Региононь Минкультонь делегациясь ульсь Каланчакса

1 июльста Мордовиянь Оцюнясь Артём Здунов васетькшнесь региононь Культурань, национальнай политикань и архивнай тевонь министерствань делегациять участниконзон мархта, конат ётай недялять «Автопоезд культуры» культурно-просветительскяй проектть рамкаса ульсть Херсонскяй областень Каланчакскяй округса. Делегацияти сувсесть Минкультонь сотрудникт, артистт, музейнай и библиотечнай тевонь специалистт.
Лятфтасаськ, февраль ковть песта Каланчакскяй округста делегациясь ульсь Мордовияса. Республикань и округонь культурань учреждениятнень ёткса кемокстафоль марстонь тевонь вятемать колга кой-мзяра соглашения.
Мордовиянь Оцюнясь китькстазе: региононьконь мархта тяфтама сотрудничендамась пяк важнай подшефнай округонь эряйхненди.
Министрсь Светлана Баулина азозе, што Мордовиянь делегациясь примафоль лямбоста. «Тейнек нажятькшнесть Каланчаконь эряйхне, азонкшнезь мяльснон-арьсемаснон—Мордовиясь арась теест пяк малакс».
Округса улемстост артистоньке макссть колма концертт—сембе синь ётасть аншлаг мархта.
Каланчакскяй округонь Культурань велень куттнень и библиотекатнень сотрудникснонды ётафтсть тонафты семинархт «Семья» нацпроектть рамкаса, Пушкинскяй картать мархта работать, проекттнень и гранттнень эса участиять коряс.
Каланчакса аф кунара панчфоль краеведческяй музей, и тяни сави марса работамс экспозициянзон и фондонзон пяшкодемаснон коряс.
Тяда башка, республикань культурань учреждениятне #КультураZaПобеду проектть рамкаса кочкасть коллегаснонды лезкс—книгат, канцелярскяй паршихть, налхкшт, ноутбук, концертнай костюпт и лама мезе лия. Мордовиянь Художниконь союзсь прважазень Каланчаку од живописецнень работаснон.
Стане жа ня шитнень артистоньке васетькшнесть боецнень мархта. Военнослужащайхненди концертть ётафтозь Мордовиянь творческяй коллектифне и фкя полкса служай ялгасна.
«Торама» фольклорнай ансамбльть директороц Андрей Николаев азозе, што коллективсь макссь ни 50 концерт СВО-нь зонаса.
Азсаськ стане жа, што Мордовияв пара койс коре кизонь пингть ваймосема састь шабат Каланчакскяй округста. Светлана Баулина азсь мяль тердемс Каланчаконь делегациять «Минь марсотама» национальнай культурань од ломанень Всероссийскяй фестивальс, кона ётафтови августста. Артём Здунов тя инициативать ширенц кирдезе.