—Елена Николаевна, койсот, кода ётась «Волгась—ялгаксшинь ляй. Волжскяй нароттнень культурань диалогсна» Международнай этнокультурнай XXIII-це экспедициясь-фестивальсь? И кодама работа тон ётафтоть?
—Этнокультурнай Международнай XXIII-це экспедициять-фестивальть пингста участникне ётафтсть дискуссият, семинархт, экскурсият, проектонь презентацият и лия мероприятият, конат кемокснесазь-виияфнесазь межнациональнай, межкультурнай, межрелигиознай и лия лама ширдень соткснень Россиянь лама национальностень народть ёткса. Экспедицияса-фестивальса тиф работась лезды тейнек, мокшэрзятненди, цебярьгофтомс мокшень и эрзянь кяльхнень тонафнемаснон Мордовиянь школатнень и вуснень, а тяфта жа странань лия региононь школатнень эса, коса компактнайста эряйхть мокшет и эрзят. И, конешна, ётафтф работась лезды тейнек кеподемс од серьс национальнай культурать кода Мордовияса, стане и Россиянь лия региоттнень эса, коса компактнайста эряйхть мокшэрзянь народть представителенза.
Улемок тя экспедицияса-фестивальса ётафтонь «Проектнай тевонь инь цебярь практикатне: ванфнемок койхнень—тихтяма сай пингть эса» лем ала мастер-класс. Пингстонза мон аф аньцек азондонь, но и няфтень мокшень и эрзянь кялень учительхненди, культурань, образованиянь, мокшэрзянь национально-культурнай автономиянь руководительхненди, кода сёрмадомат проекттне, конатнень вельде ули кода сатомс Культурань инициативань Президентскяй фондса грант.
Надиян, проектнай тевонь вятемать коряс мастер-классь лезды теест сатомс грантт.
—Тядде кодама нинге лия мероприятияса савсь тейть работамс?
—Тяфтама мероприятияда ульсь сатомшка лама. Кепотьксонди, тяддень 29 мартста «Знание» Российскяй обществать мархта ётафтоме Мордовия Республикань Росгвардиянь сотрудникнень мархта васедема. Пингстонза корхтамась мольфтевсь патриотизмать и духовностть обществасонк ванфтомаснон-касфтомаснон, народоньконь и странаньконь араламаснон колга. Росгвардиянь сотрудникне кулхцондозь «Россиясь кода духовно-нравственнай питнишинь ванфты» лем ала лекциять.
Тяддень 5 апрельста работань «Россиянь и Белоруссиянь нароттнень культураснон ёткса диалог» Международнай II научно-практическяй конференцияса, кона очно-заочнай форматса ётафтовсь Ичалковскяй педагогическяй колледжса. Тя форумть марстонь вийса аноклазь «Россиянь народонь Ассамблея» Общероссийскяй общественно-государственнай организациясь, сонь Мордовскяй региональнай отделенияц и Мордовиянь Образованиянь министерствась.
Международнай форумса работась Россиянь и Белоруссиянь 650 учёнай, культуролог, государственнай и общественнай организациянь представитель. Сонь теманц коряс доклатт тисть Россиянь народонь Ассамблеять генеральнай директоронц заместителец Назирисон Абдуганиев, «Педагог 13.ru» государственнай учреждениянь ректорсь, педагогическяй наукань кандидатсь Татьяна Самсонова, Мордовиянь Образованиянь министерствань отделонь начальниксь Елена Куршева и лиятне. Мон корхтафтыне нароттнень ёткса межнациональнай соткснень кемокстамаснон эрявиксшиснон.
6-7 июньцта Москуса Российскяй Федерациянь Общественнай палатаса ётафтовсь «Этнокультурнай секторть вииста касомац» Общероссийскяй V конференциясь. Пингстонза странань государственнай властень и общественнай организациянь представительхне, конат покодихть межнациональнай сотксонь ладямань-кемокстамань сфераса, ванозь инь цебярь проекттнень, конатнень аноклазь Всероссийскяй конкурсса сяськихне. Экспертизада меле синь нолдавихть тевс Россиянь межнациональнай, межкультурнай и межрелигиознай сфераса.
Маластонь мероприятиятне, коса мон карман работама, тяфта жа эрявикст и республикати, и странати. Нят—«Шумбрат» Всероссийскяй национальнай илась, кона ётафтови август ковста Старошайговскяй райононь Сире Теризморга велеса, и Мордовскяй (мокшень и эрзянь) народть Межрегиональнай общественнай организациянц VIII-це Всероссийскяй съездоц. Сон ётафтови сёксенда Мордовиять столицаса.
—Елена Николаевна, кода арьсят, кодама кизефкст эрявихть ваномс, корхтафтомс Межрегиональнай организациять Всероссийскяй съездсонза?
—Койсон, съездса эрявихть ваномс мокшень и эрзянь кяльхнень ванфтомаснон, виияфтомаснон, а тяфта жа республикань вуснень эса тонафнемаснон коряс кизефксне. А нинге—национальнай культурань, промыслань и ремеслань ванфтомань и виияфтомань кизефксне.
Тейнек тячи инь эрявикст мокшень и эрзянь кяльхнень ванфтомаснон и тонафнемаснон коряс кизефксне. Сяс мес, мзярс кармайхть кайгома мокшень и эрзянь кяльхне, снярс кармай эряма мокшэрзянь народсь!
Владимир НЕСТЕРОВ.