21 декабрьста Саранскяйса, Культурань республиканскяй Дворецса, ульсь «Шумбрат, Мордовия!» Народнай творчествань XXVIII республиканскяй фестивальть Гала-концертоц и «Мастерство земли мордовской» декоративно-прикладной и изобразительнай творчествань заключительнай выставкац. Фестивальть лауреатонзон и дипломантонзон заключительнай концертснон ванома пуромкшнесь пяк лама ломань и няфтьфоль сон кафксть—шить и илять.
Участникненди приветствиянь вал мархта пшкядсь Мордовия Республикань Оцюнясь Артём Здунов.
—«Шумбрат, Мордовия!» фестивальсь—достоянияньке. Сон келиста аськоляй республикава и марнек странава. Мордовиясь цебярь сатфксса шумордасы тя кизоть. Лама тиенттяма культураньконь, кяленьконь ванфтомаснон инкса—мяль шарфнетяма электроннай переводчикненди, валксненди, костюпненди, национальнай ярхцамбяльхненди. Тя сембось максома сай пингонь поколениятненди,—азозе сон.
Артём Алексеевич пачфтезе, што мекольдень кизотнень Мордовияса тиф капитальнай ремонт велень 30-да лама культурно-досуговай учрежденияти, идень искусствань 12 школатнень, колма театратнень и ниле музейхнень тяни улихть музыкальнай од инструментсна. Сяда тов арьсекшневи тиемс ремонт Культурань республиканскяй Дворецти.
Тядде «Шумбрат, Мордовия!» фестивальса примасть участия тяконь лувксса специальнай военнай операциянь участникне и синь семьясна.
Мордовия Республикань Оцюнясь казезень инь достойнайхнень. Мордовия Республикань культурань Заслуженнай работниконь почётнай лемсь максф Инсарскяй райононь Культурань кудонь концертмейстерти Владимир Бурнайкинонди, Зубово-Полянскяй райононь Мордовско-Пимбурскяй Культурань кудть заведующаенцты Надежда Пудинати, лиятненди.
«Мордовия Республикать касфтоманцты-виияфтоманцты личнай путксонкса» Мордовия Республикань Оцюнять Почётнай знаконц мархта казьфнень ёткса Н.П.Огарёвонь лемса Мордовскяй государственнай университетонь Национальнай культурань институтонь концертмейстерсь, мокшалясь Василий Родионов.
Республикань Оцюнять Почётнай дипломонц мархта казьф Ковылкинскяй муниципальнай райононь Курнинскяй велень клубонь «Лаймоня» народнай фольклорнай ансамбльсь (руководителец Анна Бутылкина).
«Шумбрат, Мордовия!» фестивальть Положениянц мяльса кирдезь, ладяфтольхть специальнай номинацият.
«Патриотическяй инь цебярь концертсь» номинацияса диплом и ярмаконь сертификат максфт Ромодановскяй муниципальнай районти. «Патриотическяй инь цебярь номерсь» номинацияса дипломса и республикань Оцюнять эзда казнеса казьф специальнай военнай операциянь участниксь, боевой действиянь ветеранць Дмитрий Волков.
«Народнай койхненди вернайкс и преданнайкс улеманкса» номинацияса диплом и ярмаконь сертификат максфт Темниковскяй муниципальнай районти. Тяда башка, сон арась лауреатокс «Мастерство земли мордовской» декоративно-прикладной и изобразительнай творчествань выставкань лауреатокс.
«Геройхнень семьясна» номинацияса дипломса и республикань Оцюнять эзда казнеса казьфт Рузаевскяй муниципальнай районцта Артём Кочнев, Инсарскяй муниципальнай районцта Матвей Матвеев и лиятне.
«Фестивальть ваймоц» номинацияса казьф Ардатовскяй муниципальнай райононь Жаренки велеста протоиерейсь Евгений Самаркин.
«Фестивальть творческяй семейнай династияц» номинацияса казьф Рузаевскяй муниципальнай райононь Левжа велеста Канаефнень семьясна, «Самобытнай музыкант» номинацияса—Темниковскяй муниципальнай районцта мокшень моронь латцись-морсись, мокшалясь Иван Сургаев.
Седи ваксста поздравляндасаськ «Инь цебярь коллективсь-спутниксь» номинацияса сяськить—Старошайговскяй муниципальнай райононь Национальнай культурань центрань «Лаймоня» идень фольклорнай коллективть и сонь руководителенц Виктор Пивкинонь, кона сяськсь «Коллективть-спутникть инь цебярь наставникоц» номинацияса.
И вов Культурань республиканскяй Дворецу пуромфненди сась инь таколды пингсь—итогонь тиемась.
«Шумбрат, Мордовия!» Народнай творчествань XXVIII республиканскяй фестивальть-конкурсть анокламаса и ётафтомаса оцю результаттнень инкса и активнай участиянь примаманкса, «10000 ломанти молемс населения мархта муниципальнай образования» номинацияса III степенень лауреатонь дипломсь и ярмаконь сертификатсь максфт Атяшевскяй райононь, II степененнесь—Зубово-Полянскяй райононь, I степененнесь—Большеберезниковскяй райононь творческяй коллектифненди. Фестивалень Гран-прить и ярмаконь сертификатть сатозь Старошайговскяй райононь творческяй коллектифне.
«10000-да лама ломанти молемс населения мархта муниципальнай образования» номинацияса васттне явовсть тяфта: III степенень лауреатонь дипломсь и ярмаконь сертификатсь максфт Рузаевскяй, II степененнесь—Лямбирскяй, I степененнесь—Краснослободскяй муниципальнай райононь, фестивалень Гран-прись и ярмаконь сертификатсь—Ковылкинскяй райононь творческяй коллектифненди. Краснослободскяй районць арась и «Мастерство земли мордовской» выставкань лауреатокс.
Тядде фестивальсь-конкурссь ётафтовсь комсь кафксувоцеда и эсонза примась участия республикань 5 тёжяньда лама ломань. Тняра кизоста сон арась марстонь козяшикс, гордостень маряма вастокс!
Каземань церемонияда меле пуромфне оцю мяльса ванозь Гала-концертть.
Татьяна Альшина.