Саранск ошень Централизованнай библиотечнай системать директороц Мария Денисова: «ПАТРИОТИЧЕСКЯЙ РАБОТАСЬ—ВАСЕНЦЕ ВАСТСА!»

—Мария Ивановна, кодама работа тя пингть мольфтихть Саранск ошень Централизованнай библиотечнай системань учреждениятне иттнень, од ломаттнень и лия лувихнень мархта?
—Сембе 22 библиотекась, конат сувсихть Саранскяень Централизованнай библиотечнай системати, ётафнихть лувихненди аф фкя лацонь мероприятият. Эсост пачфневи краеведениять, экологиять, экономическо-правовой, семьять, культурать, книгань лувомать, специальнай военнай операциять колга.
Кда корхтамс иттнень мархта сотф работать колга, эряви азомс, што сон вятеви ся вешфкснень коряс, конат няфнесазь теест эряфонь китнень стамкс, кодамкс теест эряви улемс. «Озаманя лангса книга мархта» акциясь, конань ётафтоськ 16 июльста, сембе пингс ляды ёмла лувихнень мялямса.
Тяфта жа ошень ульцятнень эса ётафтоме «Марса наркотикнень каршес» и «Ванфтода пря терроризмада» акцият. Пингстост азондоме ся пелькснень-зияттнень колга, конатнень кандсазь ломаттненди наркоманиясь и терроризмась. Тя шиня явондоме информационнай буклетт, коса азондови наркоманиять и терроризмать колга.
Ошень библиотекатне работайхть и ся иттнень мархта, конат ваймосихть школань лагерьса. Теест ётафневихть «Перьфпялень содама ёфкст» лем ала театрализованнай экологическяй мероприятият. Пингстост азонкшнетяма перьфпяльть мазышинц, а тяфта жа сонь ванфтоманц квалма.
Арьсян, театрализованнай экологическяй мероприятияса кульфсь и няйфсь сембе пингс ляды иттнень мяльса-ваймоса.
—Тяддень кизось Россияса азф Семьянь кизокс. Кодама мероприятияса Саранск ошень Централизованнай библиотечнай системань учреждениятне кеняртьфтезь лувихнень?
—Тяддень кизоть ушетксста сявомок ошень библиотекатне ётафтсть ни сядот мероприятия. Ётксост—рузонь, мокшень и эрзянь, татаронь, армянонь и лия национальностень, конат эряйхть республикаса, семьянь представительхнень мархта васедемат. Пингстост синь азондсть лувихненди эсь эряфснон, национальнай культураснон и койснон-обуцяснон колга, а тяфта жа морасть национальнай морот и кштисть эсь народонь кштимат.
Тяфта жа ошень библиотекатне ётафтсть мероприятият, конат лемтьфтольхть Семьянь, кельгомань и верностень шити. Тя илать лемс А.С.Пушкинонь лемса культурань и ваймамань паркса ульсть «Фкя-фкянди седихть макссемок» лем ала книгань и журналонь тематическяй выставкат, рисункань и стихонь конкурст.
Надиян: сембе ня мероприятиятне лездыхть лувихненди эреклафтомс и кемокстамс эсь семьясост кельгомань, фкя-фкянь шарьхкодемань и фкя-фкянь мархта ладямань койхнень-обуцятнень.
—Мария Ивановна, кода мольфтеви лувихнень мархта патриотическяй работась?
—Саранскяень Централизованнай библиотечнай системань учреждениятне патриотическяй работать вятьсазь-мольфтьсазь кизоньберьф. И сембе мероприятиятне ётафневихть кода очнай, стане и онлайн-форматса.
22 июньцта ётафтоме мероприятият, конат лемтьфтольхть Мялямонь и ризнамань шити—Великай Отечественнай войнать ушедовомста 83 кизонь топодемати, и «Мон—рузонь солдатан» литературнай ила, кона лемтьфтоль фронтовикнень, писательхнень и поэттнень Борис Васильевонь, Виктор Астафьевонь, Юлия Друнинать, Булат Окуджавань творчестваснонды. Синь, ётамок Великай Отечественнай войнань толу-качаму китнень, кадсть тейнек, тячиень эряйхненди, великай произведеният эсь народснон Подвигонц колга!
«Мон мяляфтса! Мон марян гордость!» Всероссийскяй акциять вешфксонзон коряс ошень библиотекатне азондыхть очнай и онлайн-форматса земляконьконь, конат тюрсть Великай Отечественнай войнать пингста фашисттнень каршес, и тячи тюрихть нацисттнень каршес специальнай военнай операцияса, подвигснон колга.
—Удалаза, Мария Ивановна, сембе арьсефонте.
—Сюкпря!
Владимир НЕСТЕРОВ.