Кода содаф, Российскяй Федерациянь Президентсь В.В.Путин азсь-ладясь странаса 12 национальнай проект, конатнень коряс касфневихть-виияфневихть эряфонь лама ширдень сфератне. Няевикс вастса сембе ня проекттнень ёткса ащи «Культура» национальнай проектсь, конань грантонзон лангс странаса касфневи-виияфневи народнай и профессиональнай культурась.
Мордовия Республикань общественнай и лия организациятне тяфта жа вятихть грантонь сатомать коряс оцю работа. Кода пачфтезе тейнек «Мордовиянь Народонь ялгаксшинь куд» региональнай общественнай культурно-просветительскяй организациять директороц Р.И.Акашкина, аф кунара тя организациять «Тев» народнай промыслань и ремеслань Межрегиональнай фестиваль» проектоц сяськсь Культурань Российскяй фондонь грантонь конкурсса. А сонць проектсь ётафтови эряфс «Культура» национальнай проектть вешфксонзон коряс.
«Тев» народнай промыслань и ремеслань Межрегиональнай фестивальсь ётафтови тяддень 17 сентябрьста Мордовиять столицаса Мордовэкспоцентрать площадканзон лангса. Фестивальса ётафтовихть народнай промыслань и ремеслань изделиянь выставкат, изделиянь тиемань коряс мастер-класст, «Национальнай костюмсь подиумть лангса» конкурс-дефиле, «Машты кядень мастерши» книгань Межрегиональнай выставка, «Цёмарат» национальнай кухнянь презентация, «Народнай художественнай промыслатне: касомань-вииямань кисна» «круглай шра» и «Морай тядянь-алянь велесь» лем ала фольклорнай коллективонь конкурс-фестиваль.
«Тев» народнай промыслань и ремеслань Межрегиональнай фестивальса эсь изделияснон и маштомошиснон няфтьсазь Поволжьянь 14 субъектонь, Мордовия Республикань 22 муниципальнай райононь и Саранск ошень округонь мастерхне. Фестивальсь ётафтови Мордовия Республикань Культурань, национальнай политикань и архивнай тевонь министерствать, республикань Народнай творчествань кудть и финно-угорскяй народонь культурань Поволжскяй центрать лезксснон вельде.
В.ИОСИФОВ.