27 сентябрьста Саранск ошень Культурань дворецса панжевсь «Коень поладыхть» мокшэрзянь творчествань выставкась, кона пуроптф «Наследники традиций» этнокультурнай проектть мяльса кирдезь. Выставкаса ули кода няемс лама работа, конат тифт эрь кодама техникаса: живописьса, графикаса, шуфтть лангса тяштемаса, керамикаса.
Илась ушедсь мокшень сире мороса, конань моразе «Мерема» фольклорно-этнографическяй студиясь. Салась мяль «Varma» этно-арт-театрась, кона тага весть няфтезе мокшэрзянь щамонь тяниень пингонь коллекцияснон. Синь панарсна лац няфнесазь сире и тяниень пингть ёткса сотксть. Сяда тов театральнай постановка лаца кудазорхне тердезь саф инжихнень эсь кудъюрхтозост, азондозь, кода эрясть щаваньке-щятяньке. Выставкань эрь экспозициять маласа няфтьфтольхть мастер-класст.
Цёранятнень салазень мяльснон нюдиста вяшкомань тиемась. Синь синць лаксезь кувака илинятнень, а меле тонафнесть вяшкома-морама мархтост.
Стирьхненди аноклафтольхть лия мастер-класст. Кие тонафнесь руцянь сотнема, кие кштирдема, кие кодама, кие котф лангс сёрмадома. Эсь мяльс коре тев мушендовсь сембонди.
Дворецонь Национальнай культурань отделть заведующаец, мокшавась И.Н.Вершинина мярьгсь: «Тячиень выставкать панжемац—тя аньцек пялькс «Наследники традиций» оцю проектть эзда. Видесонза минь ушеттама ётафнема эрь кодама мастер-класст, коень обрятт, а пингстост карматама тонафтома мокшень и эрзянь кяльса сембода сидеста васьфневи валхнень. Сембе мероприятиятне кандыхть эсь эсост образовательнай и воспитательнай смузь. И водендафт синь, васендакиге, од ломаттненди. Проектть эсь лацонь ширец сянь эса, што эзонза сувсихть и мокшэрзянь щамсь, и народнай промыслатне, и обряттне, и моротне, и кяльхне. Интерактивнай программась лезды сяда лац шарьхкодемс минь народоньконь коензон-обуцянзон».
Саранск ошень Администрациянь культурань Управлениянь начальниксь, Мордовия Республикань культурань Заслуженнай работниксь Т.Ю.Салищева мярьгсь: «Пяк кеняртьфти, мес выставкать панжема сась лама школьник и студент. Минь мархтонт эрятама национальнай республикаса. Сяс кажнайти эздонк эряви хуш кой-конашкада содамс мокшень и эрзянь кяльхнень, койхнень и
обуцятнень. Эряви маштомс нолдамс сире пингонь койхненди тяниень пингонь ваймопожф. Тяфта, кода художникне и дизайнерхне костюмонь стамста нолясазь тевс национальнай элементть, штоба тиемс моднай од коллекцият».
27 сентябрьста сявомок 10 октябрти молемс Саранск ошень Культурань дворецсь тернесыне сембонь, кинь мялец, аф фкя лацонь мастер-класс, ётксост: «Кукла на удачу», «Секреты и особенности мордовской вышивки», «Волшебное Нюди», «Мордовское многоголосье», «Основы национального танца», «Особая техника вязания», «Уникальная аппликация», «Мокшанский платок». Сембонди работай «Пушкинская карта» программась.
10 октябрьда меле выставкась ётай ошень лия райоттненди. Васендакиге сон няфтеви «Луч» Культурань кудса, сяльде—«Заречье» Культурань кудса и стак тов. Сяс ваномс мокшэрзянь мазышить ули кода Саранкяень сембе эряйхненди.
О.Белкина.