21 июньцта Мордовия Республикань Правительствать Председателец Владимир Сидоров ётафтсь Лямбирскяй райононь Аксенова велеса XII Всероссийскяй велень Сабантуйти анокламань кизефкснень коряс совещания. Лятфтасаськ, Сабантуйсь ётафтови Мордовияса 1-2 июльста.
Илати анокламать мяльса кирдезь шумордавсь Аксёново велеса Молодежнай ульцяса автомобильнай кить капитальнайста петемац, мольфтеви мероприятиянь инжихненди парковочнай площадкань тиемась. Владимир Сидоров, кона ащи XII Всероссийскяй велень Сабантуень оргкомитетти сопредседателькс, макссь поручения 22 июнти аделамс Аксёноваса лама квартирань куттнень пирьфснон петемаснон-тиемаснон.
Площадкаса, коса ётафтови Сабантуйсь, мольфтеви «Татарский базар» зонать тиемац. Тяса улихть ладяфт сисем шатёрхт продовольственнай товаронь и сувенирнай продукциянь мишендеманкса, фут-зона и 20 палатка национальнай эрь кодама ярхцамбяль мархта.
Выездной совещаниянь участникне ванозь территориять, коса ётафтовихть конно-спортивнай пялькстоматне. Азсаськ, што Мордовияти тя спортонь од вид, сяс ипподромть тиемста минь строителеньконди лездыхть Татарстанцта специалисттне. Ластя алашаса арнематнень эса участвондаманди заявкат макссть спортсметт Приволжскяй федеральнай округонь несколька регионцта, пялькстомань сяськити максови автомобиль.
Аксёноваса ушедовсь спортивнай зонать ладямац, коса ётафтовихть пялькстомат корэшть коряс, а стане жа спортонь национальнай виттнень коряс республиканскяй спартакиадась.
МР-нь Правительствать Председателец макссь поручения маластонь пингть ушедомс илань главнай сценать—майданть кочкаманц-ладяманц, штоба творческяй коллектифненди улель кода кярьмодемс репетициятненди Сабантуень ётафтома вастть эса.