«Россия» выставкаса-форумса ётафтовсь Мордовия Республикать шиц
30 ноябрьста Моску ошень ВДНХ-сь арсесь пуромома-васедема вастокс странаньконь келес эряй мокшетненди и эрзятненди. Тя шиня «Россия» Международнай выставкаса-форумса ётафтовсь Мордовия Республикать шиц.
Великай шуфтть—республиканьконь экспозициянц ваксса, кода корхнихть, марьти ашель коза прамс. Морот, кштимат, фкя-фкянь мархта лажадозь корхнемат, лямбе ктморямат… Няевсь кяльс коре радня мархта васедемать эзда ломаттнень кенярдемасна. Теест тя ульсь афкуксонь ила!
Мордовиять шиц ушедовсь оцю экранцта Россиянь Президентть Владимир Путинонь корхтамастонза, коса сон лятфнесь мокшетнень, эрзятнень, шокшетнень колга кода ёню, фкя-фкянь мархта ладяй народонь. Ня валхне, шарьхкотьф, тага васьфтьфтольхть кядень кайги цяпамаса.
Сяльде пуромфнень приветствовандазень Приволжскяй федеральнай округса РФ-нь Президентть полномочнай представителец Игорь Комаров.
—Выставкаса Мордовиясь няфтьф Великай шуфта лаца, конань унксонза—тя мокшэрзянь масторть историяц, ронгоц—тяса эряй ломаттне, лопанза—синь пара тевсна. Тя образсь няфнесы Россиять тяниень историянцты Мордовиять и тяса эряй ломаттнень путксснон. Республикась—национальнай и религиознай согласиянь символ,—шарфтсь мяль сон.
Государственнай Думаса «Единая Россия» фракциять руководителец Владимир Васильев мярьгсь: «Национальностсь—тя оцюдонга оцю вий, странать козяшиц. Тянь колга мярьгсь Президентоньке. Сембе минь кельгсаськ Россиять, сембе кельгсаськ Мордовиять. Мокшэрзятне—асу и великай народ, сембось тинь лиси!»
Мордовиянь Оцюнясь республиканьконди презентациянь тиемста азондсь кода эряй-ащи регионць, мезенкса маряй гордость. Регионть визитнай карточканза—Феодор Ушаковонь храмоц, спортивнай объекттне, Н.П.Огарёвонь лемса МГУ-сь и ламось лиясь. «инвестициятнень касфнемаснон коряс Мордовиясь тяниень пингть занцесы васенце вастть Приволжскяй федеральнай округса и сувси кемонь инь цебярь российскяй региоттнень лувксс,—азозе республикань Оцюнясь.—Келепневихть «Рузаевка» ТОСЭР-ть границанза, республиканьконь столицаса панжеви башка экономическяй зона. «Биохимик» фармацевтическяй предприятияньке ноляй 250-да лама эрь-кодама лекарства, тядде тяса панжевсь фармацевтическяй од производства, а нинге маластонь пингть панжеви Биотехнологиянь федеральнай центра. Сонь работац пяк эрявикс странать лекарственнай безопасностенц кемокстаманкса. Тяда башка, Мордовияса лама предприятияда, конат ноляйхть странати эрявикс продукция: оптоволокна, светотехническяй продукция, ваготт-месть и лият. Республикать гордостень маряма вастоц—велень хозяйствась. Тядде кочкаф сёронь рекорднай урожай—2 миллионда лама тонна! Региононьке лидер органическяй земледелиять коряс, сон странаса панчфонь фкя инь оцю производительсь».
Мордовиясь—тя нинге цебярь васта ваймосеманди. Пефтома паксятне, пангса, иможса козя вирьхне, ёмла ляйхне и эрьхкне… Миньцонк ванфневихть сире пингонь койхне-обуцятне, национальнай ярхцамбяльхне и щапне. «Сембода оцю козяшиньке—минь ломаненьке, трудонь кельгихне и виихне, инголи молихне и фкя вастса аф ащекшнихне, сембе эсь лацоннет, но эрсь пефтома кельгсы шачема-касома масторонц и Россиять!»—мярьгсь Артём Здунов.
Мокшэрзянь крайть мархта сотф ламоц содаф ломаттнень эряфсна. Тя адмиралсь Фёдор Ушаков, лётчиксь—Советскяй Союзонь Геройсь Михаил Девятаев, скульпторсь Степан Эрьзя, врачсь-офтальмологсь Владимир Филатов, историксь Василий Ключевскяй, поэтсь Александр Полежаев, легендарнай певицась Лидия Русланова, философсь и литературоведсь Михаил Бахтин, татарскяй поэтсь Хади Такташ. Мокшэрзяннет унксонза и патриархть Никононь, минь масторсонк эрясь православнай святойхнень ёткста фкясь—Серафим Саровскяй. «Мон тернесайне сембонь мялень салай республиказонк. Самок тяза весть, эвондай мяленте мрдамс одувок. Семботь, мезе минь сатоме, сатоськ Шкайть лезксонц и Президентоньконь ширень кирдеманц вельде. Катк Мордовиясь касонды-вииякшни, штоба тяза сашендольхть ломаттне и кеняртькшнельхть!»—азозе региононь лидерсь.
Мордовиять шинц торжественнайста панжемац поладовсь «Келу» и «Умарина» ансамбльхнень выступленияснон, «Варма» этно-арт-театрать тяниень пингонь мокшэрзянь щамонь няфтеманц мархта. Тяда меле сембе пуромфне тертьфтольхть выставкать ванома. И тясовок ульсть морамат, кштимат, налхксемат, казнень явомат.
Республиканьконь шинц программац аш ни кода козяль. Артём Здунов ульсь экскурсияса Сбербанкть павильонцонза, примась участия «Здоровая Мордовия» конференцияса, васетькшнесь Москуса тонафни студентоньконь мархта, корхнесь, тердезень тонафнемать шумордамдонза меле мрдамс регионозонк. Российскяй кухнянь кудса ётафтовсь мокшэрзянь национальнай ярхцамбяльхнень пидемаснон-панемаснон коряс мастер-класс. Инжихне варжазь цёмаратнень, пачатнень, пярякатнень, офтонь мадятнень. Фермерскяй ярмаркаса ульсь кода рамамс каванямбяльхть кудувок.
«Умарина» ансамбльсь тя шиня няфтезе моронь, кштимань и национальнай щамонь фестивальть, а Культурань кудса тяда меле ульсь «Шумбрат, Мордовия!» Народнай творчествань республиканскяй фестивальть гала-концертоц. Сяльде сембе ванозь мокшэрзянь афкуксонь свадьбать. Тя шиня сире пингонь койхнень-обуцятнень коряс рьвяясть Станислав Пичайкин и Анна Платонова. Ульсь сембось—и рьвянянь ладямась, и симомась-рамамась, и мокшень щапне-каряпне. Оттнень поздравляндазень МР-нь Оцюнясь Артём Здунов. Сон казсь од семьяти 300 тёжянь цалковаень лувксса сертификат.
Шумордавсь Мордовиять шиц «Минь марсотама!» мялень салай концертса, коса кштисть и морасть Мордовскяй филармониянь артисттне, а стане жа «Мерема», «Торама», «Росичи», «Земляки» творческяй коллектифне.
Ули кода азомс—Мордовия Республикать шиц «Россия» выставкаса-форумса удалась!
Ольга Евдокимова.