Кода содаф, мокшетне и эрзятне эряйхть аф аньцек Мордовияса, но и странань лия региоттнень эса и омба масторсовок. Аф кржа кяльс коре раднядонк Саратовскяй областьса. И мезсь кеняртьфти, синь аф юкснихть эсь юрснон колга, ширеса эрямстовок ванфнесазь кяльснон, культураснон, койснон-обуцяснон.
Ня шитнень Саратовскяй областень Оркина велеса ётафтовсь «Шумбрат» мокшэрзянь культурань и бытонь Межрегиональнай фестиваль. Тяза пуромкшнесь лама инжи Россиянь эрь-кодама уженяста, тяконь лувксса Пензенскяй, Свердловскяй, Челябинскяй областтнень эзда и Мордовия Республикаста. Мероприятияса ульсть РФ-нь Государственнай Думань депутатсь, мокшалясь Виктор Кидяев, Саратовскяй областень Петровскяй райононь оцюнясь Александр Гречихо, Мордовскяй (мокшень и эрзянь) народть Межрегиональнай общественнай организациянц председателец Юрий Мишанин. Республикастонк илас стане жа якасть творческяй коллективоньке—«Умарина» моронь и кштимань государственнай ансамбльсь, «Ламзурь» и «Тяштеня» коллектифне.
Фестивалень основной событиятне ётафтовсть Александр Кузнецовонь лемса Мокшэрзянь национальнай культурань центрать инголе. Александр Сергеевич тя ся ломанць, кона ульсь Оркинаса национальнай культурань кирдикс-ванфтыкс. Сонь виензон мархта панчфоль Культурань центрась, пуроптфоль «Кучугуры» мокшэрзянь моронь ансамбльсь. Илас пуромфне путсть панчфт Александр Кузнецовонь лемс панчф мемориальнай доскати, а стане жа Великай Отечественнай войнаса шавфненди памятникти.
Культурань центрать маласа инжихне васьфтьфтольхть козя ярмаркаса. Тяса эсь тифксснон, пидефснон-паньфснон, кодафснон-стафснон няфтезь Пензенскяй областень Петровскяй, Советскяй, Ершовскяй, Татищевскяй райононь мокшэрзятне, а стане жа лия национальностень представительхне. А Центрать фойесонза ётафтовсть шуфтста керсемать, сёвоньцта налхкшень тиемать, някань-оберегонь стамать коряс мастер-класст. Тяса инжихнень кепотьф мяльса, седишкада васьфнезь Саратовскяй областень «Шумбрат» мокшэрзянь национально-культурнай центрать председателец Валентина Кривошеева и Культурань кудонь сотрудникне. Тяда меле илась поладовсь Центрать залсонза. Концертнай программать панжезе «Умарина» кштимань и морамань государственнай ансамбльсь. Илань участникненди пачфтьфтольхть поздравлениянь лямбе валхт Финно-угорскяй нароттнень Ассоциацияснон председателенц Пётр Тултаевонь эзда. Тяда меле Оркинань инь сире эряйсь Нина Лаврентьевна Шнякина крьвястезе родонь-плямань штатолть. Почётнай инжихне явсть казнет, Благодарностть Оркинань и Саратовскяй областень эряйхненди, конат тиендихть оцю путкс мокшень и эрзянь кяльхнень, культурать, койхнень-обуцятнень ванфтомаснонды, лама тиендихть сянкса, штоба афольхть сязев республиканьконь мархта сотксне.
Сяда тов илась поладовсь мялень салай концертса, коса морасть Оркинань «Кучугуры» коллективсь, Мордовиянь «Ламзурь» и «Тяштеня», Пензенскяй областень «Яксярочка» ансамбльхне и лия артисттне.
Ольга КОЛЕДИНОВА.