18 октябрьста Саранск ошса путф ушеткс 29-це «Шумбрат, Мордовия!» республиканскяй народнай творчествань фестивальти, кона лемтьф Великай Сяськомать 80 кизонь топодеманцты, Отечествань аралаень и Мордовия Республикаса историянь лятфнемань кизоти.
Фестивальть-пялькстомать панжемс правась максфоль Ковылкинскяй районти, ётай кизонь тя оцю иласа сяськити. Концертса примась участия 200 лама велень артист.Нят солистт, хореографическяй артистт, стихонь лувихть, музыкантт. А марса синь няфтсть пяк оцю концерт, коса ульсть и куватьс цяпамат, и кенярдемат, и сельмоветть.
Седиста моли лямбе валхт фестивалень ушедыхнень и ваныхнень лемс азсь Мордовия Республикань культурань, национальнай политикань и архивнай тевонь министрсь С.Н.Баулина. Сон лятфтазе, што «Шумбрат, Мордовия!» асу ломанень пялькстомась арась афкуксонь брендокс Мордовия Республикати. Аф стак сон ламоксть арсесь культурнай инициативань Президентскяй фондонь грантонь сявикс.
Светлана Баулина азсь сембонди шнамань валхт, конат кирдьсазь тя фестивальть ширенц и тиендьсазь семботь сянкса, штоба творческяй коллектифне повольхть республикань главнай сценать лангс.
Поздравляндазень фестивалень-пялькстомань участникнень и Ковылкинскяй муниципальнай райононь оцюнясь Игорь Бутяйкин:
—Сембе пинкнень Родинать кельгомац и сонь араламац ульсть васенце вастса. Ковылкинскяй районць лама тиенди сянкса, штоба ванфтомс мялямть ся ломаттнень колга, конат шавовсть войнаса и локальнай конфликттнень пингста. Мордовия Республикань Оцюнять Артём Здуновонь лезксонц вельде минь панжеме стела СВО-са шавфненди, «Лятфнемань аллея». Тердезень фестивалень сембе участникнень авторскяй моронь фестивальс, кона ётай Ковылкина ошса 8 ноябрьста, а тяфта жа святой Георгий Победоносецонди храмонь панжема, кона ётай «Патриот» паркса 16 ноябрьста.
Ковылкинскяй райононь артисттнень пяк козяль, мялень салаень концертсна. Токазе ломаттнень седиснон «Сухопляс» кштимась, кона эвондась велеса Великай Отечественнай войнать пингста. Алятне сембе фронтсот, велеса аньцек ават, шабат и эряфкшу ломатть. Аш и гармонистт. Сяс тя кштимась ётась музыкафтома, но сон токазе ваныхнень седиснон. Сиде моронянзон мархта кеняртьфтезень ваныхнень Рыбкина велень эряйсь Валентина Сурняева. СВО-нь ветеранць Николай Кочегаров моразе эсь седиень токай моронц, лятфтамок эсь колма шавф боец ялганзон. Мамолаева велень «Мокшаночка» ансамбльсь моразе мокшень кяльса «Катюшать». Морама ушедсь сембе залсь. Морамати лездсть и субтитратне, конат мольсть оцю сценань экранца.
Культурань дворецонь фойеса ётафтовсь оцю тематическяй выставка. Тядде народнай машты кядь ломаттнень изделиядост башка ульсть Великай Отечественнай войнань и СВО-нь экспозицият. Ковылкинскяй райононь артисттне няфтезь 1629№ эвагоспитальть, кона ульсь районтть территорияса войнань кизотнень.
Илья Вешкин.