«Шумбрат» фестивальсь—Оркино велеса

Арась пара койкс ётафнемс Россиянь региоттнень эса «Шумбрат» мокшэрзянь национальнай илат. Аф кунара, 24 сентябрьста, тяфтама праздник ульсь Саратовскяй областень Петровскяй райононь Оркино велеса.
Культурань кудть инголе площадсь тя шиня арсесь мокшэрзянь культурань и бытонь няфтема вастокс. Областень эрь кодама районца эряй мокшетне и эрзятне няфтезь декоративно-прикладной искусствань выставкаснон, каванязь пуромфнень национальнай ярхцамбяльса, няфтсть народнай промыслатнень и ремеслатнень коряс мастер-класст. Спортивнай площадкать лангса шабатненди ётафтовсть национальнай налхксемат. «Лисьмене» мокшэрзянь моронь ансамблень аватне аноклакшнесть «Овощное изобилие» лем ала мялень салай фотозона.
Кшиса-салса васьфтьфтольхть Мордовия Республикань, Саратов ошень и Саратовскяй областень муниципальнай райононь инжихне.
«Шумбрат» фестивальсь ушедовсь Оркино велень Великай Отечественнай войнаса шавф воиттнень памятникснонды панчфонь путомаста. Сяльде панчфоль мемориальнай доска А.С.Кузнецовонди. Александр Сергеевич—Оркино велеса национальнай культурань центрать, Поволжьянь мокшэрзятнень культураснон и бытснон музейснон, мокшэрзянь моронь «Кучугуры» ансамбльть пуроптысна-панжисна.
Фестивалень участникненди приветствиянь валхт азсть Саратовскяй областной Думань оцюнясь, депутатсь Сергей Чередников, внутренняй политикань и общественнай отношениянь региональнай министрть заместителец Виталий Шустов, Саратовскяй областень Петровскяй райононь оцюнясь Александр Гречихо, Саратовскяй областень «Шумбрат» мокшэрзянь национально-культурнай центрать председателец Валентина Кривошеева. Мордовияста илас сашендсть Мордовскяй (мокшень и эрзянь) народонь Межрегиональнай общественнай организациятьпредседателец Юрий Мишанин, а стане жа «Мерема» этнографическяй фольклорнай студиясь, кона кеняртьфтезень пуромфнень аф аньцек мокшень и эрзянь мороса, но и няфтсь мастер-класст. Культурань кудть сценанц лангса стане жа кштисть-морасть муниципальнай райононь самодеятельнай артисттне и творческяй коллектифне.
Илать пингста ётафтфоль-няфтьфоль сире пингонь лама обряд, конатнень ёткса родонь-плямань штатолть крьвястемац. Меколи максфтольхть казнет фестивалень участникненди—ломаттненди, конат кородозь ванфнесазь национальнай культурать, койхнень-обуцятнень.