«Шумбрат» илась—Оцю Березникаса

24 августста Оцю Березники районнай центраса ётафтовсь «Шумбрат» межрегиональнай национальнай фольклорнай илась, кона пуропнезень мокшэрзянь краи ломаттнень Россиянь сембе уженятнень эзда. Тяза сафтольхть инжихть Алтайскяй крайста, Санкт-Петербургста, Москуста, Чувашияста, Сургутста, Мордовиянь райоттнень эзда. Праздниксь афкукс мялень салаель, сембе ширде удалафоль. Оцю Березникаса шиньберьф кштисть-морасть. «Шумбрат» илати ушеткс путфоль Оцю Березникань культурно-досуговай центраса. Райононь эряйхнень, илас саф инжихнень седи ваксста поздравляндазень Мордовия Республикань Оцюнясь Артём Здунов.
—Тя илась—минь достоянияньке,—азозе Артём Алексеевич.—И тя пяк цебярь койсь эряви ванфтомс, виияфтомс, штоба сонь колганза содальхть минь иденьке, уноконьке. И кие ётафнесыне, аноклакшнесыне ня илатнень, тии пяк оцю и эрявикс тев. Тейнек эряви улемс марса. Тянь лац няфтезе «Мы вместе!» национальнай культурань и креативнай индустриянь од ломанень III Всероссийскяй фестивальсь, коса примасть участия Россиянь лама регион. Тя тевсь вятема сяда тов. Ладяма туризмась. Ломаттненди эряви няфтемс Мордовиясь, инжиеньконди эряви азонкшнемс мокшэрзянь краеньконь колга. А туфталхт Мордовияв самс улихть. Сай кизоть топоди 150 киза С.Д.Эрьзянди. Улихть лия оцю мероприятият. И синь эсост няфтемат коеньке, мазы щамоньке-карямоньке.
А кодама ила казнефтома.
Тя национальнай фольклорнай праздниксовок отмечафтольхть ся ломаттнень трудсна, конат сатсть аф ёмла сатфкст наукаса, культураса, общественнай тевса. Максфтольхть Почётнай званият, знакт, Грамотат, Благодарностть. Кепотьксонди, Мордовия Республикань культурань Заслуженнай работникокс арасть Е.Н.Ломшина, В.П.Кудашов, Е.Г.Миронов. Мордовия Республикань Почётнай грамотаса казьфтольхть С.А.Косынкин, Ю.И.Ерёмина. Оцю казнет Республикань Оцюнять эзда получасть М.Е.Евсевьевонь лемса МГПУ-нь преподавательсь, содаф учёнайсь Е.И.Азыркина, В.Н.Кияев, В.И.Кривошеева, П.И.Тюрькина. Благодарностьса и питни казнеса отмечафоль Маркиттнень семьясна, коса касфтыхть ниле итть.
Сай кизоть «Шумбрат» межрегиональнай национальнай фольклорнай илась ётафтови Ардатовскяй районца. И лемдеви сон С.Д.Эрьзянь 150 кизонь топодеманцты. Сон ётай кафта площадкава: Ардатоваса и Баева велеса. Койс коре крьвястьф штатолть, праздникть символонц, Оцю Березникань райононь оцюнясь А.Ломаткин максозе Ардатовань райононь оцюняти А.Антиповонди.
Оцю илань участникнень поздравляндазень Мордовия Республикать эзга Главнай федеральнай инспекторсь Анатолий Гулин.
А меле «Шумбрат» межрегиональнай национальнай фольклорнай праздниксь поладовсь Оцю Березникань Ю.А.Гагаринонь лемса культурань и ваймамань паркса. Тяса инь няевикс вастса ащи стендсь, кона пачфнесь сянь квалма, што Оцю Березникати 400 киза.
Оцю Березникань райононь эряйхне тя праздникти анокласть ламос. Тя лац няеви стенттнень, палаткатнень эзда. Тяса лама азонтфоль «Сурскяй рубежть», районть историянц квалма. Райононь машты кядь ломаттне мезе аньцек ашесть няфте. Ульсть шуфтста керсеф работат, кодама повсь сувенирхт. Музь эсь вастснон Ю.А.Гагаринонь лемса паркса «Морай шуфта» («Поющее дерево») пялькстомань участникнень работасна. Мокшэрзянь народть межрегиональнай общественнай организацияц максозень ня работатнень казненди. Синь эздост сембоц сисем. Эрсь кеподи мяль. Шуфтста керси мастерхне работасть лангсост пцтай недяля. Ломаттнень кеподезь мяльснон «Мокшанка» (авторсь Е.А.Акимов, Чувашия), «Семья» (авторсь Н.Н.Аношкин, Нижняй Новгород), «Старик-мудрец» (авторсь А.Г.Кошкин, Чувашия), «Пургаз» (авторсь А.П.Туркичев, Пенза), «Эрзянка» (авторсь Г.Е.Миронов, Мордовия), лия работатне. П.В.Рябов эсь трудонц лемдезе мокшэрзянь модань национальнай геройхненди. Тяфтамкс лувондови С.Д.Эрьзя, конань 150 кизонь юбилеенц сай кизоть отмечасы марнек мирсь.
—Сембе работатне пяк достойнайхть,—корхтай Мокшэрзянь народть межрегиональнай общественнай организациянц вятиец Ю.А.Мишанин.—Мастерхне путсть лама труд. Минь Саранскяйста ускоськ Оцю Березникав. Тиеме оцю и пяк питни казне райононь эряйхненди.
Казнефтома «Шумбрат» иласа кивок ашезь ляда. Мордовия Республикать эзда Федерациянь Советонь сенаторсь Петр Тултаев лама лямбе валда азсь «Шумбрат» илань участникнень и ётафтыхнень лемс. Тяфтама праздникне эрявихть ётафнемс.
Ломаньда сась пяк лама. Эрь народти эряви няфтемс эсь культуранц, коенза-обуцянза. А коса няфтьсак, кда аф тяфтама илатнень эса. Ульсть и казнет сенаторть эзда СВО-нь участникти, «Келуса» морай артисттненди.
Благодарностень валхт азсь илань ётафтыхнень лемс и Мокшэрзянь народть межрегиональнай общественнай организациянц вятиец Юрий Мишанин. Трудта путф пяк лама. Старандасть сембе. Ашесть ляда шири райононь велень поселениятне.
Кефкие велень поселения примась участия «Шумбрат» иласа. Паракинань, Марьяновкань, Шугуровань, Косогоронь, Сире Найманонь и лия поселениятне пидесть-панцть национальнай танцти ярхцамбяльхть: пачат, цюкорнят, цёмарат, копшат… Синь мархтост каванязь кода райононь эряйхнень, стане и ширде саф инжихнень.
Шиньберьф кайгсть морот, кштимат Оцю Березникаса. Фестивальсь макссь ломаттненди оцю надияма, вандыень шити верондама, вийхть. А нинге инжихне няезь, кода эряйхть-ащихть тястонь ломаттне, кодапт синь щамсна-карямсна, койсна-обуцясна.
Илья Вешкин.