28 сентябрьста Саратовскяй областень Петровскяй райононь Оркино велеса ульсь национальнай оцю ила—«Шумбрат» мокшэрзянь культурань Межрегиональнай фестиваль. Тядде сон пуропнесь инжихть Мордовия, Башкортостан республикатнень эзда и Пензенскяй областьста.
Мероприятиянь инжихнень и участникнень приветствовандазь Саратовскяй областень внутренняй политикань и общественнай отношениянь министрть заместителец Тимофей Лещенко, МР-нь культурань, национальнай политикань и архивнай тевонь министрть васенце заместителец Александр Карьгин, Петровскяй муниципальнай райононь оцюнясь Максим Калядин, областной Думань депутатсь Сергей Чередников, Мордовскяй (мокшень и эрзянь) народть Межрегиональнай общественнай организациянц Исполкомонц председателец Татьяна Ларина и Саратовскяй областень «Шумбрат» национально-культурнай центрать руководителец Валентина Кривошеева.
Тимофей Лещенко лувозе мероприятиянь инжихненди и участникненди Саратовскяй областень губернаторть Роман Бусаргинонь приветствиянь адресонц: «Сембе пинкнень Россиять панчфокс панжеманцты юркс ульсь нароттнень марстоньшисна. Минь правас коре марятама гордость Родинаньконь козя историянц, сонь великай культуранц, ратнай и трудовой сатфксонзон инкса. Пара шабракс эрямань койхне-обуцятне лама веконьберьф латцевсть и Саратовскяй областьса. «Шумбрат» илась пуропнесыне марс лама национальностень Россиянь эрь-кодама региоттнень представительснон, макссемок возможность содафтомс мокшэрзянь кяльть, койхнень-обуцятнень мархта!»—корхтави приветственнай адресть эса.
Фестивальть торжественнайста панжемста Саратовскяй областень губернаторть Благодарственнай сёрманзон мархта казьфтольхть муниципальнай райоттнень эзда творческяй коллектифнень участниксна, конат тиендихть путкс областть территорияса межнациональнай мирть и согласиять ванфтомаснонды.
Пара койс коре инжихнень васьфтезь кшиса-салса и каванязь национальнай ярхцамбяльса. Оркино велень Культурань кудть ваксса келептьфтольхть муниципальнай райоттнень презентационнай площадкасна, коса сембонди ульсь кода аф аньцек ваномс, но и варжамс мокшэрзянь кухнянь национальнай ярхцамбяльхнень.
Тяда башка, илань инжихненди и участникненди няфтьфтольхть декоративно-прикладной творчествань выставкат, ётафтфтольхть сувениронь тиемать коряс мастер-класст, работасть спортонь и налхксемань площадкат.
Концертнай программать пингста сценать лангса выступандасть мокшэрзянь культурань вокальнай и инструментальнай коллектифне. Оркино велень эряйхненди и илань сембе участникненди цебярь казнекс арась Г.И.Сураевонь-Королёвонь лемса «Келу» фольклорнай ансамбльть выступленияц.
Мероприятиять пингста почётнай инжихне путсть панчфт «Воиттненди землякненди» памятникти и Александр Кузнецовонь—«Кучугуры» мокшэрзянь моронь фольклорно-этнографическяй ансамбльть руководителенц и аккомпаниаторонц лемс панчфт мемориальнай доскати.
«Шумбрат» фестивальсь тага весть няфтезе Саратовскяй областть культурань козяшинц и лятфтась Российскяй Федерациянь сембе нароттнень койснонды-обуцяснонды кородозь малаткшнемать важнайшинц колга.