Сергей Фудин: «Морось тейне— виень-эрьгянь лихтибря»

Кода ломанть эса эвондакшни асушись? Уленди, тя или тона ширеть коряс смузюкс арсихть эрязь, а кой-кит шачендыхть оцю талант мархта. Тяфта лиссь и тячиень героеньконь, од морсить Сергей Фудинонь мархта. Улема, сонць природась казезе мокшень цёрать мазы вайгяльса, морамань асуса. Республикасонк Сергеень лемоц сатомшка содаф ни. Сон терневи морама ламоц илатненди, коса ваныхне фалу казендихть теенза кядень кайги цяпамат.

—Морси ломатть родсонк-плямасонк аш,—азозе цёрась.—Алятне миньцонк сембе шофёрхт, аватнень ётксовок артистт аш. А мон ёт мяляфтса прязень, пяк кельгине морамазень.
Сергей хуш шачсь Саранскяйса, шабакс лама пингта ётафнесь Инсарскяй райононь Верхняя Лухма мокшень велеса, костонне шачемас-касомас коре сонь тядяц. Тяса и кайгозевсь васенцеда мазы вайгялец. Аньцек моразеви гармониясь, а ёмла Сергейнясь, ванат, тяса ни кштий-морай оцюфнень коряс аф сяда кальдявста. Сембода пяк кельговсть теенза сиде моронятне. Мзяра содай эздост мокшень цёрась, афи лувовихть. Кода азозе сонць Сергей, ёмласта лама ломанень инголи морама лисендсь аф эстокиге, виздсь. Васенце кулхцондыкс теенза най ульсь щавац. Тонафни-тии од мора, арай сиренять инголи, кулхцондомак, кле. Ся кулхцондсы, а сяльде азсы мезсь аф стане, кода сяда парста ладямс вайгяленц. И аньцек тяда меле цёрокшсь лисендсь морама ялга ёткс.
Школаса С.Фудин ульсь «тяштенякс». Ашель стама ила, коса сон афоль прима участия. А 10 класса тонафнемста ялганзон мархта нльне пуропнесть вокально-музыкальнай ансамбль. Ся пингти мокшень цёрась морась аф аньцек кургса, маштсь гитарасовок. Тя тевса сон, кода корхнихть, самоучка. Сергей хуш и якась музыкальнай школав, нотатне-месне теенза аф азовомшка ашесть кельгов. Музыкальнай инструментса морама сон тонафнесь лия морайхнень лангс ванозь. Цёрать пяк цебярь слухоц, аньцек кульсы мелодиять, эзк кочкасы сонь гитарань струнатнень или гармониянь пунятнень мархта.
Аф ваномок сянь лангс, што мораманц Сергей кельгозе нинге ёмласта, артистокс улемать колга мзярдовок ашезь арьсекшне. Школада меле ёрась поступамс аграрнай институту и сотомс эряфонц велень тефнень мархта. Тяфта и тиель, улема, кда тядяц афолезе кошарда молемс Национальнай культурань институту няфтемс прянц. Тоса вчек ся пингть ётафтовсь панжада кенкшень ши. Мольсь и поступась. Цёрась примафоль дирижёрско-хоровой отделенияв.
ИНК-са тонафнемста и панжевсь педа-пес морамань асувоц. Васенце курсса ни Сергей Фудин ушедсь морсема «Мерема» этнографическяй фольклорнай студияса. Эрь кизоня примсесь участия «Морак, гармония!», «Шумбрат, Мордовия!» Народнай творчествань республиканскяй фестивальхнень эса и лама лия иласа-конкурсса. Улендсь эрь кодама мероприятияса лия регионцовок: Пензаса, Ульяновскяйса, Нижняй Новгородса, Самараса, Чебоксарыса, Татарстанца, Башкортостанца, Волгоградса, Омскяйса, Астраханьца, и омба масторса—Эстонияса, Финляндияса. Тяни мокшень цёрась покоди Лямбирскяй райононь Александровка велень клубса. Морси дуэтса од, но эсь лацонза асу исполнительть Артём Мамаевонь мархта. Цёратнень вайгяльсна пяк ладяйхть фкя-фкянди, а кда нинге гармониянь мелодиясь шовори ёткозост, эста аньцек и кулхцонкшнелеть эсост.
—Морось тейне виень-эрьгянь лихтибря,—азозе Сергей Фудин.—Аньцек моразеван, ваймозон эзк арси сетьме и лямбе, юксневихть пичефксне, прябалатне. Надиян, што тя лямбонясь пачкотькшни кулхцондыхнендивок.
Афи азови моротнень лувкссна, конатнень содасыне мокшень цёрась. Нят рузонь и мокшень морот. Но эстеенза, кода виденцясь, сяда кельговихть мокшеннетне, седити, кле, синь сяда малат.
—Кда морамста арьсемс мезень-бди лиянь колга, мелодиясь ули аф сяшкава мазы, туй кичкорязь,—азозе Сергей Фудин. Эряви, кле, сонь марямс ваймосот. Эста лиятневок ушедыхть кулхцондома кашт аф молезь.


О.Евдокимова.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...