Аф кунара Атюрьевскяй райононь Пичепулоня вели пачкодсь кеняртьфти куля. Валентина Миркинати Мордовия Республикань Оцюнять Артём Здуновонь Указонц мархта максф «Мордовия Республикань Заслуженнай артист» почётнай лем. Сонь седи ваксста поздравляндазь родной коллективсонза—«Торама» ансамбльса. И тя оцю казнесь аф васенцесь Валентина Никифоровнань эряфса. Сон сидеста уленди специальнай военнай операциянь ётафтома васттнень эса. Марса ансамблень лия участникнень мархта кеняртьфнесыне боецнень цебярь мороса. Тянкса тяддень 18 февральста РФ-нь Оборонань министерствась казезе «За помощь и милосердие» медальса. Благодарственнай сёрма лемозонза кучсь Россиянь Геройсь, «Днепр» группировкань войскань командующайсь М.Теплинский. Валентина Миркинась казьф лама Почётнай грамотаса. Сон боевой действиянь ветеран. А эсь творческяй кинц Валентина Никифоровна ушеткшнезе Атерень Культурань кудса.
Атюрьевскяй районцта лиссь лама содаф ломань. Аф кржа синь эздост и Пичепулоняса. Но Мордовия Республикань Заслуженнай артист почётнай лемонь каннихть Валентина Миркинада башка аф велеса, аф районца аш.
Валентина Миркинать артисткань асувоц приметафоль нинге школаса тонафнемстонза. Сонь сявонделезь районца ётафневи илатненди, концерттненди морама. А мзяра пялькстомаса примась участия, афи лувови. И фалу занцезень васенце васттнень.
Мазы вайгяльсь ётась Валентинати тядянц, Л.С.Мустайкинать, эзда. Мокшавась морси «Пиченя» фольклорнай ансамбльса. Пяк кельгсыне мокшень койхнень-обуцятнень, щапнень. Сонцьке стай коняфкст, няфни стамань тевса мастер-класст райононь и республикань оцю илатнень пингста. Тянкса казьф Дипломса, Грамотаса.
Валентина Миркинать аляц, Никифор Киреевич, пяк лац морай гармонияса. Кургса морамасовок сафтсы.
Мордовия Республикань Заслуженнай артисткась Валентина Миркина шачсь и кассь трудонь кельги оцю семьяса. Тядяц, Лидия Сергеевна, сембе эсь эряфонц лемдезе велень хозяйствань тефненди. Трудендакшнесь дояркакс «Партизанский» совхозса. Сонь сёлгомдонза меле потьнесь тракст Чудинка, Вольно-Никольск, Перевесье, Каргоньжяй велень хозяйстватнень эса. Цебярьста покодеманкса, лама лофцонь потяманкса казьф Мордовия Республикань Велень хозяйствань министерствать, Правительствать, Государственнай Собраниять Почётнай грамотаснон мархтта. Васенце мирдец, Василий Михайлович, тусь эряфста 39 кизоса. Кадозе Лидия Сергеевнань удавакс ниле идь мархта. Пингонь ётазь од мокшавась лиссь рьвакс Никифор Киреевиченди. Шачфтсь нинге кафта итть: Викторонь и Валентинать. Тяни Лидия Сергеевна кота идень тядя, баба и щава. Касыхть кафкса уноконза, конатнень инкса маряй оцю гордость. Валентина Миркинась стирнянц мархта сидеста уленди тядянь-алянь кудса. Велеряйхне кельгсазь сонь, шнафтыхть мархтонза пря.
—Валентина кассь кулхцонды стирнякс,—корхтай Лидия Сергеевна.—Пирьфоньке фалу пяшксель жуватада. Ульсть тишень анокламат, стадань ваномат, перень путомат-таргамат. И костовок стирнязе ашезь лядонда, фалу лезнесь. И тянивок, кда эвондай ётка пингоц, эряскоды куду, Пичепулоняв, коса кельгсазь и фалу учендсазь.
Илья Вешкин.