«Сенемасу тердян инжихть»

Ётась 24 киза, кода аш ётксонк Мордовиянь Народнай поэтсь, Великай Отечественнай войнань участниксь, «Нардише» романть сёрмадыец Илья Максимович Девин. Но мялямсь колганза эряй ломаттнень седиса. Июльть 20-це шистонза поэтти топодель 100 киза. Тянкса сонь шачема-касома уженясонза Старошайговскяй райононь Сире Теризморга велеса ётафтовсь «Сенемасу тердян инжихть» лем ала ила-пуромкс.
Церькавть и Культурань центрать инголе ладяфоль И.М.Девинонь фотографиянц и стихстонза строчка мархта сенем менель тюсса баннер, тифоль фотографиянди васта. Национальнай культурань центрань хорсь васьфтезень инжихнень «Панжи, панжи лайме порась» мороса, конанди валхнень сёрмадозень И.Девин, а музыкать—
Н.Кошелевась. Сяда тов сембе марса путсть панчфт Народнай поэтть памятниконцты, лямбе валса лятфтазь мокшень содаф ломанть.
Сире Теризморгаса маштыхть инжиень примама. Тянивок Национальнай культурань центрать актовай залоц пяшксель велеряйда, саф инжида. «Асу ломань, велень васень инжи—Илья Девин»,—тяфтама валста ушедозе илать Национальнай культурань центрать директороц Светлана Александровна Видясова. «Ламотне эздонк ся пингть улеме пяк отт, сяс, улема, тяшкава ашеськ шарьхкотькшне, кодама ломатть эряйхть минь вакссонк. Кодама крхкат синь эряфонь и творческяй эшенясна. Тяни, лама кизонь ётазь, минь лиякс ваттама Илья Максимовичень стихонзон смузьснон лангс, лиякс шарфнесаськ «Нардише» романть страницанзон»,—поладозе Светлана Александровна.
Илань панжемань вал максфоль Старошайговскяй райононь оцюнять заместителенцты Наталья Александровна Жевлаковати: «Илья Максимович Девин тага кочкамазь марс, ялгань келес Сире Теризморгав. Мзярс минь эрятама, мяляфтсаськ земляконьконь и ёратама ванфтомс сонь колганза мялямть поколенияста поколенияс. Тяда инголе минь ётафнеме лятфнемань пуромкс И.М.Девинонь кулома шиста. Тя кизоня ётафтоськ шачема шистонза. Карматама тя койть кирдема-ванфтома сяда товга. Седи ваксста сюконян Сире Теризморгань Национальнай культурань центраса покодихненди тевснон инкса».
Лятфнемань васедемати састь Илья Максимовичень раднянза, ётксост стирец Ольга Ильинична. Сон сюконясь сембонди и мярьгсь, што пяк мялезонза, мес алянц колга аф юксневи, колганза азондови поколенияста поколенияс.
РФ-нь культурань Заслуженнай работниксь, Национальнай культурань центрать ингольдень вятиец Нина Михайловна Кадерова лятфтазе: «Мон содайне Илья Максимовичень 60 киза. Мзярс работань Национальнай культурань центраса, сон аф кржа тейнек лездсь. Тячи тага кайгихть сонь строчканза «Сенемасу тердян инжихть». А Илья Девинонди Сенемассь—тя Сире Теризморга велесь. Сон сидеста сашендсь центразонк инжикс и сидеста сонць тернесь инжихть, сяс мес тяса мушендсь крхка лихтибря тяштеманцты. Марнек республикаса кивок Девинонь лаца тяфтама лац ашезь корхта мокшекс. Илья Максимович пяк кельгозе розень кшить таньфонц. Сон няйсь лама нужада, но, аф ваномок тянь лангс, ульсь ляпе вайме ломанькс».
Писательсь, журналистсь, общественнай деятельсь Николай Леонидович Храмов вов мезе азсь марнек Россияти содаф земляконц колга: «Минь семьясонк ульсь 9 шабат. Кажнайсь содазе И.М.Девинонь творчестванц. Алязе идькс пингста кошярямазь лувомс «Нардишенц» педа пес. Шять, сонь произведениянзон инкса пяле семьяньке и тусь тонафнема филологическяй факультету. Тейне сон ульсь аф аньцек сёрмады, сон ульсь журналистонь и писателень тевса шкай».
Юрий Александрович Мишанин Россиянь сембе мокшетнень и эрзятнень эзда азсь Национальнай культурань центрань сотрудникненди сюконямань валхт сире коень кирдеманкса и ванфтоманкса. Сон лятфтазе, што «И.М.Девин содаф аф аньцек кода поэт и писатель, а, васенцекс, кода ёню ломань, конань валонзон кулхцондозь оцю кабинеттнень эса. А валонза аф фалу тушендсть оцюнятнень мяльс, оржатольхть. Мезень колга арьсесь, сянь колга и корхтась. Вестевок ашезень юксне велеть и велеряензон».
Илась ётафтовсь лятфнемань-концертонь лаца. Ушетксста Национальнай культурань центрась няфтсь кунардонь пингонь рьвянянь ладямань кой. Сяльде сембе инжихнень лемс морась «Мокшаваня» Сире Теризморгань ансамбльсь. Мокшень, эрзянь, рузонь морот казсть Артём Мамаев и Сергей Фудин. И.М.Девинонь стихотворениянзон лувозь велень школань тонафнихне, а стане жа «Современник» Саранскяень поэзиянь клубонь участникне. Лямбе валхт поэтть-землякснон колга азсть Мордовиянь Заслуженнай поэтсь Рая Орлова, А.С.Пушкинонь лемса библиотекань сотрудниксь В.И.Пронина и лиятне.
Илья Максимович Девинонь произведениянза кизоста кизос арайхть нинге сяда вешевикст. Сон ётазень войнань стака китнень, ульсь военнай фельдшеркс. «Нардише» романцонза азонды Сире Теризморга велеса войнань мельдень кизотнень колга. Синь эрявихть мяляфтомс. Кода сонць поэтсь мярьгсь: «Кодак аньцек минь юкстасаськ Великай Отечественнай войнать, эстокиге ушеды од война».

О.Белкина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...