Кода содаф, «Шумбрат» мокшэрзянь национальнай культурань илась тячи келиста ётафневи межрегиональнай, региональнай и районнай уровеньца странань пцтай эрь регионца, коса компактнайста эряйхть мокшэрзят. Няевикс вастса тяфтама региоттнень ёткса ащи Ульяновскяй областсь. Тоса мокшэрзянь национально-культурнай автономиянь председателень тефнень вятьсыне В.А.Софонов.
Кода пачфтезе тейнек Владимир Анатольевич, «Шумбрат» мокшэрзянь национальнай культурань илась, Ульяновскяйса межрегиональнай форматса ётафтомдонза меле, ульсь Барышскяй райононь Живайкино велеса.
Велеряйхнень и инжихнень «Шумбрат» илать панжемста лямбоста поздравляндазень Барышскяй райононь оцюнясь А.В.Терентьев. Эсь выступлениясонза сон тяфта жа макссь оцю питне мокшэрзянь «Шумбрат» илать национальносттнень ёткса ялгаксшинь соткснень ладямаснонды.
Сяльде А.В.Терентьев Почётнай дипломса и питни казнеса казезень трудса сатфксонкса-путксонкса велень хозяйствань, здравоохранениянь, культурань и райононь лия сферань труженикнень.
Илас сафненди няфтьфоль культурнай козя программа, конань аноклазь райононь «Псьмар», «Баярава», «Звонница», «Баварушка» мокшэрзянь, рузонь, чувашень национальнай моронь и кштимань коллектифне. Илать пингста тяфта жа ётафтовсть мокшэрзянь ремеслань и промыслань изделиянь выставкат и синь тиемаснон коряс мастер-класст.
Пуромфнень мяльс пяк тусть мокшэрзянь суронь пачатне, позась и лия ярхцамбяльхне-симомбяльхне, мезьса синь каванязь илань аноклайхне-ётафтыхне.
Оцю мяльса пуромфне тяфта жа ванозь книгань выставкатнень. Синь «Эряк, мокшэрзянь народ» и «Национальнай книгась—мокшэрзянь народть гордостец» лем ала аноклазь Живайкино велень библиотекарьхне. Ня книгатнень эса азондови мокшэрзянь народть историянц, коензон-обуцянзон, фольклоронц и языческяй кемаманзон, а тяфта жа тяниень пингонь искусстванц и литературанц колга.
В.ИОСИФОВ.