С.Д.Эрьзянь лемса музейти—65 киза!

24 январьста С.Д.Эрьзянь лемса музейса ётафтовсь мероприятия, кона лемтьфоль музейть 65 кизонцты. Эсонза примасть участия МР-нь Оцюнясь Артём Здунов, РФ-нь сенаторсь, Россиянь Финно-угорскяй нароттнень ассоциацияснон председателец Пётр Тултаев, Мордовиянь Госсобраниянь Председательть заместителец Наталья Долматова, музеень сотрудникне и ветераттне.
«Аш фкявок делегация, кона, самок Мордовияв, афоль уле музейса—сембе содасазь сонь. Тя минь жемчужинаньке!—мярьгсь Артём Здунов.—Сай кизоть Степан Дмитриевич Эрьзянь шачема шиста топоди 150 киза. Ся фактсь, што сон лемдезе эсь прянц народонц лемса, корхтай ламоть колга—сон лемдезе эсь прянц теенза! Сон азсь мяль, штоба скульптуранза ванфтовольхть шачема-касома вастсонза, служальхть ломаттненди—тя Оцю букваста ломанель, тяниень пингонь героень поступка!»
Пётр Тултаев отмечазе, што музейсь аф аньцек Поволжьянь культурань центра, а мировой культурнай музейнай пространствань пакшкя. Ламоц выставкатне ульсть аф аньцек республикати прянь шнафтома вастокс, а мировой уровенень художественнай панжемакс.
Тя шиня музеень сотрудникненди максфтольхть оцю казнет.
Музейть директороц Людмила Нарбекова азсь благодарностень валхт Мордовиянь Оцюняти мялень шарфнеманкса и лезксонкса. «Тон фалу мархтонк, тон корхнят колганк федеральнай серьса! Ответственностсь оцю!»—азозе музейть руководителец. Сон стане жа пшкядсь коллективти: «Минь—оцю опыт мархта фкя оцю команда и семья, тинь фалу палозь палыхть сельмонте. Минь служатама музееньконди и кельгома республиканьконди».
Эсь видеопоздравленияснон прважазь инжихне, конат эрь-кодама пингть ульсть музейса: морсись Дмитрий Маликов, ведущайсь Андрей Малахов, актёрсь Константин Хабенский и ламотне лиятне.
Торжественнай церемонияда меле Артём Здунов и музеень инжихне ванозь «Монь Музеезе. Монь Мордовиязе» выставкать, кона лемтьфоль тя юбилейнай шити. Сотрудникне кочказь живописень, скульптурань, декоративно-прикладной искусствань, фотографиянь, документонь и видеохроникань предметтнень.