14 июньцта С.Д.Эрьзянь лемса изобразительнай искусствань Мордовскяй Республиканскяй музейса панжевсь «Многоликий град Петра» лем ала фотовыставка. Выставкас лихтьфт Санкт-Петербургскяй «Просто Фотоклуб» творческяй объединениянь фотохудожникнень Мария Белявскаять, Юлия Алметовать, Зоя Михайловать, Марина Романовскаять, Юлия Старковать и Ольга Яворскаять работасна. Эсост няфтьф Санкт-Петербург ошсь стамкс, кодамкс сонь тяда инголе кивок ашезе няенде.
Фотовыставкась лемтьф императорть Пётр I шачема шистонза 350 кизонь топодемати.
Выставкать панжеманц мархта пуромфнень поздравляндазень С.Д.Эрьзянь лемса изобразительнай искусствань Мордовскяй республиканскяй музейть директороц, Мордовиянь Художниконь союзть председателец Л.Н.Нарбекова. Эсь выступлениясонза Людмила Николаевна макссь профессиональнай оцю питне Санкт-Петербургонь фотохудожникнень работаснонды, конат няфнесазь ошть стама лама ширеннекс, мезть лангс сидеста аф шарфнихть ванф туристтне. Фототнень вельде фотохудожникне няфнесазь Санкт-Петербургть, кона сувси миронь инь мазы ошнень лувксс, тостонь эряйхнень сельмованфса оцю кельгома мархта!
Сяльде пуромфнень и фотокартинатнень авторснон выставкать панжевоманц мархта поздравляндазь Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин, республикань Народнай художниксь Анатолий Баргов, философскяй наукань докторсь Ольга Беломоева, Саранск ошень инь сире фотохудожниксь Валентин Крайнов и выставкать куратороц, искусствоведсь Виктор Махаев.
«Многоликий град Петра» фотовыставкась кармай работама 1 августти молемс. Пингстонза тяфта жа ётафтовихть творческяй васедемат фотохудожникнень мархта.
В.Нестеров.