31 майста «Шумбрат» илать васьфтезь минь шабраньке Ульяновскяйса. Пара койс коре инжихнень васьфтезь Владимирскяй садса. Праздникса выступандасть минь артистоньке, тяконь лувксса «ВАРМА» моронь и кштимань ансамбльсь. Тяда башка, ульсть мокшэрзянь народонь декоративно-прикладной творчествань этно-выставка, Ульяновскяй областень эрь-кодама райоттнень эзда национальнай творческяй коллектифнень выступлениясна, мокшэрзянь национальнай подворьянь выставкась.
Мероприятияса примась участия Ульяновскяй областень губернаторсь Алексей Русских.
«Инжиень примай «Шумбратсь» койс коре васьфтьсыне инжихнень Владимирскяй садса. Эряйхне васьфтьсазь сонь эсь лацонь шиня—Ульяновскяй областень Народонь ялгаксшинь шиста. Илас сашендсь Мокшэрзянь народть Межрегиональнай общественнай организациять председателец Юрий Мишанин. Азан благодарностень валхт национально-культурнай автономияньконди, сонь председателенцты Владимир Анатольевич Софоновонди, мокшэрзянь народть Межрегиональнай общественнай организациянцты межнациональнай согласиять кемокстаманкса, культурать ванфтоманкса, патриотическяй и просветительскяй работанкса. Кирттяма кеме соткст шабрань регионть—Мордовиять мархта. Мордовия Республикань Оцюнясь Артём Алексеевич Здунов азсь сембе инжихненди приветствиянь валхт»,—сёрмадсь эсь телеграм-каналсонза Алексей Русских.
Артём Здунов азсь благодарностень валхт шабраньконди: «Минь шабраньконди оцю Шумбрат Мордовиянь эряйхнень эзда! Ульяновскяй областсь, Народонь ялгаксшинь шить мархта!»