14 майста Пензань Спутник ошса Мокшэрзянь культурань областной центрась омбоцеда ётафтозе «Шумбрат» национально-фольклорнай илать.
Сура ляйть трваса Фонтаннай площадьса кочксевсть инжихть Пензенскяй областень сембе уженятнень эзда, лия регионцта.
Шумбракстомань валхт пуромфненди азсть Пензенскяй областень внутренняй и информационнай политикань министрсь Павел Маслов, Пензенскяй областень культурань и туризмань министрть тевонзон тиендисна Ильдар Мавлюдов.
«Национальнай политикать инь оцю вешфксоц–ванфтомс Россиянь нароттнень койснон и обуцяснон. Тянь мархта, кода няйсаськ, лац работайхть Пензенскяй областень общественнай организациятне, кирдихть соткст шабрань региоттнень мархта. Тянкса сембе активисттненди, организаторхненди оцю сюкпря!»—мярьгсь Павел Маслов.
«Культурась—тя васенцесь, мезсь марстоптсыне Россиянь нароттнень. Пензенскяй областьса эряйхть 80-да лама национальностень ломатть. Тячи тя иласа улихть и лия государствань представительхть, конат мокшэрзянь культурать вельде араласазь странаньконь культуранц и историянц»,—мярьгсь Ильдар Мавлюдов.
«Шумбрат» национально-фольклорнай илати Саранскяйста сашендсь Мордовскяй (мокшень и эрзянь) народть Межрегиональнай общественнай организациянц председателец Юрий Мишанин. Сон лятфтазе инжихненди, што историяс коре Мордовия Республикась и Пензенскяй областсь пяк сотфт фкя-фкянь мархта.
«Тяса, Пензань модать лангса, шачсть-кассть мокшэрзянь литературань ламоц классикне, интеллигенциясь. Пензенскяй областьса лисендсть «Од веле» мокшень кяльса васенце газетась, «Валда ян» журналсь. Пяк пара, мес тяниень пингтьке ня койхне вятевихть, работайхть общественнай организацият, кирдихть соткст властень оргаттнень мархта»,—мярьгсь Юрий Александрович.
Лямбе валхт Ульяновскяй областень мокшетнень и эрзятнень эзда азсь Ульяновскяй областень мокшэрзянь автономиять председателец Владимир Софонов. Сон тердезень сембе инжихнень Ульяновскяи, коса 27 майста кемонцеда ни ётафтови «Шумбрат» илась.
Мордовияста коллектифне и морайхне: Г.И.Сураевонь-Королёвонь лемса «Келу» фольклорнай ансамбльсь, «Мерема» этнографическяй фольклорнай группась, «VARMA» этно-арт-театрась и Андрей Бочканов няфтсть мялень салай концерт. Стане жа ульсть Пензенскяй областень мокшэрзянь коллектифне: «Лучинушка», «Умарина», «Ялгат» и лиятне.
Илать пингста работасть выставкась-ярмаркась, национальнай ярхцамбялень выставкась-дегустациясь, паксянь кухнясь.
Оксана Белкина.