Шкабавазсь казезень мазы вайгяльса

Финно-угрань народонь интеллектуальнай творчествань фестивальса, кона аф кунара ётафтовсь Саранскяйса, улема, ламотне шарфтсть мяль мокшаватнень Наталья Егоровна и Анна Ивановна Канинатнень лангс. Тядят-стирьхть састь Москуста мокшень щамса, ичкозе кулевсть пайгоняснон цингордомасна.
«Мокшень панарть лангстон аф кайсеса. 9 ноябрьста выступандань Москуса, а 10 ноябрьста сань фестивальс Саранскяи. Панарть, сапонять, коняфксть, сюлгамть, копорь цёконятнень—семботь тиендьсайне монць»,—азозе Н.Е.Канина.

Наталья Егоровна шачемас коре Атюрьевскяй райононь Атерь велеста. Школать шумордамдонза меле тонафнесь Зубово-Полянскяй педагогическяй училищаса. Сяльде работась идень садса воспитателькс. Сяда тов арась райпонь руководительти кадратнень коряс заместителькс. Кемонь кизот вятсь кувалгофтф шинь группа и технологиянь урокт Атерень 2№ школаса.
Савсь кадомс школать и шачема веленц, сяс мес ёмлаль зарплатась. Тусь эряма Москуву. Тянивок тоса работай эсь профессиянц коре—семейнай воспитатель.
Фестивальть пингста Наталья Егоровна казсь тейне рузонь кяльса «Книга стихов о любви» стихотворениянь сборник. Эзонза сувась аф фкя авторонь произведения, кемоттне эздост сонцень мокшавать. Тяни аноклай стихт нинге фкя сборниконди.
«Стихотвореният тяшнян 1-це класста сявомок. Мокшекс, ужяль, аф сёрмадан. Тядяне-аляне идькс пингстон сявомазь эряма Воркутав. Мзярда мрдаме меки Атери, повонь тонафнема рузонь классу. Сяс лац-ряц аф содаса аф мокшень грамматикать, аф сянь, кода литературнай кяльса тяштевихть мокшень валхне. Сяка варчсесайне вийнень. Тя фестивальти васенцеда сёрмадонь стихотворения шачема кяльсон. Тейне эряви сяда лама морафнемс мокшень литература.
Рузонь ламоц стихотворенияне лемтьфт содаф ломаттненди, кепотьксонди, Мордовиянь Заслуженнай артисткати В.И.Прохоровати. Аф кунара ётафтыне рузонь кяльста мокшеннес В.Барковонь и Л.Ганинань «Живи, Мордовия моя!» мороснон. «Мон содан мазы лама край, но седись кельги тонь»—тя мороть эзда валрисьмотне прясон тянивок»,—азозе Н.Е.Канина.
Московскяй областень Мытищи ошса сон морси «Валдоня» ансамбльса. Коллективсь сувси Мытищинь Культурань департаментти, а стане жа—Моску ошень Мокшэрзянь землячествати. Сяс, кда Москуса ётафтови кодамовок ила, «Валдонясь» фалу примси эсонза участия. Инголи Н.Е.Канина морсесь «Баяраваня» ансамбльса, кона Люберцы ошса. Но ичкозе арнемать инкса кафта кизода инголе мокшаватне кочказь синцень ансамбльснон Мытищиса. Эзонза сувсихть 5 ломатть: синдедост башка нинге украинскяй фкя цёра, кона тонафни Москуса опернай певецокс. Тядде «Валдоня» ансамбльть колга «Первый Мытищинский» телеканалсь нолдась репортаж. «Минь марсотама» проектсь аноклафоль Общественнай палатать лезксонц вельде и лемдевсь Мытищиса эряй нароттнень историяснонды и койснонды.
«Мокшень кяльсь, кода тядянь лофцсь, эряви ломанти кожф лаца. Москуса эрямста пяк лажаткшнян Мордовияти. Сяс пяк пара мялезон ня шитнень улемс кельгома республикасонк. Эстокиге маряви сонь лямбошиц»,—мярьгсь Наталья Егоровна.
Кода корхнихть, марьсь марлють эзда ичкози аф прашенды. Лацонза ёню, асу и мазы Наталья Егоровнань стирец Анна Ивановна Канинась. Аф ваномок сянь лангс, што сон работай банкса, творчествати сяка мушенды ётка пингоня. Тядде ушедсь варчсемост виензон стихотворениянь тяштемаса. Васенцесь лиссь английскяй кяльса. Мокшень стирсь якась омба масторонь кяльть коряс курсс и тоса ладязень валхнень рифмас.
«Стихотворениянень оцюшкасна сёрматфт рузкс. Сембе получасть авторонь прават, тяни аноклан сборник. Ламонцне лемдевихть кельгомати. Тяшнень тядязти лемтьф стихт и мора. Ётка пингстон сёрмадан ломаттнень психологическяй потмоёжеснон колга эссет, сяс мес тя эряви омбоце высшай образованиянь получаманкса, мон тонафнян психологокс-практикокс.
Сидеста улендян тядязень мархта Мокшэрзянь землячестваса. Кой-мзярда морсян «Валдоня» коллективса. Тя нинге сяда кепсесы мялезень. Интеллектуальнай творчествань фестивальть пингста повонь Мордовиянь Народнай писательть, содаф драматургть В.И.Мишанинать секцияс. Оцю мялезе варжамс вийнень драматическяй произведениянь тяштемаса. Ужяль, литературнай кяльть содаса кальдявста, 12 киза ни эрян Москуса. Эряви сяда сиденяста сашендомс шачема-касома Атерь велезон»,—мярьгсь Анна Канина.
О.Белкина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...