Саранск ошень округсь
23 ноябрьста «Шумбрат, Мордовия!» фестивальть — пялькстомать сёлгозь эсь отчётнай концертонь программаснон мархта Саранск ошень округонь артисттне.
Концертсь, кона лемтьфоль «Пинкнень ёткса сотнемань сюрекись», мольсь колма частт. РДК-нь залста сембе васттне пяшксетольхть, кода корхтайхть, маренди ашель коза прамс. Саранск ошень округонь оцюнять лемста ваныхненди пшкядсь ошень хозяйствань Департаментонь директорсь Юрий Шохин. Сон лемдезе фестивальть фкя инь оцю илакс республикать культурнай эряфса. XXIX Республиканскяй фестивальть-конкурсть темац тядде—Великай Отечественнай войнаса Великай Сяськомати 80 кизонь топодемась, Россияса Отечествань аралаень кизось и МР-са историческяй лятфнемань кизось.
Концертонь программать панжезе военнай темас попурринь моразь «Argutus» хорсь. Сон казсь ваныхненди военнай моронь валда лятфнемат.
Республикаса ламоцненди содаф музыкантть, СВО-нь участникть Денис Солдатовонь лемоц. Сон од кизонь веня, штоба кеподемс боевой ялганзон мяльснон, БТР-нь капотть лангса няфтсь ёмла концерт скрипкаса моразь.
Фронтонь скрипачть, кода лемнесазь Денисонь, залсь васьфтезе кядень цяпазь.
Патриотическяй темас морась Руслан Нарбеков—«Геройхнень пингсна» мороть. Тяда башка ваныхне оцю мяльса кулхцондозь «Радоница» и «Морама» ансамбльхнень, «Отрада» моронь народнай театрать, «Гайгема» инструментальнай ансамбльть морамаснон. Ульсь лама лия мялень кеподи выступлениядовок.
Концертонь омбоце отделениять панжезе Л.П.Кирюковонь лемса Саранскяень музучилищань народнай инструментонь оркестрсь.
Цебярь музыкальнай казнекс ваныхненди ульсь Саранск ошень округонь Культурань Дворецть «Семьяти Гимнась» семьянь проектоц. Сонь моразь артисттне, конат лиссть сценать лангс эсь идьснон мархта, инь ёмлати кизонявок ашель.
Эряви азомс, што концертонь эрь номерсь аноклафоль оцю профессиональнай уровеньца. Ульсь тяса мезе ваномс и одонди, и сиренди, и алянди, и аванди. Концертонь колма часттне ётасть апак фатяк.
А концертта инголе РДК-нь фойеса няфневсь «Саранск мастеровой» декоративно-прикладной искусствань выставкась. Тяса инжихне аф аньцек кельксезь-ванондозь машты кядь ломаттнень работаснон. Но и ульсь кода мяльс туф экспонатть рамамс.
Оцю васта занясь картинань выставкась, коза ладяфтольхть Саранскяень школьникнень и студенттнень работасна. Выставкать ламода мазептезе и петезе моднай щамонь няфтемась, конань аноклазь Саранскяень асу кутерьетьне.
Тязк, фойеса Культура Zа Победу проектть коряс ладяфоль СВО-нь воиттненди лезксонь кочкамась. Сяс ламоц инжихне сашендсть канкс-посылка мархта. Тяфта жа, кинь ульсь мялец, кодасть аралаеньконди прважамс кяшемань сетть.
7 декабрьста ётафтови «Шумбрат, Мордовия!» XXIX Республиканскяй народнай творчествань фестивалень-пялькстомань гала-концертсь. Ваныхнень ули нинге фкя возможностьсна няемс и кулемс Мордовиянь самобытнай коллектифнень творчестваснон.
Атюрьевскяй районць
Тяфта ни сатовсь, што «Шумбрат, Мордовия!» XXIX Республиканскяй народнай творчествань фестивальса-пялькстомаса мекольценди эсь отчётнай концертонц няфтезе Атюрьевскяй районць. Кода содаф, сёлгомс фестивальть работанц пяк стака. Саранскяень ваныхне тя пингста няйсть пяк лама мази, оцю профессиональнай уровеньца аноклаф концертонь программа. И мекольценди выступандайхненди эрявсь аф прафтомс тя тёкшсь. Тя удалась тиемс Атюрьевати.
РДК-нь васенце этажса ладяфоль «Мастерство земли мордовской» декоративно-прикладной искусствань выставкась, коса примасть участия райононь сисем велеста 39 машты кядь ломань. Сембоц няфневсь 195 экспонат, конатнень ёткса ульсть живопись, валенцят, шуфтста керсемат, спицаса кодамат и лама лия.
Выставкаса няфтевсь вете мастер-класст. Кой-конат работасть семьянь келеса. Кепотьксонди, керамикать ланга рисавамань, сёвоньцта аф фкя лацонь някань тиендемань семьянь творческяй мастерскойса работасть тядят-стирьхть Чудаеватне.
Валенцянь кевярдемань и сюреста спицаса кодамань семьянь творческяй мастерскойса мастер-класс няфтсть алят-стирьхть Рапиттне.
Тяда башка няфтевсть национальнай щамонь стамань, куйгорста кодамань, иденди налхкшень тиемань и шуфтста керсемань мастер-класст. Эрь машты кядь ломанть ваксса ламоль ваныда, кизефтида, тевонь варжайда.
Оцю васта выставкаса занясть национальнай темас и Н.Н.Шумкинонь (конац эрь кизонь участник тя фестивальса) работанзон мархта уженятне.
И квиок ваныхнень эзда озадонь седихть ашезь ёта патриотическяй экспозициять вакска. Стенттнень эзда лангозонк ванцть Атюрьевскяй райононь алятне и ёфси од цёранятне, конат эрь кодама пингова максозь эсь эряфснон Родинать араламанкса—Афганистанца, Чечняса и СВО-са шавф воиттне. А нинге Советскяй Союзонь Геройхне: Е.Г.Акиняев, Ф.Ф.Коновалов, А.Г.Махров. Синь эряфонь кисна—указовама од ломаттненди кельгомс и ванфтомс эсь мастороньконь.
Тяка маласа ащесь «Ваймама ётконя» военнай темас эрек композициясь.
Сценать лангса концертонь программась ушедсь «Ингольдень пингонь геройхнень эзда» оцю прологть мархта. Сяльде «Ялгат» ансамбльсь няфтсь театрализация, кода тядясь прважасыне врагть каршес тюрема, фашисттнень эзда шачем масторть арлама колма цёранзон, колма тряензон. Тядяти ужяльхть иднянза, но сонь валонза «Кие, кда аф синь араласазь Родинать врагть эзда» сувасть эрь ваныть ёньц и ваймос, и марявсь тя велень мокшавать инкса оцю гордость. Сценкать няфтемста ванфтовсть мокшень сембе койхне-обуцятне: и авардематне-кольгондематне, и бслава-матне-озондоматне. Сембось налхковсь стане, бта мрдаме войнань каршень пинкненди.
Залса ваныхне сяконь нарнесть сельмоведьснон. И тят ульсть сяпи сельмоветть, содамок, што тяка пингть Родинать аралама тушендыхть алятне СВО-ти.
Тяфтама жа седиень ацергофтыкс ульсь «Идькс пингсь шятьф войнаса» литературно-музыкальнай композициясь, конань няфтезе «Юность» коллективсь. Иттне щафтольхть ся пингонь щамса, кядьсост—мирнай эряфста сявф някасна, сюлмонясна, эзрайнятнень кядьсост чемодатт. Синь ёрайхть ворьгодемс войнать эзда—эвакуировандамс тоза, коса аш врагсь. Шабатне сяшкава сувасть эсь рольснонды, што абондат, конашкава синь марясазь ся пингть пичефксонц.
Тяка темать поладозе «Созвездие» кштимань коллективсь, конац няфтсь «Вагонга» кштимать. Ашезь эряв валхт, штоба шарьхкодемс, мезе няфтеви сценать лангса. Музыкась, спецэффекттне, костюпне, стирнятнень шарондомасна, прянь ёрямасна семботь азозь-няфтезь валфтома.
Залсь Евгений Шумкинонь морамста «Господа офицеры» мороть кулхцондозь стяда.
Аш кода аф азомс Марина Калинкинать мораманц колга. «Ужяльдесть тядять!» мороть, кода молитвань, моразе-эняльдезе. Вайгялец вии, мази, пяшксе аф фкя лацонь таколдомада. Марина эняльди «Тядясь аф мувору, мес шавозь цёранц. Ужяльдесть тядять!» И тя валхнень морамста сцена лангса няфтевихть СВО-са шавф Атюрьевскяй райононь воиттнень портретсна. Залса, мярьган, ашель стама ломань, конань афолезь ляпияфта сельмоветтне.
Патриотическяй темась, кодамкс ульсь вешфкссь концертонь программати, пяшкотьфоль вельф.
Оцю мяльса концертонь ваныхне кулхцондозь Ирина Бланкинать «Ромашкат» моронц, дуэтть Нина Шумкниать и Елена Сиркинать «Досада» сиде мороняснон.
Ламоль концертса ансамбльда, конат маорасть мокшень, рузонь и татаронь морот. Концертсь удалась, сон сюлмафоль аф фкя лацонь жанрань номерса, конат и аварьфтсть, и кеняртьфтсть. И тяни мярьктяма Атюрьевскяй райононь артисттненди, васедемозонк.
Любовь Маркина.