Республикасонк сяда тов мольфтеви «Шумбрат, Мордовия!» Народнай творчествань XXVIII республиканскяй фестивальсь-конкурссь. Ётай ваймама шитнень эсь отчётнай концертснон няфтезь Старошайговскяй и Краснослободскяй райоттне.
Сире Шайгав аймакть стака арьсемс морофтома. Вов и фестивальсовок нинге концертта инголе Культурань республиканскяй Дворецть фойесонза кайгсть мокшень, рузонь морот, сиде моронят, тяса-тоса кулевсь гармониять вайгялец. Велень артисттнень выступленияснон ванома сафне тя пингть ванондозь Сире Шайгав аймаконь мастерхнень тифксснон. Мезе аньцек ашель выставкаса: и сёрматф панархт-месть, и мокшекс наряжаф някат, и сёвоньцта тиф кукшеннят-налхкшкат, ленгаста кодаф карьхть и лама мезе лия. Сембось салась мяль и тага весть кемокснезе сянь, што Старошайговскяй районць аш ни кода пяк козя асу, машты кядь ломаньца. Сире Теризморгань мокшаватне няфтсть мастер-класс сюреса сёрмадомать, а мокшалятне (и нльне этническяй таджиксь Фаридун, кона мокшень тя велеса кунара ни арась эсь ломанькс и мокшекс «лочай» аф мокшеда кальдявста)—карень кодамать коряс.
Отчётнай концертсь ушедовсь видеороликста, коса участникненди и ваныхненди пшкядсь содаф российскяй артистсь Александр Бардин. «Мон шачень Краснослободскяй районца, но тейне тяфтама жа родной и Старошайговскяй районць, коса шабакс лама пингта ётафнень бабазень ширеса Сарга велеса,—азозе сон.—Сембонкса, мезе макссь тейне Сире Шайгавонь масторсь, мон азан сюкпря теенза и сембонди теенть, кельгома землякт!»
Приветствиянь валхт азсь Старошайговскяй муниципальнай райононь оцюнясь Геннадий Мухин. Башка мяль сон шарфтсь сянди, што синьцост кородозь ванфневихть народнай койхне-обуцятне. И тя афкукс тяфта. Концертнай программать эзга якстерь сюрекикс таргавсь патриотизмань, нароттнень ёткса ялгаксшинь темась. Мезсь кеняртьфти, кайгсь лама мокшень морода, конатнень седиень токазь моразь «Мокшаваня», «Синельга» фольклорнай ансамбльхне, Сире Теризморгань народнай хорсь. «Пайгонят» семейнай ансамбльсь кеняртьфтсь сиде мороняса, а «Созвездие» коллективсь—весяла кштимаса.
Удалафста лиссь и Краснослободскяй районть отчётнай концертоц. Программаснон Краснослободск аймаконь самодеятельнай артисттне ушедозь «Все на футбол!» номерста. Спортть колга весяла мороть коряс, конань моразе «Звонкие голоса» ансамбльсь, сценать лангс лисендсть райононь кштимань инь цебярь коллектифне—«Грация», «Радуга» и «Колейдоскоп». Сяльде спортонь темась поладовсь национальнайть мархта. Лямбоста васьфтьфтольхть «Мокшаваня», «Пайгоня» и «Кайги вайгяльхть» фольклорнай ансамбльхне. Ламос ашесть сетьмосе кядень цяпаматне «Мокшень край» морода меле, конань моразе МР-нь культурань Заслуженнай работниксь Анастасия Рябова. Аш кода аф шнамс од морсихнень Ирина Чижановать, Диана Аряшевать, «Рябинушка» и «Русская душа» ансамбльхнень выступленияснон. А «Вперед, Россия!» мекольце мороти, конань оцюфнень мархта ряцок моразе концертонь инь ёмла артистсь Дима Шушняев, залсь цяпась стяда ащезь.
Ольга ЕВДОКИМОВА.