Россиянь народонь Ассамблеять Мордовскяй региональнай отделениянц председателец, Н.П.Огарёвонь лемса госуниверситетонь Финно-угорскяй культурань Научно-исследовательскяй лабораториянь заведующайсь, философскяй наукань кандидатсь Е.Н.Ломшина: «ПРОЕКТОНЬКОНЬ ОЦЮ ПУТКССНА И РЕСПУБЛИКАТИ, И СТРАНАТИ»

«Россиянь народонь Ассамблея» Общероссийскяй общественнай организациясь тиф-пуроптф Российскяй Федерациянь государственнай национальнай политикань Концепциять вешфксонзон коряс 1993 кизонь 8 июльста. Ся пингста сявомок Ассамблеясь, коза сувси Россиянь 160 лама народонь представитель, российскяй нациянь нароттнень ёткса национальнай, культурнай, религиознай и лия сембе ширдень сотксонь ладяманкса ётафни эряфс лама аф фкя лацонь мероприятия и проект.
Тяда башка, Россиянь народонь Ассамблеясь, конань региональнай отделениянза тячи работайхть странань эрь субъектса патриотизмань койхнень виияфтоманкса и российскяй государственностть кемокстаманкса, вяти оцю работа тяниень пингонь од ломаттнень мархта.
Российскяй Федерациянь Президентть В.В.Путинонь «Россиянь народонь Ассамблеясь» Общероссийскяй общественно-государственнай организациянь тиемать колга» Указса, конань сон кемокстазе 2020 кизонь 13 ноябрьста, Ассамблеяти максф государственнай статус. Российскяй Федерациять лемста «Россиянь народонь Ассамблея» Общероссийскяй общественно-государственнай организацияти учредителькс арась национальносттнень тевснон коряс Федеральнай агентствась.
Россиянь народонь Ассамблеянь тефнень федеральнай уровеньца тячи вятьсыне Ассамблеянь почётнай председательсь, Каспийскяй государстватнень мархта гуманитарнай и экономическяй сотрудничествань кизефкснень коряс Российскяй Федерациянь Президентть специальнай представителец, философскяй наукань докторсь Р.Г.Абдулатипов, Ассамблеянь Советть председателец, Российскяй Федерациянь Президентть видеса межнациональнай отношениятнень коряс советонь членць, политическяй наукань докторсь С.К.Смирнова и лия содаф государственно-общественнай деятельхне.
Мордовия Республикаса «Россиянь народонь Ассамблея» Общероссийскяй общественно-государственнай организациянь тефнень вятьсыне сонь Мордовскяй региональнай отделениянц председателец, Н.П.Огарёвонь лемса госуниверситетонь Финно-угорскяй культурань Научно-исследовательскяй лабораториять заведующаец, философскяй наукань кандидатсь Е.Н.Ломшина.

—Елена Николаевна, кодама инь няевикс проектт тядде ётафты эряфс Россиянь народонь Ассамблеять Мордовскяй региональнай отделенияц?
—Васендакиге азолине, тяддень 8 июльста топодсь 24 киза ни ся пингста, мзярда Россиянь народонь Ассамблеясь ушедсь кемокстама странань лама национальностень народть ёткса национальнай, культурнай, религиознай и лия лама ширдень соткснень. И кода няфнесы тячиень эряфсь, российскяй нациянь нароттнень ёткса сембе ня сотксне няевиста кемокстасть.
Койсон, марстонь тя цебярьдонга цебярь сатфксса сатомшка няевикс вастса тяфта жа ащи Россиянь народонь Ассамблеять Мордовскяй региональнай отделениянцка путксоц!
Культурнай инициативань Президентонь фондть лезксонц вельде Ассамблеять Мордовскяй региональнай отделенияц республикаса ётафнесы эряфс «Ванфтомок койхнень—тисаськ сай пингть!» культурно-историческяй проектть. Проектть коряс, Мордовиянь нароттнень культурнай уликсснон-наследияснон ванфтоманкса, минь тиенттяма синь колгаст видеофильмат, конат сувайхть «Наследия» аудиовизуальнай энциклопедияти.
Тя пингс снимандафт видеофильмат мокшэрзянь, рузонь, татаронь, еврейскяй, армянскяй, украинскяй нароттнень и синь национальнай культураснон колга. И тя работась эрьгавста кармай мольфтевома сяда тов. Сяс мес, кода содаф, Мордовия Республикаса эряйхть 119 народонь представительхть. И сембе ня нароттнень улихть синцень национальнай козя культурасна, койсна, ремесласна и промысласна. Сяс тя проектоньке, улема, сави вятемс кизоть аделавомс!
Тяса мон ёран азомс оцюдонга оцю сюкпря цебярь работанкса мокшэрзянь общественнай содаф деятельти, «Ванфтомок койхнень—тисаськ сай пингть!» проектонь вятити Т.Т.Чекушовати, Н.П.Огарёвонь лемса госуниверситетонь мультимедийнай лабораториянь заведующайти Е.Н.Антипкинати и сонь творческяй команданцты, конат тиихть видеофильматнень эса.
Тяда башка, аф кунара Россиянь Общественнай палатаса ётафтовсь «Этнокультурнай секторонь касфтомась» лем ала Общероссийскяй III конференциясь. Конференцияса, коса мон работань, тяфта жа вановсть «Национальнай отношениянь сфераса инь цебярь практикатне» Всероссийскяй IV конкурсонь итокне. Конкурсса вановсь 530 заявка, конат кучфтольхть Россиянь 72 регионцта. Конкурсонь аф фкя лацонь номинацияса сяськикс лиссь 25 проект. Ётксост—«Лама национальностень Мордовиясь: культуратнень ёткса диалогсь» Медиафорумсь, конань арьсезе Ассамблеять Мордовскяй региональнай отделенияц.
Тя проектть вельде Мордовияса касфневихть-виияфневихть аф фкя национальностень од ломаттнень и студенттнень творческяй, профессиональнай потенциалсна и медиасодамошисна.
Тя кизоня тяфта жа ётафтсаськ эряфс «Тядянь-алянь кяльхнень ванфтомасна» проектоньконь. Сонь арьсемстонза сявфоль мяльс странань лия региоттнень инь цебярь рабочай опытсна. И работась кармай вятевома кода очнай, стане и онлайн-форматса. Сембе информациясь тиф-ётафтф работать колга лихтеви-путови специальнай интернет-площадкас, коса сонь ули кода ваномс эрь ломанти, кона ёрай цебярьста содамс тядянь-алянь кяльть.
—Проектонтень арьсемста-анокламста и эряфс ётафтомстост, кодама лезкс макссихть Ассамблеять региональнай отделениянцты республикань народонь общественнай организациятне?
—Россиянь народонь Ассоциациять Мордовскяй региональнай отделениянц составс сувсихть республикань народонь сембе форматонь общественнай организациятне. Сяс ули кода азомс: сембе проектоньке арьсекшневихть и ётафневихть эряфс марстонь вийса.
Тяда башка, проектоньконь арьсемста и эряфс ётафтомста минь работатама Мордовиянь культурань и высшай образованиянь учреждениятнень мархта.
Федеральнай уровеньца, конешна, тейнек оцю лезкс макссихть Россиянь народонь Ассамблеясь и национальносттнень тевснон коряс Федеральнай агентствась.
—И мекольце кизефкссь.Елена Николаевна, кодама темат ёрат кеподемс «Волгась—ялгаксшинь ляй» Международнай этнокультурнай экспедициять-фестивальть дискуссионнай площадканзон лангса?
—Конешна, мон карман корхтама мокшэрзянь и лия народонь кяльхнень, национальнай культуратнень ванфтомаснон и виияфтомаснон колга. Тяфта жа карман корхтама нароттнень ёткса межнациональнай, межкультурнай и межрелигиознай соткснень кемокстамаснон квалма.
Тяда башка, экспедицияса сонь аноклаензонды-ётафтыензонды ёран азомс предложения экспертонь лувксть келептеманц колга. Койсон, сась пинге «Волгась—ялгаксшинь ляй» Международнай форумонь делегацияти сувафтомс аф аньцек финно-угорскяй, но и странань лия народонь сяда лама общественнай организациянь представитель, конат лацонк кемокснесазь российскяй нациянь нароттнень ёткса сембе ширдень соткснень!

В.НЕСТЕРОВ.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...