Атерь велень «Радуга» идень саду якай 73 шаба. Синь мархтост работайхть кафкса педагогическяй работникт. Трудонь кельги коллективть вятьсы тевонь содай, козя опыт мархта мокшавась М.В.Ташкаева.
Кода азозе козя опыт мархта воспитательсь С.М.Арекаева, «Радугаса» национальнайти шарфневи башка мяль. Шабатне эрь илати кеняртькшнихть. Кепотьксонди, аф кунара идень садса ульсь оцю ила, кона лемтьфоль Мордовиянь автономиять 95 кизонь топодеманцты. Шабатненди азондсть Атерть, районть, мокшэрзянь крайть колга. Воспитательхне сявондезь иттнень экскурсияс райцентрань содаф васттнень эзга, ульсть Славань аллеяса, лувсть стихт, морасть морот, путсть сценкат, кштисть.
Идень садса ули краеведческяй уженя. Иттненди эряви содамс, кода эрясть атянь-атясна, бабань-бабасна, кодаптольхть кудботмосна, кодама жуватат кирнесть, мезе касфнесть пересост, мезьда ярхцсесть. Тя сембось няфтеви сире пингонь щапнень-каряпнень, бытонь предметтнень вельде. Мокшень щамса-карямса иднятне наряжакшнесть и «Монь шачема велезе Атерсь», «Мокшетнень эряфсна-ащефсна, койсна-обуцясна» и лия илатнень пингста. Эрь группаса улихть патриотическяй воспитаниянь темати лемтьф стентт. Воспитательхне шабатненди фалу азонкшнихть «Бессмертнай полкть», Великай Отечественнай войнать и сонь героензон колга.
Идень садса башка мяль шарфтови СВО-ти. Иттне тядяснон-аляснон, воспитательснон лезксснон вельде кучсихть СВО-нь участникненди сёрмат, рисункат, тиендихть налхкшкат. Воспитательхне и родительхне кочксихть и прважсихть боецоньконди посылкат, котцихть и прважсихть маскировочнай сетьть, тиендихть окопонь штатолхт. Иттне и идень садса покодихне васьфнихть СВО-нь участникнень мархта. Аф кунара «Радугаса» ульсь Шамиль Агишев. Сон сашендсь отпускс.
Идень садса ульсь и СВО-нь участникть Пётр Арекаевонь аляц, Виктор Фёдорович. Сон азондсь эсь цёранц колга: кода эсь пингстонза якась идень саду, школав, кода тусь СВО-в, сашендсь отпускс. Пётр Арекаев—идень садонь воспитательть С.М.Арекаевать ученикоц. Светлана Михайловна лятфнезе, што Пётр лац тонафнесь школаса, ульсь кепотьксокс ялганзонды, киндивок ашезь атказакшне лездомс, ульсь кулхцонды цёранякс, ару ваймокс, панжада седикс. Шабатне лувсть СВО-ти лемтьф стихт, морасть морот, кштисть, щакшнесть военнай щапт, конатнень стафнесазь родительсна.
Иттне, воспитательхне, тядятне-алятне васьфнихть священникнень мархта. «Радуга» идень садса сидеста уленди Оцяду велень храмонь настоятельсь Н.В.Ерёмкин. Отец Николай пачфнесы шабатненди Шкаень валть.
Кода азозе идень садонь заведующайсь М.В.Ташкаева, коллективса эряйхть кода фкя семьяса. Тяса кеме дисциплинась, ялгаксшись. Сембе старандайхть совестьс коре тиендемс эсь тевснон. Аш стама ши, штоба идень садса афоль уле кодамовок ила, спортивнай пялькстома. Арась цебярь койкс ётафнемс шумбрашинь шит, семьянь илат. Шнамань валхт савсь кулемс С.М.Арекаевать, А.И.Рыськинать, С.В.Адышкинать, Н.М.Вешкинать и лиятнень колга.
Эрь воспитательть козя работань опытоц. Кепотьксонди, С.М.Арекаевать педагогическяй стажец 35 лама киза. Сон трудендась начальнай классонь учителькс Дмитриево-Усадонь школаса. А.И.Рыськина покотькшнесь Од Кярьгань, Колапонанянь, Оцядувонь школатнень эса. Ульсь школань директоркс. А тяни кочкаф опытонц, содамошинзон макссесыне «Радуга» идень садса.
Аф лама пингонь ётазь отмечасаськ Великай Сяськомать 80 кизонь топодеманц. Тя оцю илати кунара ни мольфтеви анокламась «Радуга» идень садса. Шабатне, синь воспитательсна примайхть участия военно-патриотическяй илатнень эса, аноклайхть морот, стихт, кштимат.
Илья петров.