тя монь кельгома сериязе.
Тяфта жа ули видеоньке, кона снимандаф троллейбусса. Сонь тейнек фкя шис максозе Горэлектротранссь. 6 частт актёрхнень мархта арнеме Саранск ошть юго-западнай пялькссонза. Главнай рольса ульсь Мордовия Республикань Народнай артисткась, мокшавась М.П.Плотникова.
—Мезе отвечсихть Заслуженнай и Народнай артисттне, мзярда тернесасть съёмкас эсь проектозонт?
—Сембе оцю мяль вельде согласиндакшнихть. Вестевок ашель, штоба кивок атказаль. Синь тонадсть налхкома сцена лангса, киножурналсь теест—од форма.
—Стака-аф работамс иттнень мархта?
—Сембе шабатне аф фкя лацоннет. Кой-конатнень мархта тият фкя дубль, синь сизихть, кле, саты, тяфтавок семботь лац тиеськ. А кой-конатнень пяк оцю работамшкасна: ветень, кафксонь частт покодихть. Тисазь сянь, мезть вешсы эздост режиссёрсь.
—Киножурналть лемоц—«Пек вадря!»—эрзянь. Улихть серият национальнай кяльса?
—Ашеме путне эстейнек тяфтама вешфкс, штоба сериятнень эса кайгольхть мокшень и эрзянь кяльхне. Улихть фольклоронь, щамонь кодама-бди элементт. Ули серияньке, коса няфтеви Вирявать образоц. «Перевоспитание» выпускса бабась тонафтсы уноконц шумбракснемс тядянзон-алянзон мархта эсь шачема кяльсонза. А «Подготовились» серияса иттненди сашенды сказительницать Серафима Люлякинать ваймоц и корхтай мархтост эрзякс. Минь ня сериятненди рузонь субтитратка ашеме тиенде. Арьсян, смузсь шарьхкодеви ётафтомафтома.
—Ули-аш мяленте поладомс тя проектть?
—Да, конешна. Проектсь мялень салай. Ошсонк тяда инголе ашель мезевок мала теенза. Пяк оцю мяль тянь лангс шарфтыхть тядятне-алятне. Кастингта меле нинге ковшка сашендыхть тейне интернетса видеовизитка мархта сёрмат, кле, сявость минь шабаньконь съёмкас.
—А тяниень пингть ули кода повомс шабатненди киножурналозонт?
—Штоба повомс актёрскяй составти, эряви ётамс регистрация, кучемс видеовизитка, самс кастингс. Васенцеть, инь ёмла шаба мархта киношколать, шумордаськ ни, омбоце киношколати, кона мольфтеви тяниень пингть, шабатне кочкафт ни. Лядонды колмоцесь, 15-17 кизонь од ломаттнень мархта. Кастингть ётафтсаськ мартть ушетксста. Тернесаськ сембонь, кинь ули мялец варжамс эсь прянц «Пек вадря!» идень пеетькшнемань киножурналса!
О.Белкина.