Тядде «Шумбрат, Мордовия!» Народнай творчествань XXVI республиканскяй фестивальсь-конкурссь ётафтови аф Саранскяйса, а райоттнень эса. Недляшиста, 23 октябрьста, отчётнай концертснон няфтезь Атюрьевскяй муниципальнай райононь художественнай самодеятельностень коллектифне. Концертонь программать ушедомдонза инголе Саранскяйста саф жюрись ванозе художественно-прикладной творчествань выставкать, конань мархта сонь содафтозе идень библиотекать заведующаец Л.К.Вешкина.
Выставкась панжевсь патриотическяй уженяста. Атерень районнай библиотекаса тяда инголе ётафтовсь «Марятама гордость» лем ала патриотическяй акция. Лувихне анокласть открыткат мобилизованнай солдаттнень лемс, коса арьсесть теест мрдамс куду сяськикс и шумбраста-тазаста. Тяда башка, инжихненди ульсь кода эстеест тиемс тяфтама открыткат. Оцю васта занясь «Атерень пачат» экспозициясь. Кода содаф, пачатне Атюрьевскяй районть брендоц, визитнай карточкац. Пачаса каванязь сембе инжихнень. Салазе ваныхнень мяльснон «Весяла посиделкат» мастер-классь. Мокшавась, рузавась, татаравась фкя кудботмоса кштирдсть-кодасть носкат, варягат. Тянь мархта няфтезь фкя-фкянь ёткса ладямашить.
Тядде тага кеняртьфтезень эсь творчестванц мархта Атерень мокшалясь Н.Н.Шумкин. Сон няфтсь живописень 10 картинат, 14 работа сёвоньцта и шуфтста. Жюрись и ваныхне макссть оцю питне Николай Николаевичень работанзонды. Ужяль, но од ломаттне аф кярьмодихть тя пяк эрявикс тевти. Няфтезе эсь асушинц, маштомошинц илиста кептерень кодамаса мокшалясь В.В.Тиркин.
Мокшаватне няфтсть пяк интереснай мастер-класст национальнай костюмонь стамаса, котф пакшкаста (парчканяста) някань тиемаса. Атерь велень 1№ средняй общеобразовательнай школаса тонафнись Александр Надин няфтезе боевой техникань моделень коллекциянц. «Гномиконь семьяса»—тяфта лемдезе эсь кядьса тиф коллекциянц Роза Макарова. Тя оцю илать эзда ашесть ляда шири и Атерень творчествань кудса работайхне. Тястонь преподавательхне и синь воспитанниксна анокласть лама творческяй работа.
Художественнай самодеятельностень коллектифнень отчётнай концертсна ушедсь «Минценнетнень аф кадондсаськ» акцияста. Кайгсть стихт. Ваныхне стяда кулхцондозь «Тя минь Россияньке» мороть, конань моразе Евгений Шумкин. Ламотнень ашесть кирдев сельмоведьсна. Тя темать поладозе и Атюрьевскяй райононь оцюнять заместителец Н.С.Шаронов. Сон азозе, што пингсь тяни стака. Моли частичнай мобилизациясь. Тевда лама. Тячиень выставкаса, отчётнай концертса васенце вастса патриотическяй темась.
Атюрьевскяй районца эряйхть лама национальностень ломатть. Отчётнай концертсовок 18 номерть эзда сисепне—мокшень морот, кштимат, «Мазы масторть колга» гармонистонь попуррит. Ваныхне ламос кядень цяпамаса ашезь ноля сценаста Пичепулоняста «Мокшава» триоть. И.Тремасова, В.Акиняева, Н.Тремасова морасть сире пингонь мокшень мора—«Алдась аварди». А конашкава удалась сценкась, конань путозе «Мокшаночка» идень творчествань фольклорнай коллективсь, конань вятьсы Н.Марфина. Мазы вайгялец Алина Шумкинать. Сон рузава. Морась мокшень кяльса. Алинань мораманц отмечазь жюрись, ваныхне. «Шинясь нинге изь лисе»—тя мороть эсь репертуарозонза сявозе районнай культурань кудонь «Ялгат» фольклорнай ансамбльсь.
Пцтай эрь кизоня отчётнай концертса примси участия Мордовия Республикань культурань Заслуженнай работниксь гармонистсь Н.Ф.Турусов, конань лемоц содаф аф аньцек районца, но и марнек республикаса. Сонь ученикоц Владислав Шумкин содаф марнек странаса, лисендсь сяськикс лама конкурсса. Тядде Николай Фёдорович моразе Д.Шиловонь «Токката» музыканц. Аш кода аф отмечамс лия гармонисттнень Николай Пугаевонь, Николай Петровонь, Алексей Юдановонь выступленияснон.
Атюрьевскяй райононь художественнай самодеятельностень коллектифнень отчётнай концертсна ётась сембе ширде аноклафста, мялень салайста. Тянь отмечазе и Саранскяень жюрись. Кода азозе жюринь членць, Мордовия Республикань искусствань Заслуженнай деятельсь, Государственнай премиянь лауреатсь В.С.Радионов, Атерсь—гармонистонь уженя. Атерень гармонисттнень лемсна содафт странаса. Тя Николай Турусов, Иван Сяткин, Владислав Шумкин. А мзяра нинге крьвястеви од тяштеняда. Отчётнай концертса тянь лац няфтезе «Гармонная мозаика» идень искусствань школань ансамбльсь.
Итогонь тиемста Атюрьевскяй райононь оцюнять заместителец Н.С.Шаронов азсь лямбе валхт жюрить и культурань работникнень лемс. Концертонь анокламста аф кржа вий макссть культурань отделонь оцюнясь Е.П.Надина, райононь культурань кудонь директорсь Е.В.Ведякова, библиотекань и культурань лия работникне.
И.Вешкин.