3 и 4 февральста Мокшэрзянь национальнай драматическяй театрась кеняртьфтезень ваныензон премьераса. «Роштовань тамашат»—тяфта лемдеви Николай Гоголень «Рождественские истории» произведениянзон коряс путф спектакльсь. Кода азозе театрать директороц Светлана Дорогайкина, васенда ёрасть сявомс аньцек «Ночь перед Рождеством» повестть, но сяльде постановкати сувафтозь нинге «Майская ночь, или Утопленница» историять. Сяс спектакльсь ащи кафта актста, коза сувасть рузонь содаф классикть кафта произведениянза.
«Роштовань тамашатнень» путозь режиссёрсь Ольга Парфёнова (Санкт-Петербург ошсь), сценографиять и костюпнень коряс художниксь Ксения Сорокина (Моску ошсь), пластикать коряс режиссёрсь Алексей Жандаров (Самара ошсь), композиторсь Александра Костырёва (Самара ошсь). Эряви азомс, Саранскяень ваныти синь содафт ни.
Н.В.Гоголень повестензон коряс путф постановкась салай мяль техническяй ширде. Кепотьксонди, шяйтанць кепси сценать вельхксс лиендемань устройства вельде, лия артисттнень шашфнесыне вастста вастс радиоуправляемай фуркась, улихть техническяй и лия эффектт, конат лездыхть няфтемс ваныти Гоголень мистическяй масторонц.
«Стакаль-аф эрзянь кяльса няфтемс украинскяй мотифнень?» кизефксть лангс Ольга Парфёнова отвечась вов кода: «Тейне Николай Гоголь—великай писатель. А эрь произведениять питнишиц сянь эса, што ули кода кадомс шири вастть и пингть. Эста ляды аньцек ломанць эсь прябаланзон, мялензон-арьсеманзон мархта. Аф кяшсаськ произведениять культуранц, а сотсаськ сонь мокшэрзяннеть мархта. Тейне-арам, минь тя лиссь тёждяста и шарьхкодевиста».
Режиссёрсь виденцясь, што эряфсонза васенцеда путы спектакль аф содаф теенза кяльса. Но оцю перяфксокс тя ашезь ара, вдь постановкать эса васенце вастса—потмоёжесь, а сяльде—валсь.
Афкукс, «Роштовань тамашат» спектакльса кемоста сотовсть фкя-фкянь мархта мокшэрзянь и украинскяй мотифне. Тя няеви и щапнень, и мазоптомбяльхнень, и моротнень коряс. Ванысь пови вень ёфксс, коса азорондайхть цебярь и кальдяв вийхне, коса шяйтанць лезды Вакулати ётамс стакашитнень кельгоманц сатоманкса. Инголенк келемихть украинскяй аф оцю хуторсь, коса эряйхть эсь лацонь характер мархта геройхть, и тяштю, но ковфтома менельсь. И конашкава стака тя веса мумс и аф эрьфтемс кельгома ломанцень! Кивок, мянь сонць Гоголь, аф содасы, коза повихть персонаженза. Спектакльть ваномста ули кода и топодемс рахамс, и арьсезевомс эряфонь ламоц кизефкснень лангса.
Оксана Белкина.