Седиень озафкс мушенды стихонь тяштемста

Л.А.Сугреев пцтай афи мяляфтсы алянц. Теенза ульсь сисем кизот, мзярда сон кадозе семьянц. Седи ваксста моли кельгоманц максозе цёраняти щавац. Сон лувондсь уноконянцты книганят, азондсь ёфкст. А сидеста ульсь станявок, мзярда оцю шра ваксс озсесть сембе семьясна и нльне шабрасновок и фкя-фкянь мельгя лувондсть кайгиста книгат. Сидеста тя ульсь Борис Полевоень «Настоящай ломанть колга повесть» книгац. Леонид марясь оцю гордость главнай геройть—А.П.Маресьевонь инкса. И лама кизот сон мрдакшнесь тя повестти и фалу мушендсь эстеенза кати-мезе одня. Сонга ёрась варжамс виензон азксонь или стихонь сёрмадомаса.
Начальнай класснень эса тонафнемста цёранясь сонць тяштсь стихотворения, конац ульсь печатлаф школань стенгазетаса. Ученикти тя оцю событияль. Сяльде сонь стихонзон ушедыхть печатлама «Ленинский путь» (тяни «Голос Примокшанья») и «Мокшень правда» газетатнень эса. Ковылкинаста цёранять колга кармасть корхтама, кода васенце аськолксонь тиенди поэтонь колга.
Лама кизода меле Сугреевонь творческяй арзянястонза ламоц стихотворениянза печатлафтольхть «Калейдоскоп» литературно-художественнай сборникса. А сяльде «Ковылкино» книга-альбомть «Ковылкинань модать поэтонза» лопанясонза лиссть «Шачем уженя», «Афганистанонь эхо» произведениянза.
Л.А.Сугреевонь лиссть кафта сборниконза: «Кельгомать мархта испытаният» и «Верондама. Надияма. Кельгома». Эзост сувасть аф фкя лацонь стихонза: перьфпяльть мазышинц, трудонь кельги ломаттнень колга, ламоцне лемтьфт поездонь кинь темати. И тя аф стак. Леонид Алексеевич профессияс коре—железнодорожник. Эсь трудонц инкса казьф лама благодарностьса и лия казнеса. Сембоса алясь сафтсы: хуш работаса, хуш сёрмадомаса. Аф ваномок кизонзон лангс Л.А.Сугреев сидеста эсь мяльсонза мрдакшни идькс пингозонза, штоба марямс щаванц ляпе вайгяленц, мумс эстеенза седиень озафкс и кочкамс вийхть од стихонь сёрмадомс.
Анатолий Дюков.