Российскяй военно-историческяй обществать Мордовскяй региональнай отделениянц председателец, историческяй наукань докторсь, профессорсь Галина Куршева: «Иденьке эрявихть касфтомс Отечествати кельгомать вельде»

—Галина Александровна, тячи, мзярда марстонь Западсь сембе вийса тяряфни уцезгофтомс Великай Сяськомать питненц, кодама работа тянь каршес вяти Российскяй военно-историческяй обществать Мордовскяй региональнай отделенияц?
—Мордовскяй региональнай отделениясь фалу вяти оцю работа историяньконь и, конешна, Великай Отечественнай войнаса сатф Сяськомать кяльготнемаснон каршес.
Патриотическяй работась, конань минь вятьсаськ од ломаттнень ёткса, тяфта жа сотневи Великай Отечественнай войнать и Великай Сяськомать историяснон мархта.
Тядде Саранскяйса и республикань муниципальнай райоттнень эса Великай Отечественнай войнань участникнень и Советскяй Союзонь Геройхнень лемс путоме Мялямонь 15 доска.
Тяда башка, стяфтови «Сурский рубеж» памятник, кона лемтьф Сурскяй оборонительнай рубежень строительхненди. Памятникса няфтевихть строительхнень афкуксонь шамаликсна.
15 апрельста Мордовияв сашендсь Российскяй военно-историческяй обществать председателенц заместителенц Николай Овсиенконь председательстванц ала делегация. Эсонза тяфта жа ульсь скульпторонь и дизайнеронь группа, кона работай Сурскяй рубежень строительхненди памятникть тиеманц-путоманц лангса. Ётафтовсь совещания, коса ванфтольхть сонь стяфтоманц коряс сембе кизефксне.
—Арьсян, Сурскяй рубежень строительхненди памятникть панжевомдонза меле тяза кармайхть сашендома экскурсияс од и эряфкшу ломатть аф аньцек республикастонк, но и странань лия региоттнень эздовок.
—Сурскяй рубежень строительхненди памятниксь арай странань тяниень пингонь од и эряфкшу ломаттненди историческяй стама вастокс, коса синь сяда крхкаста шарьхкодьсазь, кода эряви служамс эсь Отечествати!
Тянь ули кода азомс сяс, мес тяниень пингть ни странань ламоц региоттнень эзда, коса кульсть Сурскяй рубежень строительхненди памятникть путоманц колга, тейнек ушедсть сашендома сёрмат. Эсост ломаттне кизефнихть, мзярда ули кода самс и няемс памятникть эсь сельмоса. Сон сувафты няевикс путкс патриотическяй работати, конань тячи вятьсазь Российскяй военно-историческяй обществась и сонь региональнай отделениянза.
Тяда башка, Мордовияса и странань лия региоттнень эса работать виияфтсы «Мокшэрзянь крайть историянц и культуранц коряс материалонь свод» лем ала книгась, кона тядде лиси «Сурский рубеж» серияса.
Тяфта жа военно-историческяй обществать Мордовскяй региональнай отделенияц ёрай 1 июльста ётафтомс Саранскяйса Всероссийскяй научнай конференция, кона лемдеви Васенце Мировой войнань Геройхненди.
—Галина Александровна, кода историк и общественнай деятель, мезе азат Великай Сяськомать колга?
—Тячи, мзярда нацизмась одукс кеподезе прянц, тейнек марстонь вийса сон сяськома. Тянь сатоманкса эряви сембе вийса лездомс Россиянь армияти сембоса, мезсь тейнек вийс коре.
Европань и марстонь Западонь лия странатне кальдявста тонафнезь историять. Странасонк историянь книгатне сёрматфт народоньконь и государстваньконь национальнай интересснон ванфтоманкса.
Иденьке эрявихть касфтомс Отечествати кельгомать вельде. Эста синь арайхть эсь Родинань афкуксонь патриотокс!
Владимир НЕСТЕРОВ.