Сельмосонза крфай эряфти кельгомась

Улихть масторлангса ломатть, конатнень лангс ванозь, вакссост улемста кеподи мяльце, мянь эрямаце сай. Синь эсост лаказь-лакай эрьгясь, кельгсазь марнек перьфпяльть и тя кельгомась шинь сюролда лаца эжнесыне сембонь, кие шары вакссост. Тяфтама ломаттнень эзда Краснослободскяй райононь Сире Сендру велень эряйсь Татьяна Ивановна Анашкинась.

Содафтонь мархтонза аф кунара, мзярда велесост «Ладяма куд» музейса ётафтовсть И.В.Чигодайкинскяй лувоматне. Мокшень мазы щамса наряжаф авась шарсь-возясь псиста уштф пянакудть перьфке. Сон сире пингонь афкуксонь азорава лаца фатунца маштозь тонгондозень-тарксезень цюгуннятнень, аноклась танцти ярхцамбяль инжихненди. Татьяна Ивановна машты пидема-панема, стама-кодама, морама. Тя мокшавась асу сембе ширде.
Шачсь-кассь Т.И.Анашкинась Сире Сендруса. Семьясост ниле шабатольхть. Тядяц работась колхозса. Аляцка инголи покодсь тязк, а меле кармась якама работама Ардатовав. Сон кальдявста няйсь и колхозса теенза стакаль. Шабатнень мархта шарсь бабасна, Акулина Васильевна. Татьяна Ивановнань валонзон коряс, ся и тонафтозе пидема-панема, хозяйствань вятема, сире пингонь мокшень моронь морама. Сембода пяк кельгозе ёмла Татюнясь, мзярда бабац пицесь модамарень шяняфкст. Авась тячемс мяляфтсы ся мезеньге лангс аф шарфты таньфть.
—Нолакс араме тячи, аф пицетяма шяняфкст. Тевда мархтост лама. Инголи модамарьхне шовамат, меле люпштамат, соксна лихтема. Тоса ня шовафкснень ёткс коламат алнят, вайвелез и пачкалга лангса пицема эздост аф оцю пачанят. Сяльде сят керсемат кубиконянь, марамат цюгунняс. Лангозост каяма или скал вай, или постнай вай, или вайвелез, кие кода кельгсы, и тонгома цюгуннясь яваф пси пянакуду. Аф лама пингонь ётазь модамарень шяняфксне улихть анокт. Тяни тяфтама ярхцамбяльса, улема, киньге аф дивандафтсак, а минь шабакс пингстонк сяда танцти мезьге ашель,—лятфнесы мокшавась.
Эряви азомс, Татьяна Ивановна пара мяльса бабанц рецептонзон коряс тячивок пици пянакудса лям, ям, цёмарат, пярякат и пачат. Оцю иланди тиенди поза. Аньцек, кода виденцясь авась, тяни сяда сидеста суслать рамсесы лавкаста, вдь косьфтаф ламбама ряпст, конат эрявкснихть афкуксонь мокшень позань пидеманди, тячи пцтай кивок ни аф тиенди. Да и пянакуттка велеть келес пцтай ашесть ляда. Пара, хуш «Ладяма кудстоннесь» ванфтовсь, тяса и вельмофнесазь ярхцамбялень пидемань сире койхнень. Каванякшнесазь ялгаснон, ширде саф инжихнень.
Школать аделамда меле Т.И.Анашкинась тонафнесь агрономонди Краснослободскяень велень хозяйствань техникумса. (тяни сон колледж). Тонафнесь стирсь агрономкс. Кодак аделазе, прважафоль специальностьс коре покодема Каймар рузонь вели. Тоса стирсь васьфтезе кельгоманц и лиссь рьвакс. Каймар велеса шачсть и кассть кафта цёранза. 1984 кизоста сявомок 2009 кизоти молемс мокшавась работась Каймар велень администрацияса. А меле семьясост апак учсек лиссь зиян—кулось мирдец, и Татьяна Ивановна лядсь ськамонза, вдь идензовок ся пингти ни кассть и тусть эсь эряфонь кигаст. Эста сон сась мяльс мрдамс шачема велезонза. 2011 кизоста сявомок Анашкинась морсекшни «Мокшаваня» фольклорнай коллективть эса. А 2014 кизоня лиссь покодема методистокс велень культурань куду. Тяса авати эрявкстсь нинге фкя усолоц—стама маштомошиц. Тонафнесь тянди мзярда-бди сонць. А коллективть мархта морсемста эрявкстсть теест од щапт: и мокшень, и рузонь, и, нльне казаконнет. Кяденза лятфтазь стамань тевть. 2018 кизоста сявомок Т.И.Анашкинась ульсь «Мокшаваняти» художественнай руководителькс. Тяни лиссь пенсияс, но мораманц кадомс аф срхкси. Да и «Ладяма кудтьке» кадомс аш мялец. Вдь сон, велень лия аватнень мархта, путозе ваймонь пяльксканц сонь панжеманцты. Мокшаватнень прясост нинге лама мяльда, кода сяда тов келептемс-цебярьгофтомс тя музейть. Сон тяни теест ащи клуб вастс. Тяза аватне пуромкшнихть репетицияс, сяс мес «Ладяма кудсь» уштови пянакудса, а клубсост отоплениясь вов ни кафта тялот кода срафтф-калатф. Пуромомок марняс лямбе пянакудть ваксса, кода бабасна пуромкшнельхть изба-читальняса, синь морсихть кунардонь пингонь мокшень морот, аноклакшнихть концертс.
Т.И.Анашкинать валонзон коряс, морось мархтонза эряфоньберьф. Авась морсекшнесь и школаса, и техникумса, а тяни лисенди сцена лангс «Мокшаваня» коллективть мархта. Сон сонць тяштсь мора шачема веленц колга, конань пара мяльса морсесазь и фестивальса-коса, и эсь ётковаст. А нинге Татьяна Ивановна сёрматкшни сиде моронят тячиень эряфть квалма. Синь кайгондихть «Шумбрат, Мордовия» Народнай творчествань республиканскяй фестивальса. Инксост сон казьфоль МР-нь Культурань министерствать дипломонц мархта.
—Мокшень сире коеньконь аш кода юкснемс, вдь тя минь ваймоньке,—корхтай авась. Тя мяльть Татьяна Ивановна путозе и уноконзон пряс. И хуш синь аф корхтайхть мокшекс, сяс мес кассть ошса, сякокс лувондсазь пряснон мокшень ломанькс, фалу ёрайхть сяда ламоня содамс коеньконь-культураньконь колга, и бабасна пара мяльса азонкшнесы теест семботь, мезе содай сонць.
М.Стешина.

Последние новости

В Мордовии растет количество госзакупок у самозанятых

Одно из ключевых направление национального проекта «Малое и среднее...

В Мордовии благоустраивают общественные территории 

В Рузаевке в рамках федерального проекта «Формирование комфортной городской...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по...

В Мордовии ведется капитальный ремонт дороги до с. Новая Карьга

ВКраснослободском районе Мордовии приступили к капитальному ремонту автодороги «Подъезд...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Тройцясь—Малавса

Святой Тройцять келиста отмечсесазь пцтай эрь велеса. Цебярь тяфтама...

В Мордовии растет количество госзакупок у самозанятых

Одно из ключевых направление национального проекта «Малое и среднее предпринимательство» - это поддержка самозанятых.  Почти 4,5 млрд рублей по России составил общий объем закупок у...

В Мордовии благоустраивают общественные территории 

В Рузаевке в рамках федерального проекта «Формирование комфортной городской среды» национального проекта «Жилье и городская среда» идет благоустройство Аллеи Славы на улице Куйбышева. Эта...

Команда «Бизнес-десанта»проконсультировала предпринимателей Торбеевского района

Центр «Мой бизнес»проводит активную работу в районах Мордовии по информированию предпринимателей о возможностях государственной поддержки. На этой неделе специалисты провели встречу с представителями малого...