Сире Шайгавонь районць
Мазы мокшень мороса и весяла кштимаса васьфтезь Сире Шайгавонь райононь художественнай самодеятельностень артисттне концертонь ванома сафнень. Гармонияса морайсь стане люпшнесыне инструментонь пунянятнень, што пилькне синць канттядязь ёткозост кштима.
Сире Шайгавонь муниципальнай районць «Шумбрат, Мордовия!» XXIX Республиканскяй народнай творчествань фестивальса-пялькстомаса эсь концертнай программаснон «Минь мяляфтсаськ. Минь марятама гордость» ушедозь оцю экранца патриотическяй темас презентациянь няфтемаса. Сяльде Алексей Гагарин, идень хорсь и концертонь сембе участникне моразь Н.В.Кошелевать и Раиса Орловать «Солдатть колга балладась» мороснон.
Сире Теризморгань народнай хорсь содаф аф аньцек минь республикасонк, но и марнек странаса и лия масторса. Синь эсь выступандамаснон мархта салазь ваныхнень мяльснон. Эрь синь моросна—тя ёмла спектакль. Народнай хорсь «Мокшаваня» фольклорнай ансамбльть и «Синельга» народнай ансамбльть мархта пяк торжественнайста и вииста моразь «Минь странаньке» мороть.
Сире Теризморгань народнай хорть ули тарадкац—«Лаймоня» идень фольклорнай ансамбльсь. Марса синь моразь и кштизь «Дрьгань Настанясь» мокшень народнай мороть. Ацергофты, седиень колай театрализация няфтсть, кода синь велесост марязь кулять Великай Отечественнай войнать ушедоманц колга. Кода ёндолонь кфчядема ётась тя кулясь залса эрь ломанть седиге и ваймова и сельмоветтне синць эслек тусть шудема. Хуш и лама пингта ётась, но войнась эрь семьяса, эрь кудса кадсь эсь колганза лятфнема.
Концертса ламоль рузонь кяльса морода. «Лада» народнай ансамбльсь морасть «Попурри войнань кизонь моротнень коряс». Ветеранонь народнай хорсь салазе ваныхнень мяльснон «Шумбратада, эсь ломатть» мороснон мархта.
Ламос цяпасть ваныхне школань ученицать Мария Принзинать «Солдатик» моронцты и «Мечта» идень кштимань коллективть «Пайгоняса налхксема» мокшень кштимаснонды. Аделавсь концертсь, кода и ушедсь—сембе участникне моразь «Лама идень Россия» мороть.
А Саранскяень РДК-нь фойеса няфневсь декоративно-прикладной выставкасна, коса примась участия 39 машты кядь ломань и няфневсь пцтай ниле сятт экспонат.
Няевикс вастса ладяфоль-тифоль «Тейть, солдат, лемдеви» тематическяй экспозициясь—Великай Отечественнай войнать пингста солдатть эряфста фрагмент. Ладяф кошть ваксса ащи алашань крандаз, эзонза озаф солдат, сонь тапаф прянц ашкодсы бинтса медсестрась. Тяса жа няфневихть ся пингонь солдатонь медальон, каска, фотокарточкат.
Азсаськ, Сире Шайгавонь районцта войнас тушендсь 8480 ломань, эздост 5027—шавовсть. Тя экспозициясь лемтьф шавф солдаттнень подвигснонды. Шяйгяряйхне эсь геройснон мяляфтсазь, эсь геройснон инкса маряйхть гордость!
Темниковскяй районць
Саранскяень РДК-нь фойеса ладяфоль Темниковскяй районть оцю выставкац, коса примасть пцтай 30 машты кядь ломань. Экспозициясь ушедсь «Лятфнемань стендть» эзда, коса няфневсть ломаттнень фотографиясна, конат аралазь мирть фашизмать эзда. Салась мяль фронтста тяштьф сёрмань выставкась «Мон шисан и шумбран, мезе и теенть арьсян», коса ульсть аф аньцек копият, но и войнань пингонь сёрмат. «Война. Книга. Лятфнема» экспозицияса азондовсь, кода работасть районца библиотекатне войнань кизотнень. Фотозонась «Фронтса ваймама вастоня» няфтезе, кода ваймосесть солдаттне бойда меле.
А сценать лангса панжезе концертть Темниковскяй районть оцюняц Олег Родайкин. Тяда меле артисттне ушедозь концертонь эсь программаснон. Кайгсть стихт, морот, ульсть кштиматка. Сембе синь сюлмафтольхть патриотизмань, честень и доблестень смузьса. Аш кода аф лятфтамс Л.И.Воиновонь лемса народнай инструментонь ансамбльть, конац моразе «Сяськомань Шись» сембонди кельговикс мороть.
Концертсь тусь ваныхнень мяльс. Синь получасть аф фкя лацонь эмоцият, коса ульсть и сельмоветть, и кенярдема, и цяпамат.
Зубово-Полянскяй районць
«Шумбрат, Мордовия!» XXIX Республиканскяй народнай творчествань фестивальть-конкурсть омбоце недялястонза Саранскяень сценать лангса эсь творчестваснон няфтезь Зубово-Полянскяй райононь художественнай коллектифне.
Концертонь программать, конац лемтьфоль «Лятфнемань тол», панжезь театрализованнай патриотическяй композицияса «Поколениятнень ёткса соткссь». Артисттне пачфтезь ваныхненди, конашкава оцюволь райононь эряйхнень путкссна Великай Отечественнай войнаса сяськомать маласькофтоманцты. И лятфтасть СВО-са тячиень аралаеньконь колга. Александр Пудинонь «Сурскяй рубеж» пьесанц коряс няфтсть сценка «Сурскяй рубежень строяйхненди лемдеви», конац сяшкава токась седис, што ламоц ваныхне нарнезь сельмоведьснон.
Сценать лангста кайгсь лама патриотическяй мора. Валентина Антропова моразе «Сяда миллиононь цёрань тядя» мороть, коса тядять образса няфтеви минь странаньке—Россиясь. Концертса ламоль идень коллективда, синь кштисть и морасть. Искусствань идень школань хорть морамста «Шавф героень тядятненди» мороть эрь валсна пачкодсь концертонь ваныхнень седис и ваймос. А «Непоседа» идень коллективсь няфтезе «Яксяргоня» рузонь народнай кштимать, мезьса ламода кеподезь ваныхнень мяльснон.
Киньге ашезе када озадонь седихть ащема Казеефнень семьяснон выступандамасна. Алясь морась гитараса, а иттне—Клим и Александра, морасть семьять колга мороня. Иттнень кайги, мазы вайгяльсна горнясь, кода тундань шудерькскя. Ваныхне ламос кядень цяпазь ашезь нолне синь сценать лангста.
Примасть участия тя концертса и Лодырефнень семьясна, конат аф кунара лиссть «Семья года» Всероссийскяй конкурсса сяськикс. Синь азсть стих эсь семьяснон колга.
Аш кода аф лятфтамс и мокшень моротнень колга. «Мокшаваня» фольклорнай ансамбльсь моразе «Мокшень веле» мороть, а «Ляйне» фольклорнай ансамбльсь—«Кужа велезе».
Зубово-Полянскяй райононь артисттнень концертонь программасна удалась. Сембе ваныхне тусть кепотьф мяльса.
Ельниковскяй районць
«Шумбрат, Мордовия!» XXIX Республиканскяй фестивальса-конкурсса Ельниковскяй райононь артисттнень концертонь программасна «Славати аф куломс, койхненди-обуцятненди—эрямс», кода азозе Ельниковскяй райононь оцюнясь Юрий Бекешев оцю сцена лангста, лемтьфоль эряфсонк аф фкя пингонь Отечествань аралайхненди: конат сяськсть Великай Отечественнай войнаса, пяшкодезь эсь патриотическяй воинскяй долгснон Афганистанца и Чечняса и тячиень воиттне, конат тюрихть неонацизмать мархта.
Концертса примасть участия кода эряфкшу асу ломатть, стане и однят, конат тиендьсазь васенце аськолксснон художественнай самодеятельностьса.
Лямбоста концертонь ваныхне васьфтезь 5 кизоса Ирина Келинать, 10 кизоса Илья Юртаевонь, 8 кизоса Кирилл Макейкинонь морамаснон.
Седиень токазь, сельмоведень нолдамшка моразе Светлана Рябинина Ян Френкелень и Расул Гамзатовонь «Журавли» мороснон. «Любава» кштимань коллективсь няфтезь «Шаронтт, кштирня» якамать-хороводть. Лама кайгсь и мокшень морода: «Кельгомазе ванфттанза», «Шумбрат, келуня», «Атёкш».
Концертть оцюшкада петезе «Паронь пандома» мокшень кунардонь пингонь коень-обуцянь няфтемась. А аделавсь Ельниковскяй райононь самодеятельнай артисттнень концертонь программасна «Россия, тон ськамот тяфтамат!» мороть мархта.
Любовь МАРКИНА.