21-25 сентябрьста Мордовияса васенцеда ётафтови «Худсовет» од ломанень межрегиональнай фестиваль. Тя проектсь получась лезкс Культурнай инициативань Президетскяй фондть ширде. Аноклаец и ётафтыец—Мордовия Республикань Театральнай деятельхнень союзсна. Организаторхне ёрайхть кочкамс Саранскяйса од ломанень инь цебярь театратнень и спектакльхнень марнек Россияста. Фестивальти тердевихть авторитетнай экспертт и тевонь содай наставникт, конат ётафтыхть форумонь участникненди и театральнай направлениянь студенттненди мастер-класст.
Заявкатне примавсть 6 июльти молемс. Фестивалень 5 шитнень пингста зрительхненди няфтеви 12 спектакль. Синь лувкссост москувонь театрань кафта постановкат—«Драматическяй искусствань школань» актёрхне няфтьсазь Пьер Шодерлонь романонц коряс «Опасные связи» постановкать, а М.Н.Ермоловать лемса драматическяй театрань артисттне няфтьсазь «Антигонать». Мекольцеть эса главнай рольть налхксы Дарья Мельникова, кона ламотненди содаф «Папины дочки» телесериалть коряс.
Спектакльда башка, ётафтови творческяй пялькстома, вельденза жюрись кочкасыне режиссурать и сценографиять коряс сяськихнень. Казнет максовихть алянь, авань и омбоце планонь инь цебярь рольхнень инкса, кармай улема Гран-при инь цебярь постановкать инкса.
Фестивальть видеса ётафтовихть актёронь маштомошить, сценическяй пластикать и перформансть коряс 5 лабораторият, конатнень вятьсазь РФ-нь Заслуженнай артистсь, Н.С.Михалковонь лемса кинематографиянь и театральнай искусствань Академиянь режиссёрсь и педагогсь Игорь Яцко, а стане жа содаф лия режиссёрхне, драматуркне и хореографне.
«Худсовет» фестивальсь панжеви И.М.Яушевонь лемса музыкальнай театраса. Фестивальнай представлениятнень ваныхненди ули кода няемс Национальнай и Рузонь драматическяй театратнень эса. Мастер-классне ётафтовихть Н.П.Огарёвонь лемса Мордовскяй госуниверситетонь Национальнай культурань институтса. Мордовиянь театратнень эзда фестивальса примай участия Мокшэрзянь национальнай драматическяй театрась «Ромео и Джульетта» постановкать мархта.
Мордовиянь Театральнай деятелень союзть председателец Андрей Иванович Анисимов мярьгсь, што фестивальти шарфтсть мяль ламотне. Аньцек васенце шитнень организаторхне получасть заявкат Севернай Осетияста, Калмыкияста, Петрозаводскяйста, Самарскяй и Пензенскяй областтнень и лия региоттнень эзда. Заявкатнень ёткса аф аньцек государственнай, но и частнай театрат. Сембоц ванфоль пцтай 70 заявка. Тяниень пингть аноклави афишась. Васендакиге фестивалень 5 шиста арьсекшневсь няфтемс 9 спектакльхть, но сяльде организаторхне састь мяльс келептемс форматть и нолдамс 12.
«Кунара ульсь мяленьке ётафтомс од ломанень фестиваль. Мордовияса 15 кизода лама моли «Соотечественники» Международнай фестивальсь, коза сашендыхть маластонь и ичкоздень омба масторонь коллектифне, ётафневихть национальнай театрань межрегиональнай фестивальхть. Но ня фествальхнень эса шуроста васьфтят сянь, мезсь салалезень мяльснон од ломаттнень. Сянкса и шачсь «Худсовет» проектсь»,—мярьгсь Театральнай деятелень союзть председателец Андрей Иванович Анисимов.
Организаторхне кочказь ся спектакльхнень, конатнень эса васендакиге няфтеви од ломанть нравственнай ширде касомац, мялень-арьсемань ширде полафтомац, эряфти сувамац. 21 сентябрьста сявомок 25 сентябрти молемс «Худсовет» од ломанень театральнай фестивальти билеттнень ули кода рамамс «Пушкинскяй картать» вельде.
О.Белкина.