—Наталья Владимировна, кода тячи работай лувихнень мархта Саранск ошень П.С.Кирилловонь лемса Краеведческяй библиотекась?
—Конешна, кизонда библиотекав сашенды лувихнень лувкссна няевиста кири. Но работась синь мархтост сяка аф лоткафневи. Аньцек сон ушеткшни мольфтевома лиякс, эсь лацонь форматса.
Кепотьксонди, ёмла лувихнень мархта работать тячи минь вятьсаськ Саранск ошень Октябрьскяй райононь Идень эстетическяй воспитаниянь центрать мархта. Сонь видесонза панчф «Романтик» кизонь лагерь, коса ваймоси ведьгемоньда лама идь. И теест минь ётафнетяма аф фкя лацонь мероприятият, коса содафттама эсост Мордовиянь и Россиянь содаф писательхнень и поэттнень творчестваснон мархта.
Мекольдень мероприятиясь, конань минь ётафтоськ видеопрезентациянь форматса «Романтик» кизонь лагерьса, лемтьфоль рузонь советскяй содаф писательть, режиссёрть-мультипликаторть, художникть-иллюстраторть, сценаристть и РСФСР-нь искусствань Заслуженнай деятельть В.Г.Сутеевонь творчестванцты. Мероприятиять пингста иттненди тяфта жа няфтеськ «Кие мярьгсь «мяу»?, «Петясь и Якстерь вазьнясь», «Атякшсь и краскатне» и лия содаф мультфильматнень, конатнень снимандазень-рисовандазень В.Г.Сутеев.
Тяфта жа иттненди очнай и онлайн-форматса ётафнетяма историко-культурнай и патриотическяй мероприятият. Пингстост теест азондови тядянь-алянь крайть кунардонь и тяниень пингонь историянц, сонь моданзон лангса эряй нароттнень национальнай культураснон, койснон-обуцяснон, промысласнон и ремесласнон, а тяфта жа Мордовия Республикань ломаттнень колга, конатнень лемсна содафт аф аньцек странаса, но и сембе мирса. Нят—содаф скульпторсь С.Д.Эрьзя, Советскяй Союзонь Геройсь М.П.Девятаев, космонавтсь В.Н.Дежуров, республикань Народнай писательхне И.М.Девин, К.Г.Абрамов, археологсь И.М.Петербургский, певицась М.Н.Антонова, композиторсь Н.В.Кошелева и ламотне лиятне.
Башка и оцю мероприятия очнай и онлайн-форматса минь ётафтоме мокшэрзянь васенце сказительницать Ефимия Петровна Кривошеевать шачема шиста 155 кизонь топодеманцты.
Тяда башка, тядде лувихнень мархта работазонк сувафтоме од формат. И кода няфнесы эряфсь, сон тушенды лувихнень мяльс. Мон корхтан «Библиоскамейка» литературнай акциять квалма, конань минь ётафнесаськ ульцяса. Пингстонза библиотекать вакска ётайхне-потайхне терневихть тя «скомнянять» малас, конань ваксса ащи книгань выставка. Тоза лихтьфт мокшэрзянь и странань содаф поэттнень и писательхнень книгасна. Ломаттне ёткстост кочксесазь кельгома произведенияснон и кайгиста лувсазь. Литературнай «Библиоскамейкась» пуропни коль сяда лама и лама ломань.
И тяста, лувихнень лувкссна, конат сашендыхть библиотеказонк, няевиста касы.
Тяфта жа сашенды лама луви «Тонь шумбрашице—тонь кядьсот!» акцияс-урокс, кона библиотекасонк ётафневи очнай и онлайн-форматса. Пингстонза минь азонттама лувихненди зияттнень колга, конатнень каннесазь курендамась и наркотикне.
И, конешна, сембе ётафтф мероприятияньконь ёткса башка вастса ащи «Сенемас странань морай» лем ала литературнай илась, кона лемтьф Мордовиянь Народнай поэтть Илья Максимович Девинонь 100 кизонь топодеманцты.
—Кодама соткст, Наталья Владимировна, тяниень пингть кирттяда странань лия региононь библиотекатнень мархта?
—Россиянь лия региононь библиотекатнень мархта лама ширдень сотксне фалу кирневихть.
Тячи, кепотьксонди, видеотрансляциянь форматса ётафттама «Народнай ёфксонь хоровод» межрегиональнай акция. Пингстонза лувихненди луфтама мокшэрзянь, рузонь и лия народонь ёфкст. И тя акциять эсь работасост тяфта жа поладозь странань лия национальнай библиотекатне.
Тя и лацонза лия мероприятиятнень вельде библиотеканьконь и лия региононь лувихнень ёткса тяфта жа латцевихть цебярь соткст. Ня шитнень, кепотьксонди, библиотеказонк пачкодсь «Адста ворьгодемась» М.П.Девятаевонь художественно-документальнай книгац, конань 2017 кизоня нолдазе Татарскяй книжнай издательствась. Кучезе сонь тейнек «ВКонтакте» подписчицаньке Римма Миннибаева, мзярда ванозе видеотрансляциянь форматса мужествань урокть, конань минь лемдеськ Советскяй Союзонь Геройть М.П.Девятаевонь подвигонцты и эряфонь кинцты.
Тячи ни минь валом-валом ушеткшнетяма аноклама од мероприятият, конат кармайхть ётафневома очнай и онлайн-форматса сентябрь ковста сявомок. Надиян, синь туйхть ёмла, од и эряфкшу лувихнень мяльс!
—Удалаза арьсефонте.
—Сюкпря!
В.НЕСТЕРОВ.