Татарстан Республикань Лениногорскяй райононь Мордовскяй Кармалка велеса 20 июньцта 22-цеда ни ётафтовсь «Балтай» мокшэрзянь национальнай культурань шись. Пингстонза мокшэрзянь кунардонь пингонь моронь и кштимань культурань илас сафненди няфтезь Татарстан Республикань и Самарскяй областень 19 творческяй коллективсь эсь маштомошиснон.
Кода пачфтезе тейнек Татарстан Республикань мокшэрзянь национально-культурнай автономиять председателец Наталья Сабитова, Балтай илась—тя мокшэрзянь народонь кунардонь пингонь языческяй праздник. Пингстонза ломаттне озонкшнесть вирень азорти—офтти. Илась фалу ётафневи июнь ковть ушетксста, Тройцяда меле, мзярда аделсевихть паксянь видемань тефне.
Тядде «Балтай» илась лемтьфоль Россиянь народонь культурати. Илас пуромфнень лямбоста поздравляндазь Лениногорскяй райононь оцюнясь Рягат Хусаинов и Татарстанонь Президентть внутренняй политикань кизефкснень коряс Управлениянц главнай советникоц Мария Иванова.
Сяльде илас пуромфне варжазь мокшэрзянь национальнай танцти ярхцамбяльхнень, ванозь национальнай промыслань и ремеслань изделиянь выставкатнень, тонафнесть котф ланга сюреса сёрмадома, мокшэрзянь национальнай някань, шуфтста шаванянь керсема-тиема.
«Балтай» илась аделавсь оцю хороводса, конань пингста илас пуромфне морасть мокшэрзянь кунардонь пингонь морот и арьсесть фкя-фкянди кеме шумбраши и паваз!
Саратовскяй областьса…
Кода пачфтезе тейнек Саратовскяй областень «Ялгат» мокшэрзянь национальнай культурань центрать председателец Валентина Кривошеева, тядде центрань активсь областьса ётафтсь аф кржа ни мероприятия мокшэрзянь культурать и кяльхнень ванфтоманкса-виияфтоманкса. И, тяда башка, «Ялгат» центрась эрьгавста мольфти странань лия региоттнень эса эряй мокшэрзятнень мархта сембе ширдень сотксонь кемокстамань тефт.
Кепотьксонди, тяддень 18 июньцта «Ялгат» центрань активсь работась Пензенскяй областень Даньшино велеса «ДаншиноFest» V Всероссийскяй историко-культурнай фестивальса. Тоса примась участия «Лисьмоня» мокшэрзянь моронь коллективсь, кона Всероссийскяй фестивальса лац няфтезе пуромфненди мокшэрзянь моротнень и кштиматнень мазышиснон.
Тяда башка, «Ялгат» центрань активсь 27 июньцта Саранскяйса работась «Морай шуфта» шуфтста лаксиень Межрегиональнай фестивальса и арьсекшни няфтемс мокшэрзянь национальнай культурать мазышинц «Сабантуй» сокань Всероссийскяй праздникса и «Волгась—ялгаксшинь ляй» Международнай этнокультурнай экспедицияса-фестивальса!
В.иосифов.