Саранск ошень П.С.Кирилловонь лемса Краеведческяй библиотекать заведующаец Нина Бояркина: «Оцю и кеме семьясь—народоньконь козяшиц!»

—Нина Михайловна, кодама мероприятият ётафтсь Саранск ошень П.С.Кирилловонь лемса Краеведческяй библиотекась Семьянь кизоть лемс?
—Семьянь кизоти лемтьф васенце литературно-музыкальнай илась библиотекасонк ётафтовсь Авань Международнай шиня. Пингстонза илас сафненди минь азондоме семьянь питнишитнень колга. Тяфта жа шарфтоськ синь мяльснон семьять ванфтомаса, виияфтомаса и идень касфтомаса авать вастонц лангс.
«Седить эждьсаськ кельгомаса» литературно-музыкальнай иласа тядятненди поздравленият казсть Эстетическяй воспитаниянь Центраса тонафнихне и лия од лувихне.
Тяфта жа Семьянь кизоти лемтьфтольхть «Аньцек миннетне» онлайн-акциясь, «Мокшэрзянь койхнень коряс семейнай илатне» театрализованнай представлениясь и книгань выставкась, «Тундась! Семьясь! Книгась!» мероприятиясь, а тяфта жа лия мероприятиятне, конатнень пингста оцю семьянь, трудовой династиянь представительхне и интернациональнай семьянь мирттне-рьвятне, иттне азондсть лувихненди эсь эряфснон-ащефснон колга.
Семьянь кизоти лемтьф мекольце оцю мероприятиять ётафтоськ Семьянь Международнай шиня—15 майста. Библиотекаса няфтевсь «Книгань смузьшись—семьянь козяши!» интеллектуальнай литературно-музыкальнай ила. Пингстонза лувихне азондсть семьянь афкуксонь питнишитнень колга, морафтсть валмуворкст семьянь эряфть квалма, лувсть стихт и морасть морот, конат лемтьфтольхть тядяснонды и аляснонды, сазорснонды и брадснонды, бабаснонды и атяснонды.
Литературно-музыкальнай илась лемтьфоль оцю, павазу и кеме семьяти.
Тяддень кизоть аделавомс нинге аноклатама и ётафттама лама мероприятия. «Литова» мордовскяй республиканскяй общественнай организациять мархта минь сатоме грант, конань лангс кармай вятевома библиотекасонк тя работась.
—Нина Михайловна, азонтт аф лама тя грантть колга.
—«Литовать» мархта тейнек удалась сатомс Культурнай инициативань Президентскяй фондть грантонц. Сонь мяльс сявозь библиотекаса кармайхть аноклакшневома и ётафневома литературно-музыкальнай и лия мероприятият. Пингстост лувихненди азондови интернациональнай, лама идень, рузонь, мокшень и эрзянь семьянь питнишитнень колга. Тя работать минь ушедоськ тяддень 1 июльста и карматама мольфтевомонза кизоть аделавомс.
—Кода минь содасаськ, Саранск ошень П.С.Кирилловонь лемса Краеведческяй библиотекась лувихнень ёткса тяфта жа вяти патриотическяй оцю работа.
—Тя афкукс тяфта. Великай Победать лемс од лувихненди минь ётафтоме лама мероприятия. Пингстост азондоме народоньконь марстонь Подвигонц колга, конань сон тиезе фашизмать эзда мирть араламста, Советскяй Союзонь Геройхнень—минь земляконьконь эряфснон и подвигснон квалма.
Тяфта жа лама азонкшнетяма специальнай военнай операциянь геройхнень подвигснон колга, ётафнетяма мархтост васедемат.
Библиотекасонк панчф документонь, фотоснимкань, статьянь и лия информациянь выставка, коса азондови земляконьконь, специальнай военнай операциянь участникнень боевой сатфксснон и подвигснон квалма.
Эрь мероприятияса минь шарфнесаськ од ломаттнень мяльснон тя фактть лангс: специальнай военнай операциянь воиттне кода и Великай Отечественнай войнань солдаттне тячи тюрихть фашисттнень и фашизмать каршес, кона одукс Европаса кеподезе прянц.
Владимир Нестеров.