СЕМИНАРСЬ ПУРОПНЕСЬ ЛАМА ЯЛГАДА

Ветеце августста А.С.Пушкинонь лемса национальнай библиотекась марса А.М.Горькаень лемса Рязанскяй областной универсальнай научнай библиотекать, «Мокшень цёфкст» клубу якайхнень мархта ётафтсь «Мокшэрзянь модать славнай воинонза» лем ала межрегиональнай семинар.
Семинаронь участникнень лемс приветствиянь валхт азсть А.С.Пушкинонь лемса национальнай библиотекань директорсь А.В.Бакулина и Рязанень библиотекаста секторонь вятись Т.А.Хвостова.
Семинаронь участникне покодсть колма направленияс коре. Васенце пялькссь лемтьфоль праведнай воинти Федор Ушаковонди. Тянь коряс презентация тись А.С.Пушкинонь лемса библиотекань главнай библиотекарсь А.А.Рахматуллова.
Программать омбоце пяльксоц лемтьфоль 1945 кизонь Советско-японскяй войнати. Эсонза корхтамась мольфтевсь фронтовикнень эсь прянь аф ужяльдемаснон и мокшэрзянь литератураса тя темать няфтеманц колга. А.С.Пушкинонь лемса национальнай и краеведческяй литературань отделонь вятись Н.В.Бочканова азондсь войнань участникть, генералть М.А.Пуркаевонь колга. Лятфтазень Пуркаевонь колга М.Т.Петровонь, П.В.Прохоровонь сёрмат романцнон-хроникаснон, повестьснон.
Эрзянь писательсь А.М.Лукьянов тюрсь Япониять каршес. Прозаикть сёрматфонзон колга семинарса азондсь С.А.Маскаева. Кайгсь тя темати лемтьф Алексей Мироновичень «Порт-Артур» стихотворенияц.
Мероприятияса примасть участия А.И.Полежаевонь лемса музеень сотрудникне. Поэтсь Г.С.Гребенцов азондсь сянь колга, кодама военно-патриотическяй работа вяти музейсь, мезе путф-няфтьф «Штыкса и пераса» залса, косот Мордовиянь писательхнень-фронтовикнень биографиясна, сёрматфсна. Кайгсть Геннадий Сергеевичень патриотическяй темас стихонза.
Рязанть семинарса няфтезь военнай и мокшень кялень кельги клупне, библиотекарьхне. Синь анокласть мялень салай выступленият праведнай воинть, флотонь адмиралть Федор Ушаковонь колга. Няфтезь Рязанень епархиянь паломническяй центрать. Модераторсь И.П.Криулькина азондсь «Мокшень цёфкст» мокшень кялень кельги клубть колга, мезьса сон заняф, кодама сонь вандыень шиц.
Колмоце пяльксса корхтамась мольфтевсь былинань геройхнень колга. Тя «Варма» этнокультурнай резиденциять проектоц. Семинарса примась участия этно-арт-театрать вятиец Т.Н.Сидоркина. Сон азондсь эсь тевонц квалма, няфтсь «Рузонь былинань геройхне» лем ала алянь щамонь коллекция.
Семинарти тифтольхть итокт. Сонь участниконза отмечазь тя мероприятиять эрявиксшинц историко-культурнай, патриотическяй и просветительскяй ширде.
Надежда БОЧКАНОВА,
А.С.Пушкинонь лемса республиканскяй библиотекань национальнай и краеведческяй литературань отделть вятиец.