Январсь козя иласа, конатнень эзда фкясь—Христость Шачемац (Роштувась). Тя шиня ламотне фкя-фкянди тиендихть казнет, азондыхть седиста моли пара и лямбе валхт.
Роштувань казнекс Ковылкинскяй райононь Рузонь Лашма велень эряйхненди арась Российскяй Федерациянь Президентть видеса Мордовия Республикать Постояннай представительстванц видеса «Азорава» фольклорнай ансамбльть солистканц, Ковылкинскяй землячествать руководителенц, мокшавать Е.А.Помозовать (Алямкинать) сольнай васенце концертоц, кона каннесь «Роштувань тяште» лем.
7 январьста Рузонь Лашмань клубу ломаттне пуромкшнесть «цёфксть» кулхцондома. Елена Анатольевнань лемоц содаф кода Ковылкинскяй районца, стане и Москувонь и Московскяй областень мокшетнень и эрзятнень ёткса. Ламотне шарфтсть мяль сянь лангс, што сольнай васенце концертоц ульсь мокшэрзянь масторса.
Пуроптомс сонь лездсть Рузонь Лашма велень Крестовоздвиженскяй церькавть настоятелец отец Роман Мамедов и клубонь артисттне.
«Роштувань тяште» концертть пингста Е.А.Помозова (Алямкина) морась аф кржа мора. Мокшень кой-кона моротнень валснон авторсна—аляц, Ковылкинскяй музейть директороц Анатолий Иванович Алямкин.
Концертсь ётась фкя ваймоса. Пингстонза аф кржаль лятфнемада, конат эждезь ломаттнень ваймоснон.
Тяса ульсь и А.И.Алямкин, кона поздравляндазень сембонь Роштувать мархта.
Рузонь Лашмань эряйхне надияйхть, што Алямкиттнень семьяснон мархта кеме соткст кармайхть кирдевома и сяда тов.
«Роштувань тяште» концертсь лац няфтезе Елена Анатольевнань афкуксонь профессионалкс улеманц, творческяй асувонц и маштомошинц.
Т.АЛЬШИНА.