Тядде Саранскяйса нилецеда ётафтови «Морай шуфта» шуфтста керсиень Межрегиональнай фестивальсь-конкурссь. 26 июньцта сявомок 30 июнти молемс «Мокшэрзянь подворье» музейно-этнографическяй комплексть маласа эвондакшнихть скульптурат шуфтста. 2022 кизоня фестивальса примайхть участия мастерхт Россиянь 8 региоттнень эзда: Мордовияста, Удмуртияста, Чувашияста, Самарскяй, Пензенскяй, Ульяновскяй, Московскяй областтнень эзда, а стане жа Москуста.
Фестивальть-конкурсть тяддень темац лемтьф нароттнень ялгаксшиснонды, а целайнек фестивальсь шарфтф Поволжьянь и Мордовиянь нароттнень койснон ванфтомаснонды. Фестивальть шумордамдонза меле пингстонза тиф скульптуратнень путсазь Лямбирскяй райононь Аксёново вели и няфтьсазь велень Всероссийскяй Сабантуень инжихненди.
Кизоста кизос пялькстомать ётафнесы Мордовскяй (мокшень и эрзянь) народть Межрегиональнай общественнай организацияц. Сонь председателец Ю.А.Мишанин фестивальть-конкурсть панжемста мярьгсь, што тядде пяк стака ульсь мумс скульптуранди материал. Шуфттнень савсь ускфтомс Теньгушевскяй райононь Барашево велеста.
«Кеман, тячи тяза пуромсть Россиянь инь вии мастерхне, конат тиихть стака и эрявикс тев. Скульптуранте мазоптьсазь аф аньцек ошеньконь, но и Аксёново татаронь велеть»,—мярьгсь Юрий Александрович.
Ламоц мастерхне няфтьсазь маштомошиснон Саранскяйса аф васенцеда. Шуфтста керсить Евгений Акимовонь тифонза нинге меляста сявомок ащихть Мокшэрзянь подворьяса. 1990 кизотнень скульптуранзон мархта сон якась Англияв, Шотландияв, Литвав, Польшав и лия странатненди. Чувашияста саф мастерть юронза Атяшевскяй районцта. Ня 4 шитнень пингста сон ёрай тиемс шуфтста «Эрзянка» скульптура.
26 июньцта, «Морай шуфта» фестивальть-конкурсть панжема шистонза, приветствиянь валхт сембе участникненди азсть Мордовия Республикань культурань, национальнай политикань и архивнай тевонь министрсь С.Н.Баулина, Мордовиянь Народнай художниксь А.Н.Баргов, лиятне.
О.Белкина.