Ноябрень васенце шитнень «Шумбрат, Мордовия!» XXIX Республиканскяй народнай творчествань фестивальть-пялькстомать эстафетанц сявозь Торбеевскяй и Рузаевскяй райоттне. А сяльде эсь концертонь программаснон няфтезь Краснослободскяй, Кадошкинскяй и Теньгушевскяй райоттне.
Торбеевскяй районць
Саранскяень РДК-нь фойеса ламоль ломаньда. Синь ванондозь Торбеевскяй райононь выставкать «Мастерство земли мордовской». Тяса няфневсть национальнай вышивка, эсь кядьса кодаф корзинат, картинат, мокшень щамса-карямса наряжаф някат, ватаста тиф някат и нинге лама мезе.
Ламоц ваныхнень салазе сельмованфснон понань кштирди авась. Кядьсонза кштирьсь шарондсь, бта кштись и содазе, мзярда комотемс, мзярда сетьмомс, а мзярда вихонзамс. Тя эсь лацонь кштимать эзда перьфканза ашкодовсь понань шуваня сюреня, конань эзда Валентина Фирсовась, кштирди авась, кодай пильгс щамс носкат.
Тязк кафта цёратне-гармонисттне «Любо, братцы, любо!» мороть мархта васьфнезь концертс саф инжихнень. Синь сяшкава лац морасть, што солафтозь перьфкаст кочкаф ломаттнень седиснон.
Сцена лангсовок Торбеевскяй райононь художественнай самодеятельностень артисттненди ульсь мезе няфтемс ваныхненди. Народнай творчествать вельде синь пачфтезь эсь оцю кельгомаснон шачема крайти, сонь коензонды-обуцянзонды. Народнай моронь ансамбльхне «Васедема» и «Красава» кеподезь ваныхнень мяльснон. Оцюшкада кеняртьфтезь залть «Аллегро» вокально-инструментальнай ансамбльсь и «Околица» вокальнай коллективсь. Аш кода аф азомс школаса тонафнить Виктория Антошкинать колга. Стирнясь асу сембоса, кода морамаса, стане и кштимаса. Войнать колга «Панамки» мороть, бта аф моразе, а азондозь-азондозе. Сяс залсь цяпамаса ламос ашезе нолне сценать лангста.
Стяда и сельмоведь пачк кулхцондозь «Каркт» мороть, конань моразе Виктор Бегаев. Тяфта жа концертонь ваныхнень мяльс тусь Наиля Жанакаевать и Татьяна Нудиковать моросна.
Ламода мазоптозе и петезе концертонь программать «Вайме» хореографическяй коллективсь. Синь няфтсть национальнай кштимат.
Рузаевскяй районць
«Шумбрат, Мордовия!» ХХIХ Республиканскяй народнай творчествань фестивальса-пялькстомаса Рузаевскяй райононь художественнай самодеятельностень коллектифне эсь концертонь программаснон лемдезь Отечествань аралайхненди. И выставкаське «Мастерство земли мордовской», конац тифоль-ладяфоль РДК-нь фойеса, арьсефоль патриотическяй темаса. Васендакиге сельмос повсть эряфкшу волонтёрхне, конат кодасть кяшемань сетть и «фронтовой агитбригадась» морасть войнань кизонь морот. Тяда башка выставкаса няфневсть Рузаевскяй райононь машты кядь ломаньцнон работасна: национальнай щамса някат, бисерста тиф парши, вышивка и стак тов.
А концертонь программасна ульсь народнай творчествань видексонь праздникокс, коса сюлмавсть народнай традициятне и патриотическяй темась.
Сценать лангс кадеттнень, музыканттнень и морайхнень мархта лиссть Отечествань аралайхне: Афганистанонь, Чечнянь и СВО-нь ветераттне. Залсь васьфтезень синь стяда. А конашкава седиень токайкс марявсь боевой офицерть, СВО-нь участникть, «Герои среди СВОих» программань участникть Александр Кузинонь Булат Окуджавань «Мон тунь пулять эзда…» стихотворениянц лувомац. Тя выступлениясь арась фкя инь мяляфтовикс сембе концертонь программать эса.
Тяда башка кайгсь лама мокшень и рузонь морода. Синь моразь «Ару лихтибря», «Марлюня» и «Мокшаночка» фольклорнай ансамбльхне, а тяфта жа «Мозаика», «Валда ши» и «Отрада» народнай вокальнай ансамбльхне. Лямбоста васьфтезь ваныхне Илья Веретновонь, Елена Воронинать, Элла Зиминать морамаснон. А конашкава тусь залть мяльс «Пульс» и «Антре» кштимань коллектифнень выступлениясна. Ламос цяпазь ашезь нолне сценать лангста и «Парафраз» народнай инструментонь оркестрть.
Рузаевскяй районть концертонь программац оцюволь и эрь номерть колга ули кода азондомс башка, сяс мес пяк лац аноклафтольхть, профессиональнай ширде оцю уровеньца. Сембоц сценать лангс лисендсь пцтай 500 артист. И эрь выступандайсь сатсь тёкш тя фестивальса.
Краснослободскяй районць
8 ноябрьста «Шумбрат, Мордовия!» XXIX Республиканскяй народнай творчествань фестивальса-пялькстомаса эсь творчестваснон няфтезь Краснослободскяй райононь эряйхне. Тя мероприятияс сафне концертта инголе ванондозь народнай промыслань мастерскойхнень «Мастерство земли мордовской» выставкаста. Экспозицияса няфневсть тя аймаконь машты кядь ломаньцнон декоративно-прикладной творчествасна. Мезе аньцек тяса ашель: сёвоньцта, бисерста тиф изделият, национальнай вышивка, национальнай щапт-каряпт, картинат, кружеват и лама лия экспонатт.
Шарфтсть эсь лангозост ваныхнень мяльснон Наталья Бянинать и Нина Степановать работасна-кружевасна. Ашесть ётне и Алексей Сурковонь работанзон вакска. Сон шуфтста тиенди ярхцамань-симомань посуда, конат аф визькс путомс шра лангс инжиень инголи.
Сцена лангса Краснослободскяй райононь спектакльть-концертть панжезе райононь оцюнясь, СВО-нь ветеранць Иван Волков.
Васенце минутаста киге «Историческая реконструкция» спектакльть няфтемста, ваныхне повсть войнань пингонь шитненди. Синь инголест эрекласть кунардонь толу пинкне. Сире ломаттнень, аватнень и иттнень поездсь ворьфтьсыне войнать эзда. Но ардомбачк фашисттне ёрдасть лангозост бомбат. Од тядясь атнай иднянц мархта колма шит якась-шяясь тялонь вирьге, мзярс ашезь му синь партизаттне. Сят и аралазь. 80 кизода меле эстонь атнай иднять, Валюшкань, уноконяц примай участия ся толу кизотнень реконструкцияса.
Спектаклень-концертонь программась сотозень ётай и тяниень пинкнень, сон пачк сюлмафоль патриотическяй темаса. Киньге ашезе када озадонь седихть Ирина Абрамовать морамац «Мон карман учема» и «Ветеранонь» хорть—«Касы Волгоградса келуня». Ваныхне ацерготф седихть кулхцондсть моротнень эса и нарнесть сельмоведьснон.
Аш кода аф азомс Дима Шушняевонь мораманц колга. Сон моразе «Келувонь отт» мороть. Цёранять вии, кайги, ару вайгялец лийфттянза-салатанза и таколфтсы ваймоцень.
Башка эрявихть лятфтамс кштимань коллектифне. Тят: «Грация» хореографическяй коллективсь—«Колокольца» рузонь кштимась, «Виктория» кштимань коллективсь—«Маковочки» кштимась, «Калейдоскоп» кштимань коллективсь—«Варенька» рузонь кштимась, «Акварель» кштимань коллективсь—«Войнада каршень вальс» и, конешна, «Гармония» кштимань коллективсь, конац няфтезе «Вень пзьгататне» кштимать.
Сембе синь мазоптозь концертонь программать. Оцю сюкпря теест.
Ашезь ляда концертсь и мокшень морофтома. Фольклорнай ансамбльхне «Мокшаваня», «Пайгоня», «Кайги вайгяльхть» казьсть ваныхненди мокшень морот. Аделавсь Краснослободскяй райононь концертонь программась «Бессмертный полк» мороть мархта. Од ломаттне, школаса тонафнихне—концертонь сембе участникне лиссть сценать лангс Великай Отечественнай войнаса шавф мала ломаньцнон портретснон мархта. Няфтемок тянь мархта поколениятнень ёткса сотксть и, што мялямсь кармай эряма фалу.
Кадошкинскяй районць
Кадошкинскяй райононь «Мастерство земли мордовской» выставкать ламоль ваныдонза, сяс мес ульсь мезень лангс ёрдамс сельмованфце. Но сембода ламоль ломаньда «Мзярс минь мяляфтсаськ ётай пингть—минь ули сай пингоньке» военнай темас экспозициять ваксса. Тяса ладяфоль «Полевой почта», сёрмат, фотографият, тематическяй экспонатт. Военнай формаса гармонистсь ушедозе «Нам нужна одна победа» мороть. Ваныхне малаткшнесть и вайгяльснон шовордазь марстонь морамати.
Кадошкинскяй райононь отчётнай концертса сценать лангса артисттне няфтезь, кода фкя поколенияста омбоце поколенияти максовихть национальнай койхне-обуцятне. Тяфта жа няфтевсь патриотическяй темась. Кадошкинскяй школань тонафнихне лятфтазь залти: «Мзярс минь мяляфтсаськ эсь атянь-атяньконь—шуроста поколениятнень ёткса сязеви соткссь!»
Ваныхнень мяльс тусь Сергей Кузнецовонь морамац. Сон гитара каршес моразе «Тон вдь лядоть шиса, солдат!» мороть.
Л.Гурченконь мороц «Цёразень колга озондома» аварьфтезе сембе залть. Мороть коряс «Сувенир» кштимань коллективсь няфтсть военнай темас кштима.
Седиень таколфтыста лувозень Сергей Сухонинонь «Кафта сазорхне ласьксть войнать эзда» стихонц Кадошкинскяй школань ветеце классонь тонафнись Варвара Панкратова.
«Ника» вокальнай ансамбльсь СВО-нь участникть Невлютовонь семьянц мархта моразь «Мрдак» мороть. Морось кайгсь пяк вииста, эмоциональнайста, кона арьсефти и аварьфти.
Концертонь программаса ульсть и национальнай кяльса номерхт. «Сувенир» кштимань коллективсь няфтезе «Мокшаванят» кштимать. «Чивгокскя» фольклорнай ансамбльсь моразе мокшень народнай мороть «Катюша стирнясь». Татаронь кяльса Дамир Вельшин моразе «Так приди же» мороть.
Ламоль и лия мялень салай кштимада и морода.
Теньгушевскяй районць
Теньгушевскяй райононь «Мастерство земли мордовской» декоративно-прикладной и изобразительнай творчествань выставкаса няфневсть машты кядь ломаньцнон работасна, конат тифтольхть аф фкя лацонь техникаса. Тяса ульсь мезень лангс ваномс.
Концертонь программасост театрализованнай формаса артисттне эреклафтозь-няфтезь Теньгушевскяй районть историянц, исяконь шинц. Выступленияснон вельде самодеятельнай коллектифне няфтезь эсь оцю кельгомаснон шачем крайти, эсь национальнай койснонды-обуцяснонды.
Вокальнай ансамбльхне «Ивушка», «Балагуры», «Сельчанка», «Воля» и «Валдоня» кеняртьфтезь ваныхнень эсь кайги, ляпе и лямбе морамаснон мархта. Мяляфтовикс ульсь «Шокшень ават» фольклорнай ансамбльть мороц, кона казсь ваныхненди лама седиень пети таколдомада.
Концертонь программань сембе номерхнень эзда ваныхне няезь районть самобытнай шинц и ломаттнень гордостень марямаснон эсь шачема уженяснон инкса.
Любовь МАРКИНА.